Sport (20.11.15)
Hwězdźički we Wojerecach
Třeće volleyballowe mustwo Marijinych hwězdźičkow hraje njedźelu wot 11 hodź. we Wojerecach w VBH-arenje na Lieselotty Hermannowej 11 přećiwo MSV Budyšin III a SC Wojerecy.
Mikławšowy turněr
Chróšćanscy volleyballisća zarjaduja a wuhotuja póndźelu, 7. decembra, tradicionalny volleyballowy turněr, a to we wjacezaměrowej hali „Jednota“. Turněr započnje so we 18 hodź.
Silwesterski běh w Budyšinje
Sportowe towarstwo Čerwjeno-běli Budyšin ma dotal za Budyski silwesterski běh 22 přizjewjenjow. Mjez tutymi je tež něhdyši profitriatlet Maik Petzold. W stadionje Młynkec łuka změja tři distancy w poskitku. Wot dopołdnja w 9.30 hodź. je planowane, zo so běharki a běharjo na čarach 2,5 km/5,3 km a 10,6 km wubědźuja.
Dypkowe koparske hry
21.11. 13:30 Kulow – LSV Hory
21.11. 14:00 Kamjenc – BSG Chemija
21.11. 14:00 Budissa II – Biskopicy II
22.11. 13:30 Ralbicy/Hórki – Wachau
22.11. 13:30 Łuty – Chrósćicy
22.11. 13:30 Radwor – Wjernarjecy
22.11. 11:30 Ralbicy/Hórki II – FC Łužica
22.11. 13:30 Njebjelčicy – Mar. hwězda
Němska – Čěska 3:0
Nowa trenarka, nowe dresy a cile
Bitwa w błóće z přěhračku
ST Budestecy-Korzym/Šěrachow
– ST 1922 Radwor 3:1 (1:0)
Zestawa hosći: Wróbl – Sćapan, Buša, Henka, Winar, Šram, Zähr, Nuk, Bauer (84. Omram), Mark (90. Wünderlich), Schulze (73. Šěrak)
Wuměnjenja duela runjewon dobre njeběchu. W přědehrě so tak jara dešćowaše, zo trawnik hižo zeleny njeběše. Radworski trenar Pětr Bejmak bě swojich škitarjow wosebje před nadběhowarjomaj přećiwnika warnował. Henka kaž Sćapan měještaj swoju lubu nuzu z nimaj. Prěni dobry domjacy nadběh přez Schaafa a Jenera wjedźeše k 1:0 (10.). Sćapan so na křidle přećiwo Jenerej wobsuny, w pjećmetrowym rumje wothra tón bul k Schaafej, kiž jón jenož hišće přez liniju stłóči. Hosćo so do hry wojowachu a startowachu přeco zaso dobre a spěšne nadběhi. Jedyn tajki zhłójčkowa Winar na łatu. Tež třělwa Marka wrota jenož snadnje misny. Krótko do přestawki dóstachu hosćo hišće jědnatku. Schulze bul tak słabje třěli, zo wrotar lochce wotwobara. W přestawce Radworski trenar swojich chowancow pochwali, dokelž so hrajersce derje pokazowachu. Před wrotami pak žadaše sej wjac koncentracije.
W prózdnjeńcy lawow dobyli
OSC Lubij – Viktoria Worklecy 1:3 (25:23, 22:25, 14:25, 18:25)
Na tribunje Lubijskeje sportoweje hale je wulka módroběła chorhoj z napisom „Tu knježa lawy!“ připrawjena. Wuslědki zašłych lět wobkrućeja, zo je chětro ćežko sej w „prózdnjeńcy lawow“ dypki wubědźić. Bilanca mjez Worklecami a Lubijom je wurunana. Husto dyrbješe pjata sadźba duel rozsudźić. Sobotu pobrachowachu Worklečanam hnydom wobaj stajnaj wonkownaj nadběhowarjej. Jedyn měješe swójbnu přičinu, dalši je zranjeny. Na zbožo běše stary kapitan Clemens Eckert kónc tydźenja we Łužicy a wobsadźi jednu z wakantneju pozicijow ze wšej swojej rutinu a preciznosću. Dalšeho wonkowneho nadběhowarja zastupowaše Milan Budar z wulkej kuražu. A potom sedźeštaj na ławce hišće dalšej hrajerjej, kotrajž chcyštaj swoju šansu wužić.
