Twarske nadawki přepodali
Nowa Wjeska (SN/MiP). We wjesnym towarstwowym domje w Nowej Wjesce su so srjedu Worklečanscy gmejnscy radźićeljo zešli. Hłowny dypk na posedźenju běše diskusija a wothłosowanje wo přepodaću wjacorych twarskich nadawkow w zwisku z přetwarom Worklečanskeje Serbskeje wyšeje šule „Michał Hórnik“. Nadawk za wohnjoškit a za zatwar lifta we wobjimje 176 000 eurow su radźićeljo Łazowskej firmje Swanenberg přepodali. Nadawk za instalowanje elektroniki z cyłkownym wobjimom 418 000 eurow dóstanje firma Gerold Zieschang z Němcow a nadawk za zatwar tepjenskeje, sanitarneje a přewětrjenskeje techniki z wobjimom 518 000 eurow dadźa firmje HSKG z Kamjenca.
Nimo toho informowaše zastupjer energijoweho předewzaća Sachsen Energie přitomnych wo móžnosćach nadróžneho wobswětlenja w gmejnje. Po tym předstaji wjesnjanosta Clemens Poldrack (njestronjan) nowu internetnu stronu gmejny, kotruž je Nowosličan Tomaš Kutter zhotowił. Design noweje strony je přehladniši a atraktiwniši a wopytowar nadeńdźe tam nětko rubriku ze zjimanjemi wjesnjanosty wo najnowšich podawkach w gmejnje.
To a tamne (27.06.25)
Z pokradnjenym dźěćacym kolesom chcyše muž w hornjej Frankskej dener zapłaćić. Njeznaty bě wobsedźerjej wobchoda w Marktredwitzu rjekł, zo drje pjenjezy nima, zo pak by jemu za dener koleso přewostajił. Předawarjej bě to podhladne, zazwoni policiju. Prjed hač zastojnicy dojědźechu, bě so njeznaty zminył. Policisća pak zwěsćichu, zo bě paduch sto eurow drohe koleso w měsće pokradnył. Policija pyta nětko za swědkami.
Šefowka drogoweho wotrjada policije w francoskim Marseillu je podhladna, zo njeje swoje winowatosće spjelniła, jako so 400 kilogramow kokaina ze składa policije zhubi. Tež přećiwo jeje zastupjerjej nětko přepytuja. Dalšeju policistow, kotrajž staj přećiwo drogowym cwólbam slědźiłoj, su zajeli. Njeje wuzamknjene, zo su wobdźěleni kriminelnym pomhali, kokain ze składa pokradnyć.
Sejm chce wjace wědy sposrědkować
Zapósłancy Serbskeho sejma su sobotu tydźenja w Choćebuzu wuradźowali
Po konstituowanju 2. Serbskeho sejma 12. apryla we Łazu su so zapósłancy w nowej konstelaciji prěni raz njedawno w Choćebuskim Měšćanskim domje zetkali. Nawoda posedźenja Tomaš Wornar wšitkich přitomnych postrowi, wosebje witajo zamołwitu za naležnosće Serbow Choćebuza Annu Kosacojc-Kozelowu, kotraž wyšeho měšćanostu Choćebuza Tobiasa Schicka zastupowaše. Tobias Schick wšak bě hosćićel posedźenja. Nažel so wobdźělić njemóžeše, město toho sposrědkowa sejmikarjam list, kiž bu na spočatku předčitany. W nim wobkrući, zo je Choćebuz jako najwjetša komuna w serbskim sydlenskim rumje w Braniborskej spušćomna partnerka Serbskeho sejma a zo chce zapósłancow podpěrać. To zdobom Anna Kosacojc-Kozelowa w swojich postrownych słowach podšmórny a na to skedźbni, zo bě wyši měšćanosta kaž hižo za wólby Serbskeje rady tež za wólby 2. Serbskeho sejma wabił.
Tomaš Wornar so w mjenje sejma za podpěru ze stron města podźakowa. Wón zwěsći, zo su z 15 přitomnymi zapósłancami wobzamknjenjakmani.
Palestinsku wjes nadpadnyli
Ramallah (dpa/SN). Při nadpadźe israelskich sydlerjow na palestinsku wjes w kraju zapadnje Jordana je k smjertnemu rozestajenju dóšło. Po informacijach palestinskeho strowotniskeho ministerstwa su wobrónjeni židowscy sydlerjo třoch Palestinjanow zatřělili. Nimo toho zapalichu woni awta palestinskich wobydlerjow. Palestinski wjesnjanosta rozprawja, so je so něhdźe sto israelskich sydlerjow do wsy zadobyło.
