Sport na wjesnym swjedźenju

14. a 15. julija zarjaduje ST Wóslink/Skaskow na sportnišću w Skaskowje wjesny swjedźeń. Pjatk wot 18.30 hodź. wubědźuje so šěsć wohnjowych woborow, nazajtra, sobotu, wot 14 hodź. budźe dźěćacy swjedźeń.

Dynamocamp w Delanach

Koparska šula Dynama Drježdźany chce w oktoberskich prózdninach zaso camp w Ralbicach pola Sokoła Ralbicy/Hórki zarjadować. Wot 9. do 13. oktobra smědźa tam holcy a hólcy w starobje sydom do 14 lět kóždy dźeń pod nawodom profesionelnych nazwučowarjow tre­nować. Camp płaći 194 eurow, swójby z wjacorymi dźěćimi dóstanu dźesać procentow rabata. Dalše informacije pod www.dynamo-dresden.de

Beachvolleyball Satkule

Po tym zo je 4. beachvolleyballowa tura Radija Satkula w Róžeńće startowała, zastanje wona prěnju póndźelu julija w Konjecach. Tež tam zetkaja so mustwa zaso we 18 hodź., hry započnu so poł hodźiny pozdźišo. Dalše terminy:

10.7. 18.30 hodź. w Jaseńcy

17.7. 18.30 hodź. w Kulowcu

24.7. 18.30 hodź. w Pančicach

31.7. 18.30 hodź. w Radworju

7.8. 18.30 hodź. w Budyšinje

28.8. 18.30 hodź. w Miłoćicach

Wubědźowanja wobornikow

7.7.  19:00  w Róžeńće

30.7. 14:00  w Smjerdźacej

25.8. 18:30  we Wotrowje

Testowe koparske hry

SG Großnaundorf

– SJ Njebjelčicy 5:2 (3:1)

Zestawa hosći: Hahn – Hrjehor (59. Lejnart), Kral, Zeller, Pawlik, Šołta, Haška, Janca, Hoelzel, Hanuza, Korjeńk (63. Čornak)

Bjez wulkeho zapala a bjez trěbneje bojownosće pola načolnika a postupnika do wokrjesneje wyšeje ligi njeje móžno wobstać. Koparjam Njebjelčanskeje SJ bě drje wěste, zo maja pjate městno w kónčnej tabulce zaru­čene, přiwšěm chcychu so hišće raz prócować.

Domjacy cyłk trjechi do přestawki troje wrota. Dwoje z nich běštej daraj, dokelž škit hosći do toho raznje dosć zapřimnył njebě. W 44. min. bu Leopold Hoelzel wot Großnaundorfskeho wrotarja w šěsnatce njefairnje atakowany. Postajenu jědnatku Ronny Hanuza wěsće k 3:1 přetwori. Hižo w 50. min. zwyši hosćićel na 4:1. Pjate wrota padnychu dźesać mjeńšin pozdźišo. Hosćićelski najlěpši nadběhowar Maik Fließbach bě wuspěšny. Kónčny staw na 5:2 postaji w 83. min. Robert Lejnart. To běchu zdobom najrjeńše wrota dnja. Lejnart docpě je z połneho běha diagonalnje wysoko do lěweho kuta.

Sokoł Ralbicy/Hórki II

– Nadrózna Hrabowka 1:0 (1:0)

Zestawa domjacych: Měškank – M. Matka, T. Matka, Bogusz, Młynk, Jakubaš, Šěn, Čórlich, Serbin, Gerlich, J. Matka

Za wobaj cyłkaj bě hižo do koparskeje hry wšo zrjadowane: Nadrózna Hrabowka budźe tež přichodnu sezonu dale we wokrjesnej lize hrać, Sokoł Ralbicy/Hórki II zestupi. Přiwšěm stej sej wobaj kruće předewzałoj hrajnu dobu 2016/ 2017 z dobrym wukonom zakónčić.

Rjenje bě, zo wobkedźbowaše poslednju partiju delanskich koparjow tónraz tójšto přihladowarjow. Wopyt z čěskeho městačka Spálené Poříčí bě drje hodźinu do toho Ralbicy wopušćił, ale tójšto wjesnjanow wosta při sportnišću, zo bychu rezerwu Sokoła podpěrali. Ta měješe tež lěpši start a wuhra sej dobre šansy. Jurij Matka, Markus Serbin a Handrij Jakubaš pak je njewužiwachu. Tónle brach wšak bě so tež přez cyłu sezonu ćahnył. Hakle w 44. min. docpě Serbin po dobrej kombinaciji z Matku 1:0.

Po połčasu so hra wosłabi, Ralbičenjo pak snadny předskok derje zakitowachu. Jeničce po třoch róžkach za sobu so mócnje paleše, ale tež to Sokoljo bjez škody přetrachu.