Starše mandźelstwo je agresiwity a nadpadow kóčki dla dyrbjało wohnjowu woboru zawołać. 67lětna žona a wosom lět starši mandźelski buštaj wot kóčki nadpadnjenaj a mjezmoči ćežko zranjenaj, tak zo dyrbještaj do chorownje. Po zawołanju policije nadeńdźechu zastojnicy kóčku w stwě zawrjenu. Bydlenje bě z kreju popryskane. Kóčku dowjezechu do zwěrjatownje. Čehodla bu tak agresiwna, je policiji njejasne.

Benedikt XVI. je Kolpingowemu skutkej w Kölnje swoje čerwjene črije darił. Emeritowany bamž reagowaše z tym na hromadźensku akciju katolskeho socialneho zwjazka. Kolpingowy skutk bě Kölnjanow namołwił, 15 000 porow čriji na dobro socialneho projekta přewostajić. Benediktowe črije pak su dale dali z certifikatom do muzeja w jeho ródnym domje we wsy Marktl w Hornjej Bayerskej.

Turistiski zwjazk přećahnył

Wojerecy/Zły Komorow (SN/ch). Turistiski zwjazk Łužiska jězorina je do Złeho Komorowa přećahnył. Twarjenje, w kotrymž bě zašłe lěta we Wojerecach zwjazk zaměstnjeny, ma noweho wobsedźerja, kotryž jón mjeztym na běrowowy a bydlenski dom přetwarja. Zwičnjenski centrum je nětko zaso w Małej galeriji při hrodowym parku w Złym Komorowje, wozjewi nowina Lausitzer Rundschau. W Braniborskej a Sakskej pak wostanu turistiske stejnišća, w kotrychž dóstawaju domjacy a dowolnicy informacije. Z Małeje galerije bě turistiski zwjazk před třomi lětami wućahnył. Wot toho časa steješe wona prózdna.

Gmejnscy radźićeljo wotstupili

75 lět bě Cotopaxi wotpočiwał. Do toho bě w prawidłownych wostawkach 6 000 metrow wysoki wulkan blisko ekuadorskeje stolicy Quito paru a lawu wot so dawał. Wjacore razy je w minjenych dnjach popjeł hač do pjeć kilometrow wysoko pluwał. W stolicy mějachu z napadanym popjełom lubu nuzu. Prěnje wjeski blisko wulkana su zarjady hižo ewakuowali. Foto: dpa/Jose Jacome

Brüssel (dpa/SN). Po wčerawšim přihłosowanju třećemu pomocnemu programej za Grjeksku ze stron Zwjazkoweho sejma móža nětko nowe miliardy w směrje na Athen běžeć. Wčera wječor su financni ministrojo eurokrajow 26 miliardow eurow k wupłaćenju připokazali. Połojca tychle pjenjez dźe ze składu Europskeho wuchowanskeho fondsa (ESM) direktnje do Athena. Dźesać miliardow k saněrowanju bankow přepokazaja na wosebite konto. Dalše tři miliardy wupłaća nazymu grjekskemu financnemu ministerstwu. Dźensa měješe Grjekska nimale 3,4 miliardy eurow Europskej centralnej bance wróćo płaćić. Nowy pomocny program wobsahuje financnu pomoc w cyłkownej wysokosći 86 miliardow eurow. Grjekski ministerski prezident Alexis Tsipras namjetuje, přichodnje tež Europski parlament při rozsudach za pomocne programy zapřijeć. Tale móžnosć wobsteji po płaćiwym prawje za kraje, kotrež maja problemy z financnej stabilitu.