Cil Pančičanskich koparjow, zamołwitych ST Marijineje hwězdy a trenarja Erwina Kleinmanna za sezonu 2017/2018 rěkaše, so na kóncu mjez prěnimi třomi w tabulce zaměstnić. Wulke předewzaće bu z wuběrnym druhim městnom w stafli dwaj Ewag-Kamjenc-ligi spjelnjeny. Tutón staw wjedźeše po 30. hrajnym dnju samo k hrě wo postup do wokrjesneje wyšeje ligi, a to přećiwo ST Porchowej, druhemu stafle jedyn. Pančičenjo duel njezbožownje přěhrachu. Po 30 partijach we wokrjesnej lize, bjez relegacije, steješe w protokolu 17 dobyćow, šěsć remisow a sydom poražkow. Z wrotowym poměrom 76:32 bě ST Marijina hwězda druhi najlěpši w stafli. Jenož načolnik ST Natwar Němske Pazlicy měješe z poměrom 98:31 lěpšu bilancu.

Jako so w rjadach Sokoła Ralbicy/Hórki před měsacom trenar Jiří Krohmer rozžohnowa, pytachu w Delanach za nowym nazwučowarjom. Někotři kandidaća prezidentej Dierkej Šewcej wotprajichu, tamni chcychu přewjele pjenjez měć. Angažowaneho trenarja za niše koparske klasy namakać je dźeń a ćešo.

Dołho rozmyslować pak w Ralbicach ­po wotprajenjach njetrjebachu, wšako mě­jachu stajnje tak mjenowaneho jokera w pozadku. Wrotar Chrystof Gloxyn dyrbješe w minjenych lětach přeco zaso raz jako trenar zaskočić a swoju wěcku tež stajnje wulkotnje zmištrowa. Treningowe jednotki so mustwu přeco lubjachu a tež z kompetentnymi narěčemi do hrow sej rodźeny Ralbičan respekt mjez přećelemi nadźěła. Wot 1. julija steji tuž wón nětko při kromje a mustwo diriguje.

Na wjesnym swjedźenju w Serbskich Pazlicach su pjatk a sobotu tež kopańcu hrali. Pjatk su tam žony w dwěmaj měša­nymaj mustwomaj za bulom honili, a to z Radworja a Njebjelčic a k tomu hišće někotre hrajerki Serbskeje koparskeje wubranki holcow a žonow. Mustwo w běłych košlach duel 4:3 doby. Sobotu wotmě so turněr ze šěsć wjesnymi koparskimi cyłkami muži. Kóždy hraješe přećiwo kóždemu, a při kónčnym ličenju nasta zajimawa konstelacija. Worklečenjo a Pěskečenjo běchu mjenujcy wšitke swoje štyri hry dobyli, a partija mjez nimi bě so bjez wrotow 0:0 skónčiła. Tak měještej wobě mustwje jenak wjele dypkow, Pěskečenjo pak z 11:0 jedne wrota wjace. W poslednjej hrě dnja bě Filip Kral mjenujcy w poslednich sekundach rozsudne 3:0 přećiwo Wotrowčanam třělił. Třeće městno wobsadźichu Wotrowčenjo, štwórte Róžant, pjate stari knježa ze Serbskich Pazlic a šeste hosćićel.

Hry sudźiłoj staj Detlef Kral z Njebjelčicy a Filip Zimmer z Pančic-Kukowa. Wrotarjej, kotrajž njejstaj w Serbskich Pazlicach žadyn bul do wrotow pušćiłoj, běštaj Frank Měškank (Pěskecy) a Dawid Matik (Worklecy). Kilian Hrjehor