Wětošow (SN). Najebać wysoke temperatury pozasta nimale 130 wobdźělnikow kolesowanskeje tury „Tour de Natur“ wčera dopołdnja na Wětošowskim torhošću. Z hudźbu, kwisom a dźiwadłowej hru zwuraznichu swój protest přećiwo masowemu plahowanju skotu. Z krydu běchu na chódniku narysowali płoninu, kotruž swinjeću we wulkich kormjernjach přizwoleja. Wětošowska akcija je wuraz aktiwistow tury přećiwo znjewužiwanju „čujacych žiwochow“. Zdobom wuprajichu podpěru za ludowe požadanje přećiwo nadměrnemu plahowanju skotu, kotrež tuchwilu w Braniborskej přewjeduja. Konkretnje kritizowachu blisku Tarnojsku (Tornitz) kormjernju swini a žadachu sej wjace transparency.
Tour de Natur wotměwa so lětsa 25. raz. Hižo 26. julija su so aktiwisća na nimale 600 kilometrow dołhi puć podali. Dalšej wjerškaj budźetej zhromadnej akciji z wobdźělnikami łužiskeho klimoweho campa dźensa před sydłom koncerna Vattenfall w Choćebuzu a jutře před Janšojskej milinarnju. Po tym wróća so wobdźělnicy z ćahom zaso na wuchadźišćo tury do Braunschweiga.
Wšitke dróhi New Yorka přeběhał je William Helmreich. 69lětny profesor sociologije bě so před štyrjomi lětami na tróšku „kołwrótnu akciju“, zwažił, kaž medije rozprawjeja. Mjeztym je Helmreich wšitke 120 000 bydlenskich blokow w pjeć měšćanskich wobwodach wobešoł, štož je nimale 10 000 kilometrow. „Bych-li tehdy wědźał, kak napinace to budźe, njebych to nihdy činił“, Helmreich rozhłosownikam přeradźi.
Metalowy dźěl jeje nadrowca je turistku při hońtwjerskim njezbožu před ćežkim zranjenjom wuchował. 41lětna žona ze Sewjerorynsko-Westfalskeje bě ze swojim přewodźerjom z kolesom w Mecklenburgsko-Předpomorskej po puću, jako pola Gadebuscha naraz bolosće začuwaše. W metalowym dźělu nadrowca tčeše dźěl municije, kotraž pochadźeše z třělby hajnika. Policija pad přepytuje.
Přećiwo wulkogmejnam
Gubin (dpa/SN). Prezident Braniborskeho zwjazka městow a gmejnow, Podstupimski wyši měšćanosta Jann Jakobs (SPD), je před tym warnował, minimalnu ličbu wobydlerjow w gmejnach přichodnje na 10 000 postajić. Tak bychu we wjesnych kónčinach wulkogmejny z płoninu hač do 600 kwadratnych kilometrow nastali. To njeje zastupujomne, rjekny wón nowinarjam. „Trjebamy diferencowane postupowanje. Wokolina Berlina a dale zdalene kónčiny měli so rozdźělnje wobhladować“, sej Jakobs žada. Braniborske krajne knježerstwo hladajo na woteběrace wobydlerstwo wo tym rozmysluje, we wobłuku reformy ličbu wokrjesow wot dotal 14 na jenož hišće dźesać pomjeńšić. Zamołwići lubja sej zalutowanja na zarjadniskim polu.
Twarja stanowe sydlišćo
Rom/Drježdźany (dpa/SN/K). Njezbožo z powróćenej łódźu wčera před libyskimi přibrjohami je sej prawdźepodobnje wjele stow mortwych žadało. Łódźe italskeje přibrjóžneje straže a dalše wuchowanske jednotki pytaja wot wčerawšeho popołdnja za zhubjenymi ludźimi. Něhdźe 400 migrantow móžachu dotal wuchować. Kelko ćěkancow na znjezboženej łódźi woprawdźe bě, njejsu wšak hač donětka zwěsćić móhli. Pomocne organizacije tukaja na to, zo je jich znajmjeńša 600 było.