Dobre wuhlady?
Łobjo zaso wužiwajomne
Drježdźany (dpa/SN). Łódźe smědźa Łobjo w Sakskej wot přichodneje póndźele zaso bjez zadźěwkow wužiwać. Jězbna čara, kotruž su zawrěli, po tym zo je so před štyrjomi měsacami Carolinowy most sypnył, je zaso swobodna. „Hač do 17. februara pak dyrbja so łódźe za to přizjewić“, rjekny Karsten Wild Drježdźanskeho zarjada za wodowe dróhi a łódźnistwo. Po tym njeje přizjewjenje wjace trěbne. Łódźe smědźa pak kaž při ampli stajnje jenož do jedneho směra jězdźić.
Parniki Běłeje floty maja wuwzaćne rjadowanje. Předwčerawšim, štwórtk, je wulětniska łódź August sylny jako prěnja swojeho razu pod mostom jěła. Jej sćěhowachu štyri historiske parniki bjez pasažěrow. Wšitke łódźe běchu po puću do łódźnicy, zo bychu je tam na nowu sezonu přihotowali.
Zapadny dźěl Carolinoweho mosta bě so w nocy na 11. september 2024 njewočakowano na něhdźe sto metrow zwjezł a do Łobja padnył. Wot toho časa je tež zbywacy dźěl mosta zawrjeny a wobchad łódźow bě přetorhnjeny. To bě za susodnu Čěsku wulki problem, dokelž je Łobjo jenički zwisk po wodźe do Hamburga.
Tramwajce na pruwowanskej jězbje
To a tamne (30.01.25)
Runje sydom mjeńšin je trało – potom běchu tysacy zastupnych lisćikow za Eurovision Song Contest w meji w Baselu wupředate. Nawal zajimcow bě hoberski, jako předpředań wčera dopołdnja w 10 hodź. zahajichu. To zdźěli šwicarski rozhłós SRF jako zarjadowar wubědźowanja. Cyłkownje su 42 000 kartkow předali. Přistup mějachu jenož ći, kotřiž běchu so do toho registrowali.
Wurosćeny kenguru je muža w Awstralskej ćežko zranił. Zwěrjo nadběhowaše 50lětneho, jako so tón z domskeho k swojemu awtu poda. Kenguru do muža z pjasćemi biješe, kopaše a kusaše. Muž poćerpje chutne zranjenja na hrudźi a hłuboke rany kusnjenja dla na rukomaj, policija zdźěla. Kenguru bě dwaj metraj wulki. Nadpady tutych zwěrjatow w Awstralskej su jara rědke. Muske zwěrjata chileja druhdy k agresiwnosći.
Na surowe podawki njezabyć
Berlin (dpa/SN). Zwjazkowy sejm je dźensa swjatočnje na wopory nacionalsocializma wopominał. Přičina bě 80. róčnica wuswobodźenja koncentraciskeho lěhwa Auschwitz. Prezidentka zwjazkoweho sejma Bärbel Bas w swojej narěči napominaše, na surowe podawki tehdyšeho časa njezabyć a to přichodnym generacijam dale posrědkować. Podobnje zwuraznichu to zwjazkowy prezident Frank-Walter Steinmeier a Roman Schwarzman, přežiwjenc holocausta.
Němskich zastojnikow pósłać
Berlin (dpa/SN). Zwjazkowe knježerstwo hotuje so na zasadźenje němskich fachowcow za škit mjezow na pomjeznym přechodźe Rafah mjez Gazaskim pasmom a Egyptowskej. Kaž powěsćernja dpa z kruhow knježerstwa zhoni, chcedźa wobzamknjenje knježerstwa lěta 2005 tak změnić, zo je tež zasadźenje wobrónjenych policistow móžne. Po wobzamknjenju z lěta 2005 móžachu jenož njewobrónjenych zastojnikow pósłać. Tole je jim mjeztym přestrašne.
Kongo žada sej pomoc UNO
Přiměr mjez Israelom a Hamas w Gazaskim pasmje zmóžnja tež ...
Hospodarstwo bjez rozmacha
Zelenskyj: Wójsko ponowić
Zwjazkowy sejm rěči wo migraciji
Berlin (dpa/SN). W zwjazkowym sejmje wobjednawachu dźensa popołdnju dwě próstwje frakcije CDU/CSU, kotrejž měrještej so na migracisku politiku a a nutřkownu wěstotu. Nimo toho chcyše kancler Olaf Scholz (SPD) knježerstwowu deklaraciju wo smjertnym nadpadźe z nožom w Aschaffenburgu předstajić.
Naćisk frakcije unije, wo kotrymž chcedźa wosobinsce wothłosować, ma dotalnu migracisku politiku změnić a wěstotnym institucijam přidatne prawa přizwolić. Při tym wuradźuja mjez druhim wo wotpokazanju za azylom pytacych při mjezach kraja abo wo zajeću požadarjow azyla, kotryž njemóža wotsunyć.
Po tym, zo je z Afghanistana pochadźacy muž, kiž měješe Němsku poprawom dawno hižo wopušćić, minjeny tydźeń w Aschaffenburgu dźěćo a muža zakłół, steji politika migracije w srjedźišću wólbneho boja. Předsyda CDU Friedrich Merz bě sej na to nowe razne naprawy žadał. SPD a Zeleni jemu wumjetuja, zo móhła při wothłosowanju wjetšina z AfD nastać, štož nichtó njecha.