Prěni króć na wjeršku EU
Brüssel (dpa/SN). Zwjazkoweho kanclera Friedricha Merza (CDU) wočakowachu dźensa prěni króć na wjeršku EU w Brüsselu. Na zetkanju chcychu mjez druhim wo dalšej podpěrje na dobro Ukrainy a wo wuwiću na Bliskim wuchodźe rěčeć. Při tym wočakowachu diskusije wo dalewjedźenju partnerskeho zrěčenja EU a Israela. Pozadk je rozprawa wo postupowanju Israela w Gazaskim pasmje, kotraž dokumentuje ranjenje čłowjeskich prawow.
Tribunal přećiwo Ruskej
Nižozemska policija je wčera w Den Haagu skupinu demonstrantow ...
Dawkowe lěpšiny předewzaćam
Berlin (dpa/SN). Zwjazkowy sejm je dźensa paket naprawow zwjazkoweho knježerstwa CDU/CSU a SPD schwalił, z kotrymž chcedźa hospodarske połoženje Němskeje zasadnje polěpšić. Při tym dźe wosebje wo lěpšiny na dobro předewzaćow. Tak chcedźa firmy pohnuć, dale inwestować. Za to skića jim lěpše móžnosće wotpisowanja nowych mašinow a elektrojězdźidłow. Minjene dny bě so Zwjazk ze zwjazkowymi krajemi wo wurunanju za nastate straty dawkowych dochodow dojednał.
Tohorunja su podlěšenje mjezy podruže wobzamknyli, kotraž ma podružnikow lěpje před nadměrnymi zwyšenjemi podruže škitać. Tuchwilne rjadowanje ma dale hač do lěta 2029 wobstać.
Wjele mortwych při kupanju
Warnuja Merza před łamkom dowěry
Berlin (dpa/SN). Zwjazk wikowanskich předewzaćow kaž tež škitarjo přetrjebarjow su zwjazkoweho kanclera Friedricha Merza (CDU) warnowali, w zwisku z dawkom na milinu přilubjenje koaliciskeho zrěčenja ranić. W zhromadnym lisće Merzej, kotryž powěsćerni dpa předleži, rěka, zo je připowědźenje financneho ministra Larsa Klingbeila, dawk jenož za produkowace zawody znižić, „fatalny signal“ a wulki łamk dowěry napřećo milionam wobydlerjow w Němskej.
CDU/CSU a SPD běchu w koaliciskim zrěčenju připowědźili, dawk na milinu za wšěch znižić a tak tež priwatnym domjacnosćam pod pažu přimnyć. Z toho drje nětko ničo wjace njebudźe. Zwjazkowe knježerstwo je wobzamknyło, zo poćahuje so zniženje dawka jenož na industriju, ratarstwo a lěsnistwo. Rěčnik Klingbeila pokaza na pjenježne wuskosće při planowanju zwjazkoweho etata.
Awtorojo lista na to skedźbnjeja, zo su kóšty za energiju mnohim domjacnosćam mjeztym wulke wužadanje, dokelž wudawki za wšědne žiwjenje wobmjezuja.
NATO so Trumpej přilišćiła
Politiski fachowc ma zapadnu wojersku aliancu po wjeršku za wosłabjenu
Köln (dpa/SN). Wjeršk NATO w Den Haagu njeje wjele wunjesł. Wo tym je politiski wědomostnik a wojerski fachowc Carlo Masala přeswědčeny. „To njebě žadyn wjeršk, wo kotrymž móhł čłowjek rjec, zo je NATO z njeho zesylnjena wušła“, rjekny Masala w rozmołwje z powěsćernju dpa w Kölnje. Ukraina njeje na wjeršku žanu rólu hrała a wohroženje ze stron Ruskeje njejsu jasnje dosć pomjenowali. NATO je tak samo kročel wróćo šła. „Widźu NATO wokomiknje w jara prekernym połoženju.“
Kral je derje spinkał
Wulke wolóženje – to je wšo wobknježace začuće po wjerškowym zetkanju NATO w Den Haagu a wosebje po wotlěće prezidenta USA Donalda Trumpa do domizny. Žadyn skandal, žane wumjetowanja a žane fatalne sceny. Bohudźak, wšitko je derje wotběžało.
Nižozemscy hosćićeljo su wšitko činili, zo by so zapleńčenemu wysokemu hosćej z Ameriki derje šło. Trump je w kralowskim palasće přenocował a nižozemska kralowna jeho wosobinsce po Rotterdamje wodźeše. Při snědani bě wažne zwěsćić, hač je wón tež woprawdźe derje spał. Generalny sekretar NATO Mark Rutte wustupowaše kaž słužownik Trumpa. Čłonojo aliancy pěknje wobzamknychu, štož bě sej Trump přał: Hišće wjac pjenjez za brónjenje. Hłowna wěc, zo sej z nim njerozkidaja a zo wón Europu dale škita. Sym wćipny, kak dołho tute spodźiwne zwjazkarstwo dźerži. Jeli so jeho majestosć jutře při snědani zasrěbnje, móhło wšitko zaso hinak być. Marko Wjeńka
