Krótkopowěsće (16.02.23)
Akciski dźeń pola Alstom
Budyšin. Dźěłarnistwo IG metal protestowaše dźensa z akciskim dnjom po cyłej Němskej přećiwo wottwarej dźěłowych městnow a zniženju mzdow na stejnišćach twornjow za ćahi. W přitomnosći Budyskeho zapósłanca w Sakskim krajnym sejmje, Marka Šimana (CDU), su zastupjerjo zawodneje rady a dźěłarnistwa w Budyšinje koncernej Alstom wumjetowali, „specialistow wućěrić“.
Infineon twari w Drježdźanach
Neubiberg. Po zdźělence chipoweho koncerna Infineon je předsydstwo předewzaća zhromadnje z dohladowanskimi gremijemi plany za wutwar swojeho Drježdźanskeho zawoda schwaliło. Do toho běše zwjazkowe hospodarske ministerstwo dočasny zazběh projekta přizwoliło. Start twarskich dźěłow budźe nazyma 2023. Z wutwarom nastanje něhdźe 1 000 nowych dźěłowych městnow.
Nowa fararka w Minakale
Krótkopowěsće (15.02.23)
Patronatne kemše TCM
Baćoń. Wěriwi měli swjateju Cyrila a Metoda wo zastupnistwo prosyć, zo njeby so wójna słowjanskeho kraja přećiwo druhemu słowjanskemu krajej hižo dale wjedła. K tomu pozbudźowaše farar Gabriš Nawka na patronatnych kemšach Towarstwa Cyrila a Metoda (TCM) wčera wječor w Baćonju. Městopředsyda TCM namołwješe, so bóle na diplomatiju złožować hač na to, z Němskeje brónje słać.
Bywše lěhwo jatych pomjeńšić?
Wojerecy. Wojerowski měšćanski muzej so z projektami prawidłownje wo politiske kubłanje prócuje. Tak přewjedu mnoho z tutych w něhdyšim lěhwje za francoskich a druhich wójnskich jatych w Elsterhorsće. Před dnjomaj startowaše francosko-němske towarstwo REVE peticiju na platformje change.org, zo njesmě so posledni eksistowacy skład tehdyšeho lěhwa wottorhać za powjetšenje krajneje šule wohnjowych wobornikow. Peticija je online na .
Procentaj za armeju zawěsćić
Krótkopowěsće (14.02.23)
Su za dualny studij wučerstwa
Neukirchen. Swobodni wolerjo (FW) w Sakskej žadaja sej dualny studij wučerstwa. „Chroniskeje potrjeby na wučerjach dla trjebamy nowe ideje,“ praji krajny šef FW Thomas Weidinger němskej powěsćerni w Drježdźanach. „Z dualnym studijom zwyšimy kwalitu wukubłanja, dokelž je teoretiski pedagogiski dźěl přez bliskosć k šulerjam wo wjele žiwiši za přichodnych wučerjow,“ wón doda.
Po škodach čaru zaso wotewrili
Žitawa. Po tym zo běchu paduši w lěće 2022 koporowe kable pokradnyli a woclowe hrjady wobškodźili, běše železniska čara mjez Hagenwerderom a Žitawu měsacy dołho zawrjena. Nětko ćahi zaso jězdźa – to zdźěli sćelak MDR na swojej powěsćowej stronje. Škoda płaćeše němsku železnicu štwórć miliona eurow. K lěpšemu škitej kolijow chce wona mjezy překročacy wěstotny koncept zawjesć.
Saněrowanje nasypa dokónčene
Krótkopowěsće (13.02.23)
Hłowna zhromadźizna „Meje“
Radwor. Na hłownej zhromadźiznje chóra „Meja“ su zašły tydźeń w Radworju lońšu dźěławosć z wuspěšnymi zarjadowanjemi w Hornjej Łužicy wuhódnoćili a so na lětuše wjerški kaž lěćny koncert při wosadnej cyrkwi a hodowny koncert w hosćencu „Meja“ dorozumili. Předsyda Daniel Henich móžeše nowe čłonki do chóra witać, kotryž bu w lěće 1895 załoženy a ma tuchwilu někak 30 čłonow.
