ST 1922 Radwor bu wot sportoweho sudnistwa Zapadołužiskeho koparskeho zwjazka (WFV) hnydom dwójce pochłostane, dokelž njeje štwórte lěto pospochi trěbnu ličbu sudnikow stajiło. Město třoch ma Sportowe towarstwo 1922 Radwor tuchwilu jenož dweju sudnikow. Prěnjemu mustwu je sudnistwo 6 dypkow wotćahnyło, a towarstwo ma 500 eurow pokuty płaćić. Samsny wusud hrozy koparjam ST Marijineje hwězdy. Woni pak so chłostanju tuchwilu wobaraja.
Na teritoriju WFV je 14 sportowych towarstwow, kotrež nimaja trěbnu ličbu koparskich sudnikow. Jurij Bjeńš
Jako so Ernst Wendler 1922 po Prěnjej swětowej wójnje zaso do Wulkeje Dubrawy nawróći, je wón tež nowu sportowu družinu sobu do wsy přinjesł – pjasćobul. Z někotrymi přećelemi přewjedźe wón prěnje dypkowe hry pod režiju tamnišeho ćěłozwučowanskeho towarstwa a BSG Schomburg Wulka Dubrawa. Tam, hdźež steji dźensa firma za prasowanske graty, běše něhdy pjasćobulowe polo. Nowy domicil nańdźechu sportowcy pozdźišo na sportnišću při Wodowej wěži. W 60- a 70tych lětach swjećachu mužojo najwuspěšniši čas, jako hrajachu we wobwodnej lize, štož bě tehdy najwyša scyła.
Regionalna koparska liga
BFC Dynamo – Schönberg 4:1 (2:1)
Meuselwitz – Halberstadt 1:2 (0:0)
Nordhausen – RB Lipsk II 1:1 (1:0)
Budissa Budyšin – Zwickau 0:1 (0:1)
Rathenow – Babelsberg 03 0:2 (0:0)
Auerbach – Hertha BSC II 6:0 (3:0)
FC Viktoria – Jena2:1 (0:0)
čoło tabulki
1. Zwickau 20 43 : 13 46
2. Nordhausen 21 40 : 20 43
3. Berlinski AK 20 32 : 12 40
4. BFC Dynamo 20 45 : 31 38
Sokoł Ralbicy/Hórki – SC 1911 Großröhrsdorf 2:2 (0:1)
Zestawa domjacych: Gloxyn – M. Matka, B. Bjeńš, Schultz, Korjeńk, St. Bjeńš, Šołta, Bejmak (87. G. Kurjat), T. Bejma, B. Bejma, Domaška
Najebać sylny dešć bě twjerde hrajnišćo w Ralbicach wčera w dobrym stawje, tak zo móžachu domjacu hru koparjow Sokoła Ralbicy/Hórki přećiwo tabulkowemu susodej z Großröhrsdorfa zahwizdać. Přećiwo sylnemu kontrahentej móžachu Sokoljo w minjenych lětach jeno zrědka dypkować. Chcychu tuž na kóždy pad dobyć.
Spěšnje wšak bě spóznać, zo njebudźe to znowa lochki nadawk. Hósć měješe wjac hrajnych podźělow, sokołscy koparjo njenamakachu prawu hrajnu nitku. Špatne přihrawki, techniske zmylki kaž tež njetrjebawše foule běchu konsekwenca na stronje delanskeho hosćilela. Dwójce docpě tola raz akuratny bul Dirka Šołty na lěwym křidle Tomaša Bejmu. Dwójce pak so wón wopak rozsudźi. Jónu třěli jón přesłabje pódla wrotow, druhi króć mócnje wyše nich. Po zhubjenym a wotfalšowanym bulu w srjedźnym polu běžeše přećiwniski nadběhowar w 34. min. samlutki na wrota a Chrystofa Gloxyna k 0:1 mudrje přezběhny. Zastatk bě šok za Sokoł.
Zestawa hosći: Králíček – Schulze, Bětnar, Šafář, Dórnik, Kunze, Runt (85. Pöpel), Zahrodnik, Dehn, Domaška, Šmit (73. Młynk)
Při prawym „jendźelskim wjedrje“, njepřestajnym dešću, wubědźi sej prěnje koparske mustwo Chróšćanskeje SJ wčera, njedźelu, na twjerdym hrajnišću na Horach prěnje dobyće lěta 2016. Byrnjež dopołdniši hrajny čas runjewon optimalny njebył, wone swój nadawk pola druheho tabulki jara derje zmištrowa.
