Nowa namóc
To a tamne (04.06.15)
Z transparentami, demonstracijemi a internetnymi akcijemi so wobydlerjo starownje w bayerskim Forchheimje hrožacemu spotorhanju swojeho domu wobaraja. Město bě wukazało twarjenje wotstronić, dokelž su stwy přemałe. Přetwar njeje ze statiskich přičin hižo móžny. Nastać ma nowotwar z apartementami. Wobydlerjo hladarnje so boja, zo zhubja swoju zhromadnosć, socialne kontakty a dotal zwučenu wokolinu.
Hdyž maš awto bjez přizjewjenja a zawěsćenja, čisłowe taflički kradnjene, wodźiš jězdźidło bjez dowolnosće, za to chětro natutkany – to napadnješ. 34lětny pak tarnowaše swój transporter z módrej swěcu na třěše a poda so na awtodróhu. Přiwšěm mějachu nimojěducy policisća podhlad, zo njesedźi za wodźidłom awta kolega a zadźeržachu je. Šoferej hrozy nětko chłostanske jednanje.
Łužica (04.06.15)
Kontaktna bursa přeproša
Choćebuz (SN/ch). Studenća, absolwenća kaž tež šulerjo su přichodnu srjedu, 10. junija, na campus Braniborskeje techniskeje uniwersity (BTU) w Złym Komorowje přeprošeni. Pod patronatom ministerki za wědomosć, slědźenje a kulturu Kraja Braniborskeje prof. dr. Sabiny Kunst wotměwacu so firmowu kontaktnu a personalnu bursu wotewrje kancler BTU Choćebuz-Zły Komorow Wolfgang Schröder. Cyłkownje 55 wustajerjow nimale wšitkich regionalnych a po cyłym swěće agěrowacych branšow poskići na 14. wikach wulku paletu informacijow. Tak chcedźa zajimcam wuměnjenja přistajenja w firmach zbližić, a woni smědźa so hnydom na městnje požadać.
Program za młodostnych
Z wotmołwu Gabriela njespokojom
Slepo (AK/SN). Zwjazkowy minister za hospodarstwo a energiju Sigmar Gabriel (SPD) njewidźi za gmejnje Slepo a Trjebin potrjebu jednanja. „Na naše přeprošenje so wón ani poćahował njeje, runje tak nic na nowe zakładne zrěčenje, na socialnje znjesliwe přesydlenje, na zawěsćenje našeju gmejnow a na dalše žiwjenske planowanje našich wobydlerjow“, podšmórny Slepjanski wjesnjanosta Reinhard Bork (CDU) na wčerawšim posedźenju gmejnskeje rady. Wón předčita wotmołwu hospodarskeho ministra na list wobeju gmejnow ze 16. apryla do Berlina.
W swojim spisu skedźbnja Sigmar Gabriel na wobzamknjenje zwjazkoweho knježerstwa 3. decembra. W nim dźe wo to, hač do 2020 kóžde lěto 22 mio. tonow wuhlikoweho dioksida zalutować. „Porno tomu bu loni dohromady 349 milionow tonow CO2 do powětra pušćene“, Gabriel pisa, „z toho njeje žane wohroženje brunicowych milinarnjow wučitajomne.“
Zadwělowani čakaja tući přiwuzni w běrowje chinskeho ...
Wotstupa Blattera dla wolóženi
Přećiwny wjeršk G 7 zahajeny
Athen na židźanej nitce
Grjekski premier Tsipras jedna w Brüsselu wo pućach z hłubokeje krizy
Athen/Brüssel (dpa/SN/K). Woda zadołženosće steji Grjekskej hač do šije. Zo ju njeby zadusyła, rěči grjekski ministerski prezident Alexis Tsipras w belgiskej stolicy dźensa wo tym, kak nadeńć puće z financneje krizy. Předewšěm jedna wón wo palacej naležnosći z prezidentom komisije Europskeje unije Jeanom-Claudeom Junckerom.
„Dźe wo wšitko“, titluje Athenska bulwarna nowina Ethnos prekernu situaciju. Wjele časa hižo njezbywa, móšeń je prózdna. Bjez dalšeje pjenježneje podpěry móhła Grjekska za někotre dny zbankrotować. W juniju samym dyrbi Athen nimale 1,6 miliardow eurow Mjezynarodnemu měnowemu fondsej (IWF) wróćić.
To a tamne (03.06.15)
Kolesowarja na awtodróze zadźeržała je policija pola Nossena. Z Bołharskeje pochadźacy muž bě jězdnju wotlěwa doprawa přeprěčił. Při tym šmórny so jeho awto. Najebać to 50lětny na kromje dale jědźeše. Policistam wón rozłoži, zo je na wulěće do Mnichowa. Kolesowar dyrbi so nětko strašneho zasahnjenja do wobchada dla zamołwić.
Lěta dołho bjez jězbneje dowolnosće, bjez přizjewjenja a zawěsćenja swojeho awta bě muž w Bayerskej po puću. Wón drje sej mysleše, zo wšo to njetrjeba, hdyž jenož jara pomału jězdźi. Policisća běchu jeho awto při spěšnosći 20 km/h zadźerželi, a wone njebě ani přizjewjene ani zawěsćene. Muž twjerdźeše, so stajnje tak pomału jězdźi a tuž žane papjery njetrjeba. Zastojnicy jeho powučichu: Jězbna dowolnosć hač do 6 km/h drje žana trěbna njeje, přizjewjenje a zawěsćenje jězdźidła pak přeco.
Łužica (03.06.15)
Za měsac zaso folklorna lawina
Choćebuz (dpa/SN/ch). Spočatk julija poćahnu zaso folklorne skupiny z cyłeho swěta po južnej Braniborskej. Na mjeztym 15. mjezynarodnu folklornu lawinu je so 300 rejwarjow a spěwarjow přizjewiło, zdźěli wčera wokrjes Sprjewja-Nysa. Zahajić chcedźa zarjadowanje 3. julija w Choćebuzu z paradu po nutřkownym měsće. Slěduja stacije w Baršću a Lubnjowje. Minjene lěta je stajnje něhdźe 3 000 wopytowarjow wjacednjowski rejwanski swjedźeń dožiwiło. Loni wobdźěli so wjace hač 400 spěwarjow a rejwarjow z krajow, kaž Ruskeje, Indoneskeje, Ukrainy a Čěskeje. Multikulturny festiwal podpěrujetej wokrjesaj Sprjewja-Nysa a Hornje Błóta-Łužica.
Profituja z darjenych pjenjez
