Łužica (18.08.15)
Ćopłe jězory
Choćebuz (SN/ch). Temperatury wody w Choćebuskich kupanskich jězorach su tak wysoke kaž hižo pjeć lět nic. Tak leža hódnoty za Strobičanski kupanski jězor z 27,8, za Knorawski z 27,9 a za Módłejski z 28,3 stopnjemi wo tři do šěsć dźesatkami nad w juliju 2010 měrjenymi a w přichodnych pjeć lětach hižo njedocpětymi hódnotami. Jeničce Rogeński jězor bě z 27,4 stopnjemi wo cyły stopjeń chłódniši hač w juliju 2010, informowaše strowotniski dohladowar Mathias Eckert. We wšitkich kupanskich jězorach so nimo toho proby na bakterije črjewa přepytuja. Wuslědki maja hišće tutón tydźeń předležeć.
Mobilna poliwkowa kuchnja
Přećiwnicy brunicy su minjenu sobotu bager we wuhlowej jamje ...
Podhlad korupcije
Žana samba we Rio
Rio de Janeiro (dpa/SN). Nimale milion ludźi je sej při najwjetšich protestach minjenych měsacow žadał, zo prezidentka kraja Dilma Rousseff wotstupi. Pozadk su přehnate zrěčenja z twarskimi předewzaćemi, přez kotrež su aktualni politikarjo tójšto lěpšinow měli. Tele wobtykowanja stachu so hižo za čas předchadnika prezidentki. Nic jenož dźěłaćerska strona, ale tež prezident sejma a nawoda najwažnišeho koaliciskeho partnera knježaceje strony prezidentki su do skandala zawite.
Mnohich demonstrantow znjeměrni nimo korupciskeho skandala přiběraca inflacija w kraju, kotraž je w juliju staw dźesać procentow docpěła. Pod tym ćerpja mnozy Brazilčenjo, wosebje dźěławi. Spadnjene płaćizny surowiznow słabja k tomu hospodarstwo a konsum woteběra. Mnoho wobydlerjow ma strach wo dźěłowe městno.
Jasnje rěčeć
Berlin /Athen (dpa/SN). Zwjazkowa kanclerka Angela Merkel (CDU) je krute postupowanje w jednanjach z grjekskim financnym problemom a nastupajo dalše pomocy zakitowała. Wona je přeswědčena, zo je grjekske knježerstwo swoje nastajenje k rozrisanju hospodarskich a financnych ćežow kraja zasadnje změniło. „To je so stało dźakowano krutemu stejnišću wjele europskich krajow, ale tež financnemu ministrej Wolfgangej Schäubelej a zwjazkowemu knježerstwu.“
„Athen je dowidźał, zo jenož zaso na noze přińdźe, hdyž so tež woprawdźe reformy přesadźa a skutkuja. Je trjeba, dočakać, hač so započate dźěło w tej měrje pokročuje.“ Po měnjenju kanclerki Merkel kriza hižo předołho traje. Přiwšěm je wona za wolóženje dawkow. Wosebje pola danje widźi wona móžnosće, je na dobro Grjekskeje korigować. Grjekska ma dóstać třeći pomocny program, kotrehož ma so wona z reformamami a lutowanskimi naprawami hódna wopokazać.
Europa dyrbi jednać
Dźiwajo na to, zo bywa nawal ćěkancow dale a sylniši, žada sej němska kanclerka Angela Merkel (CDU) jednotne europske azylowe prawo. Situacija na grjekskich kupach je wosebje napjata.
Berlin (dpa/SN/K). „Přichodnje budźemy so najskerje bóle z prašenjom zaběrać dyrbjeć, kak z migrantami wobchadźeć, hač z Grjekskej abo ze stabilnosću eura“, rjekny wona wčera wječor w telewizijnym sćelaku ZDF. Trěbne su po jeje sudźenju zhromadne pohódnoćenja a jednotne azylowe standardy. Na cyłoeuropskej runinje měło so tohorunja postajić, što su tak mjenowane wěste pochadne kraje. Zwjazkowe knježerstwo bě loni nazymu Serbisku, Bosnisko-Hercogowinu a Makedonsku jako „wěste“ zastopnjowało. Zaměr je, próstwarjow wo azyl wot tam spěšnišo zaso wróćo pósłać.
Wójna a žadyn kónc
Wěsćiši kraj?
Sćěhi horcoty
Berlin (dpa/SN). Europske milinowe syće dźěłaja na kromje kapacity. Tež dokelž planowane trasy wot sewjera do juha pobrachuja liča fachowcy z kóštami hač do poł miliardy eurow jenož za lětuše nuzowe naprawy.
Tydźenje trajaca horcota postara so wo to, zo budu němscy přetrjebarjo miliny dyrbjeć wjacore miliony eurow přidatnje płaćić. Přičina je: wysoka produkcija miliny z fotowoltaikowych připrawow na sewjeru, wulki eksport ekomiliny do juhowuchodneje Europy a wosebite problemy w Pólskej, hdźež milina njedosaha. Dokelž to wšitko w sumje milinowe syće zatyka, dyrbjachu na sewjeru produkciju konwencionelnych milinarnjow čujomnje redukować. Jich wobhospodarjo dóstanu za to wotrunanje. Zapłaćić změja ju wšitcy, kiž milinu přetrjebaja. „Wudawamy w horcych dnjach wšědnje 2,5 milionow eurow za mjezy překročace naprawy pola našich susodow, zo bychu milinowe syće stabilne wostali“, wuzběhny jednaćel syćoweho hospodarja 50Hertz Dirk Biermann. „Dotal je horcota zawiniła kóšty we wysokosći 25 milionow eurow.“
To a tamne (17.08.15)
Napity 18lětny je so w durinskim Stadtrodźe direktnje na kolijach spać lehnył. Krótko do přijězda ćaha su jeho njedźelu rano wubudźili a jemu pomhali, spanske městno wopušćić, kaž policija zdźěli. Młody muž z Jeny je po nawróće z party w Erfurće prawe dwórnišćo zapasł a dale do Stadtroda jěł. Tam jeho na swój ćah čakaca žona wuhlada a policiju zawoła, kotraž pola njeho 0,6 promilow alkohola w kreji zwěsći.
Přechodźowar ze swojim psom je na grjekskej kupje Korfu zadźěwał ćeknjenju wjacorych jatych z jastwa. Psyk bě swojeho knjeza skedźbnił na zwuki pod powjerchom zemje. Muž je reagował a stražnikow informował. Woni namakachu po hnydom zahajenej kontroli zastup do tunla, kiž bě wjace hač 30 metrow dołhi. Jeći su pozdatnje wjacore měsacy na nim dźěłali, bjez wuspěcha.