Prěnje poł hodźiny so ničo naspomnjenjahódne njesta. Hra wotměwaše so hłownje mjez šěsnatkomaj. Hakle krótko do połčasa Chróšćenjo ceptar přewzachu. Stajnje znowa spytachu so z dalokimi třělwami do strašneho pasma přećiwnika předrěć. Z jednej tajkej posłuži kapitan Tomaš Domaška młodeho Maksimiliana Zahrodnika, kiž bul wrotarjej zymnokrejnje mjez nohomaj do saka suny (38.). Kajke to wjeselo před „sćěnu“ swójskich fanow. Krótko na to Chróšćenjo zwyšichu. Po róžku zleća domjacemu škitarjej bul na ruku. Postajenu jědnatku Pavel Runt wěsće přetwori (42.). Z dobrym polstrom dźěše tuž do přestawki.
W mjezyfazy do prěnjeho lětušeho starta rjadneju lisćinow Drježdźanska wobwodna lisćina a Wopačanski cup běharjow 2016 su so wjacori entuziasća hišće na tajkich tradicionalnych wurisanjach wubědźowali, kaž su to silwesterskej běhaj w Budyšinje a Oberlichtenauwje a nowolětny běh we Wojerecach. Hač do spočatka nalěća přihotuja so běharjo nětko na nowu sezonu. Nimo intensiwneho treninga w přirodźe při najwšelakorišim wjedrje činja woni to po datych móžnosćach a wuměnjenjach tež na sněhakach abo smykačach. Bohužel njeběchu dotalne přihoty w sněze a na lodźe za wurunanje tajkeho treninga w našich kónčinach nimale scyła date. Štóž pak dyrbi w tejle ćežkej fazy za duch a ćěło ze swojeho intensiwneho treninga dźěle šmórnyć, dyrbi potom w poprawnej wubědźowanskej sezonje wosebje we wutrajnosći ze słabšimi wukonami ličić.
Krajna koparska liga
Taucha – FSV Zwickau II 0:1 (0:1)
Pirna-Copitz – Rapid Kamjenica 2:2 (1:0)
FC Grimma – Heidenau 2:0 (1:0)
Wocl Riesa – Reichenbach 3:1 (2:0)
BSC Freiberg – Kamjenc 0:3 (0:2)
FC Eilenburg – BSG Chemija 0:3 (0:1)
čoło tabulki:
1. Wocl Riesa 17 40 : 21 36
2. BSG Chemija 16 43 : 16 35
3. Kamjenc 17 31 : 9 34
Wokrjesna wyša liga
Połčnicy – Bukecy 1:4 (1:1)
Kulow – Póst Budyšin 4:1 (3:0)
Wachau – Kinspork 2:4 (1:2)
Hnašecy – Łuty 5:1 (2:0)
Ćisk – Rakecy 0:3 (0:2)
Hory – Chrósćicy 1:3 (0:2)
Ralbicy/Hórki – Großröhrsdorf 2:2 (0:1)
Wjelećin – Ramnow 2:3 (2:2)
1. Chrósćicy 20 47 : 16 49
2. Hory 20 53 : 15 42
3. Großröhrsdorf 20 56 : 31 39
4. Ralbicy/Hórki 20 42 : 20 35
5. Kumwałd 19 52 : 35 33
6. Rakecy 20 37 : 30 32
7. Ramnow 20 43 : 42 32
8. Hnašecy 20 44 : 28 30
9. Póst Budyšin 20 43 : 43 27
10. SJ Ćisk 20 42 : 44 26
11. Połčnicy 20 33 : 36 25
12. Kinspork 19 38 : 36 21
13. Kulow 19 30 : 32 19
14. Bukecy 19 22 : 50 14
15. Wjelećin 19 26 : 63 12
16. Wachau 20 30 : 68 12
17. Łuty 19 17 : 66 10
Wokrjesna liga stafla I
Hnašecy II – Mały Wjelkow 1:1 (0:1)
Wjazońca – Hodźij 0:0 (0:0)
HZ Budestecy – ST Budyšin 1:3 (1:1)
Wjernarjecy – Porchow 1:2 (0:1)
Malešecy – Wóspork 4:0 (2:0)
Wulka Dubrawa/Minakał
– Kubšicy 2:2 (2:0)
1. ST Budyšin 15 51 : 20 41
