Awtor dźensa Clemens Šmit

Za něhdźe pjeć tydźenjow je tak daloko. Skónčnje! Potom zahaja so w pusćinowym staće Katar swětowe mišterstwa w kopańcy.

Zo so wo tutym sportowym wulko­podawku nic hakle nětko njediskutuje, absolutnje witam. Ćim mjenje mam ­zrozumjenje, hdyž něhdyši prezident Bayerow z Mnichowa za tute mišterstwa „politiku čini“, a to z dwělomnymi metodami.

Tak bě to před tydźenjomaj w tele­wizijnym wusyłanju „Doppelpass“. Uli Hoeneß bě so móhłrjec sam wot doma do wusyłanja přišaltował, twjerdźo při telefonje, zo so situacija ludźi w Katarje zhladujo na čłowječe prawa samo polěpši. Zo je situacija skerje nawopačna, wo tym su wjacore medije hižo roz­prawjeli. A jako wo wonym telefonaće přichodny dźeń čitach, sej jenož prajich: „Hoeneßo, ty sprawna duša!“

Tři koparske derbyje njedźelu

W Chrósćicach přewjedźe so njedźelu w 12.30 hodź. wokrjesny derby mjez koparskimaj rezerwomaj z Chrósćic a Rakec a połdra hodźiny pozdźišo dalši w Delanach. W Ralbicach nastupi we wokrjesnej wyšej lize mustwo Natwara Němske Pazlicy. Njedźelu w 15 hodź. dyrbja Pančičenjo potom poprawom do Hlinowca, derby pak wuhraje so w Halštrowje.

08.10.  13:00  Łaz/Běły Chołmc II –

  Ralbicy II/Njebjelčicy II

08.10.  13:00  ST Lubuš II –

  Radwor II

08.10.  14:00  FC Energija Choćebuz –

  Lok Lipsk

09.10.  10:30  LSV Hory – SJ Njebjelčicy

09.10.  12:30  SJ Chrósćicy II –

  Rakečanske ST II

09.10.  14:00  Sokoł Ralbicy/Hórki –

  Natwar Němske Pazlicy

09.10.  15:00  ST Hlinowc –

  ST Marijina hwězda

09.10.  15:00  SJ Chrósćicy –

  BSV 68 Sebnitz

09.10.  15:00  ST Radwor –

  Póst Germania Budyšin

Finale DDM w Baćonju

Pola Donatec w Baćonju změja na­runanske wubědźowanje dumperow ­za spočatk septembra wupadnjeny běh w Drjowku pola Choćebuza. Kwalifika­ciske běhi budu wot 11 do 12 hodź, hłowne běhi wot 14 hodź. a hnydom dwoje mytowanje wot 16.30 hodź. Dokelž je to pjaty a zdobom posledni ­lětuši běh, mytuja pola Donatec jutře ­nimo dnjowych tež cył­kownych dobyćerjow lětušeje motorsportoweje ­sezony.

Zhromadnje z wokrjesnym sportowym zwjazkom a z podpěru krajneho zarjada za šule a kubłanje (LaSuB) přewjedu nowiny Wochenkurier štwórtk, 13. oktobra, tak mjenowane swětowe mišterstwa w kopańcy. Narěčane buchu wšitke zakładne šule Budyskeho wokrjesa. Cyłkownje je so 20 kubłanišćow za tute wubědźowanje přizjewiło, kotrež wotměje so na Budyskej Młynkec łuce. Mjez wobdźělnikami stej tež serbskej zakładnej ­šuli z Radworja a Worklec. Radworčenjo zastupuja na turněrje Japansku a Wor­klečenjo reprezentuja Uruguay. Wobaj koparskej zwjazkaj wobdźělitaj so tež na woprawdźitych swětowych koparskich mišterstwach w Katarje. Dalše wobdźělnicy su mjez druhim šule z Budyšina, Wojerec, Rakec, Kamjenca a Radeberga. Zo bychu młodźi serbscy koparjo tež derje přihotowani byli, trenuja hižo pilnje. Štóž chce sej turněr wobhladać, móže sebi rady do Budyšina dojěć. Zakop budźe dopołdnja w 10 hodź. Po předkole sćěhuje wot někak 13 hodź. finalne koło. Dobyćerjej kiwa wobdźělenje na sakskim finalu w Lipsku.

Při njedawnym 12. Połčničanskim strowotniskim běhu su so sportowcy na distancach 0,8 km, 2 km, 5 km a 10 km wubědźili. Mjez běharjemi wojowachu lu­bowarjo walkinga na pjećkilometerskej čarje sobu. Atleća běchu hłownje ze Sakskeje a tež z Braniborskeje. Horstka ­serbskich lubowarjow běhanja je znowa startowała, mjez nimi wosebje tući, kotrymž so wjedrowe poměry dny do toho we Wopakej docyła spodobali njeběchu.

Start a cil wšitkich běhow běštej njepo­srědnje za kliniku Schwedenstein zapołoženej. Jednotliwe distancy běchu kołowe čary. Do startowych lisćin bě so 322 běharjow zapisało.

Na 0,8 km (58 w cilu) běštaj dobyćerjej Leo Wonneberger z Połčnicy (3:16 min) a Valentina Holdenhauer z Großröhrsdorfa (3:15 min). Wobaj startowaštej w starobnej klasy U10. Serbski šuler ­Lukaš Čórlich z Němcow přisłuša hišće U8 a wobsadźi wosme městno w tutej skupinje (4:09 min). W U10 běše jeho starši bratr Daniel Čórlich jako pjaty po 3:23 min. w cilu a Rosalie Berger z Budyšina docpě 9. městno z 3:59 min.