Volleyballisća Serbskeho gymnazija Budyšin­ (SGB) steja w cyłkownym wo­krjesnym hódnoćenju šulow z pjeć prěnimi, dwěmaj druhimaj a jednym třećim městnom znowa na čole.

Stajnje wulkej hołk a tołk knježeštej w minjenymaj měsacomaj pjatk popoł­dnju na volleyballnišćach sportoweje hale Serbskeho šulskeho a zetkawanskeho centruma Budyšin. Šulerjo wjacorych lětnikow přihotowachu so na wokrjesne kónčne koła w bulosportowej družinje, kotrež wotměwaja so pod hesłom „Młodźina trenuje za olympiju“. Wukónc wurisanjow bě z wida SGB znowa zwjeselacy, wšako docpě samsny wurjadny wuslědk kaž minjene šulske lěto.

Ze štyrjomi hólčimi a ze samsnej ličbu holčich zastupnistwow startowaše Bu­dyski Serbski gymnazij w štyrjoch starobnych klasach a wobsadźi pjeć prě­nich, dwě druhej a jedne třeće městno.

VV Žitawa 09 II

– ST Marijina hwězda 0:3

(12:25, 17:25, 18:25)

Před horstku přihladowarjow su sej Pančičansko-Kukowske volleyballistki, Marijine hwězdźički, w Žitawje w jeno 56 mjeńšinach rjany adwentny dar wobradźili. W poslednjej hrě lěta su tam z koncentrowanym wukonom z 3:0 jasnje dobyli. Dominantne­ a chětro sebjewědome postupowanje hwězdźičkow je Žitawskim žonam zadźěwało so prawje do hry namakać.

Trenar Ralf Wachsmann bě ze swojimi chowančemi spokojom a so hižo na dalše hry z nimi wjeseli. Wón pak je jim jenož­ hišće wosom króć poboku, potom budźe kónc. Wachsmann bě so rozsudźił po sezonje­ 2016/2017 jako trenar přestać. Zrudna to powěsć za wšěch, a zdobom wužadanje za hwězdźički, nětko nowe­ho nazwučowarja/nowu nazwučowarku namakać­.

VV Žitawa 09 II – TSV Kundraćicy 0:3 (20:25, 23:25, 23:25)

Tež druha hra dnja bě poměrnje spěšnje nimo. Duel pak měješe wjace na­pjatosće w sebi, dokelž běchu sadźbowe wuslědki wo wjele snadniše. W druhej a třećej sadźbje mějachu holcy ze Žitawy samo móžnosć, partiju za sebje rozsudźić. Ale tomu tak njebě. Poslednja škrička nochcyše přeskočić.