2. HZ Budestecy 16 50 : 33 30
3. Malešecy 14 43 : 22 28
4. Załom 15 43 : 21 27
5. Kubšicy 15 29 : 21 27
6. Radwor 15 35 : 17 24
7. Wóspork 16 24 : 34 24
8. Wjazońca 16 31 : 37 22
9. Porchow 16 37 : 48 19
10. Póst Budyšin II 15 33 : 38 18
11. Wu. Dubrawa/Minakał 16 29 : 31 16
12. Wjernarjecy 15 28 : 30 15
13. Hnašecy II 16 24 : 49 14
14. Hodźij 16 18 : 37 12
15. Mały Wjelkow 16 25 : 62 10
Turněr přestorčeny
Halowy koparski turněr starych knjezow Sokoła Ralbicy/Hórki w Ralbičanskej sportowni njehodźi so dźensa přewjesć, dokelž su turněrowy nawoda a sudnikaj kaž tež korčmar zadźěwani. Sokoljo chcedźa jón hakle pjatk, 4. měrca, wot 18 hodź. zarjadować.
Ryćer startuje w Dortmundźe
Serbja wokoło Dortmunda a dalši zajimcy móža 20. a 21. februara w Dortmundźe němske mišterstwa haloweje lochkoatletiki w starobnej klasy U 20 sćěhować. Ze staflu 4x200m startuje tam Šunowčan Marko Ryćer.
Hraja wo pokal CDU
Sobotu, 27. februara, přeprošeja politikarjo Marja Michałkowa kaž tež Frank Hirche a Alojs Mikławšk zhromadnje z Młodej uniju Budyšin na 7. koparski turněr za młodźinske mustwa. Tón budźe we Worklečanskej ćěłozwučowarni wot 10 do 16 hodź. Hrać budu z wrotarjom a třomi pólnymi hrajerjemi.
Koparske dypkowe hry
20.02. 14:00 Kulow – Póst Budyšin
20.02. 14:00 Ćisk – Rakecy
20.02. 14:00 Ottendorf – Mar. hwězda
21.02. 10:30 Hory – Chrósćicy
21.02. 12:00 Ralbicy II – N. Hrabowka
21.02. 13:30 Budissa Budyšin – Zwickau
21.02. 14:00 Ralbicy – Großröhrsdorf
21.02. 14:00 Radwor – Póst Budyšin II
21.02. 14:00 Njebjelčicy – Arnsdorf
Blidotenisowe dypkowe hry
18.02. 19:30 Póst Budyšin – Worklecy II
Tak prawje so wuslědki k połstatym narodninam koparskeho kluba Energije Choćebuz njehodźa. Přećiwo Fortunje Köln hrajachu Łužičenjo doma 0:0, z Osnabrücka wróćichu so ze samsnym wuslědkom a njedźelu podležachu doma samo 1:2 přećiwo Stuttgartskim kickeram. Jenož jubilejne swjedźenske zarjadowanje, kotrež wotmě so w Statnym dźiwadle Choćebuz, je tróšku měra a spokojnosće do zjednoćenstwa přinjesło. Jako wuběrneho bywšeho hrajerja w rjadach FC Energije wuznamjenichu tam Detlefa Irrganga, kotrehož wrota wjedźechu w meji 1997 k postupej do druheje ligi Němskeje. Tež Eduard Geyer bu za swój žiwjenski skutk wuznamjenjeny. Dźesać a poł lěta bě wón z Energiju po puću. Wusahowacy bě wězo postup do prěnjeje zwjazkoweje ligi w lěće 2000. Po tym hraješe Energija tři lěta w koncerće najlěpšich koparskich mustwow Němskeje. W oktobrje 2000 poradźi so jej legendarne dobyće 1:0 doma přećiwo FC Bayernej Mnichow, a tónle wuspěch přećiwo Bayeram w měrcu 2008 so hišće raz zešlachći. W dalšej dobje přisłušnosće k zwjazkowej koparskej lize wot lěta 2006 do 2009 přewinychu Choćebuženjo Bayerow z 2:0.