Prěnja sadźba skićeše to, štož wobaj cyłkaj wuznamjenja. Dynamiske hraće, zasadźenje, mócne nadběhi a finesu. Hač do 22:22 njewobsteješe za žadyn z cyłkow lěpšiny. Hakle někotre njekoncentrowanosće na stronje hosći postarachu so wo mólički předskok 25:23 za hosćićela.
Crossowe běhi po horje Windberg
Skupina serbskich starterow prima wojowała
Pózdnju nazymu přewjeduja hižo wot lěta 1951 bjez přetorhnjenja woblubowane a ćežke wubědźowanje běharjow po horje Windberg na kromje Freitala. Tute wurisanje w přirodoškitnym pasmje při měšćanskej hranicy Drježdźan je jedne z najstaršich w cyłej Němskej. Hižo w druhej połojcy połstatych a spočatk šěsćdźesatych lět sym so ze swojimi sportowymi přećelemi, jako čłon Lipšćanskeju sportoweju klubow SC Rotacija a SC Lipsk a pozdźišo z Budyskimi běharjemi zjednoćenstwa Motor Budyšin, tam jara rady wubědźował.
Njezbožowna poražka
ST Marijina hwězda
– Arnsdorfske KT 0:2 (0:0)
Zestawa domjacych: O. Schmidt – Rab, Czapik (77. Škoda), T. Jurš, Lipič, Peschmann, Bělk, D. Jurš (66. Langer), P. Schmidt, Winkler, Pakoßnick
Wjedro bě chětro špatne a hrajnišćo jara hłuboke. Koparjo Marijineje hwězdy pohosćichu na tutym hrajnym dnju druheho tabulki z Arnsdorfa. Nuzowe kopanišćo Pančičanskich koparjow, lěpje prajene wulka łuža, pak njedowoli woběmaj cyłkomaj konstruktiwnu hru. Třělwu Křesćana Bělka móžeše Arnsdorfski wrotar wotwobarać a tež dalši pospyt domjaceho kapitana cil snadnje misny. Krótko do połčasa njewužištaj Paul Schmidt a Tomaš Jurš jasnej šansy.
Wuslědki (17.11.15)
Wokrjesna koparska liga, stafla III
Kamjenc II – Großröhrsdorf II 1:1 (1:1)
Ottendorf – Němske Pazlicy 5:2 (4:0)
Frankenthal – Drjewnica 6:1 (5:0)
Wóslink/Sk. – Großharthau 2:2 (1:2)
Marijina hwězda – Arnsdorf 0:2 (0:0)
1. Frankenthal 10 27 : 14 25
2. Arnsdorf 10 30 : 8 23
3. Ottendorf/Liegau 10 25 : 11 23
4. Großröhrsdorf II 10 17 : 10 18
5. Großnaundorf 10 32 : 16 16
6. Njebjelčicy 10 21 : 17 15
7. Hlinowc 8 20 : 12 14
8. Němske Pazlicy 10 14 : 16 14
9. Kamjenc II 10 12 : 22 13
10. Marijina hwězda 10 26 : 23 12
11. Haselbachtal 10 21 : 26 10
12. Sepicy 9 19 : 31 9
Šansy wužili a jasnje dobyli
SJ Chrósćicy
– ST Zeleno-běli Bukecy 5:0 (3:0)
Zestawa domjacych: Králíček - Pöpel (63. A. Dórnik), Šiman, Cyž, F. Dórnik, Dehn (79. Šołta), Runt, Schulze, Młynk, Žur, Šafar (63. J. Bogusz)
Ličba zranjenych hrajerjow pola Sportoweje jednotki Chrósćicy w minjenych tydźenjach stupaše. Po ćežkim zranjenju Feliksa Zahrodnika wupadnychu tež hišće Matti Bětnar, Radim Věchet, Clemens Šmit a Tomaš Domaška. Mustwo a harmonija w nim pak je sylna dosć, tute wupady zmištrować.