Mjenje ptačkow wuhladali
Němska. Na tradicionelnym ličenju zymskich ptačkow přirodoškitneho towarstwa NABU je so po cyłej Němskej wjace hač 99.000 ludźi wobdźěliło, w Sakskej nimale 5.000. Přerěznje buchu něhdźe 35,9 ptačkow na zahrodu wuhladane. To je trochu mjenje hač lěto do toho. Přičina móhła miła zyma być. Prěnje tři městna wobsadźichu wrobl, sykorka a módrawka.
„Lützerath“ we Łužicy
Krótkopowěsće (10.02.23)
Wotstup po raznej diskusiji
Kamjenc. Maik Weise, předsyda frakcije CDU w měšćanskej radźe Kamjenca, je swoje zastojnstwo złožił. Wón rěči w swojim wopodstatnjenju wo „wosobinskich přičinach“ a starosći wo swoju swójbu. Weise steješe na demonstraciji blisko dwělomneho plakata, wot kotrehož je so pak distancował. Do toho su jeho facebook-komentar wo azylowej politice kritizowali.
Šćuwanje přećiwo Słowjencam
Celovec. Mjeztym zo FPÖ we wólbnym boju Korutanskeje z plakatom „wjac čłowjeskosće“ wabi, wojowaše jeje młodźina internetnje „přećiwo słowjenizaciji“. Tutu parolu su drje po wulkej rozhorjenosći w zjawnosći zaso šmórnyli. Ale Bernard Sadovnik, předsyda zhromadnosće Korutanskich Słowjencow, je pola statneho rěčnistwa wozjewjenje delikta našćuwanja luda zapodał.
Emu w Čěskej Šwicy
Krótkopowěsće (09.02.23)
Zwada wo domčki na štomach
Budyšin/Ottendorf-Okrilla. Krajnoradny zarjad Budyšin chce „bórze“ we Łužničanskej holi „kontrolu za přepruwowanje přewjesć“, hač su wobsadźerjo lěsa z protestnym campom přećiwo wudobywanju šćerka „jim nadate zawjazki spjelnili“. Po informacijach prawiznika aktiwistow wočakuja hamtski wopyt 15. februara. Woni so zawjazkej spjećuja, domčki na štomach wottwarić.
Druha uniwersita w Choćebuzu
Choćebuz. Město Choćebuz dóstanje po rešeršach „Lausitzer Rundschau“ druhu uniwersitu – wysoku šulu za wukubłanje medicinarjow. 2026/27 ma prěnje studijne lěto być. Dotalna komunalna Carla Thiemowa chorownja budźe z uniwersitnej kliniku. Wo naćisku wědomostneho ministerstwa za prěnje statne kubłanišćo za lěkarjow w Braniborskej chce knježerstwo w měrcu rozsudźić.
Češa pomhaja w Turkowskej
Krótkopowěsće (08.02.23)
Zakładna šula městno njeskutka
Drježdźany. Ličba prawicarsce motiwowanych chłostanskich skutkow na sakskich šulach je loni přiběrała. To wujewi wotmołwa kultusoweho ministerstwa na małe naprašowanje zapósłanče Kerstin Köditz (Lěwica). Po tym je policija w lěće 2022 dohromady 73 wotpowědnych padow registrowała, 2021 bě jich 53. Köditz ma za perfidne, zo bě w 13 padach zakładna šula městno njeskutka.
Přihot hłowneje zhromadźizny
Budyšin. Prezidij Domowiny prosy župy a čłonske towarstwa, swojich delegatow za hłownu zhromadźiznu hač do 26. februara pomjenować a mjena zarjadej sposrědkować. Čłonojo Domowiny měli namjety za wobzamknjenja hłowneje zhromadźizny hač do 1. apryla zapodać. Po tym so jenož z wopodstatnjenjom chwatnosće najpozdźišo na spočatku hłowneje zhromadźizny přiwozmu.
Premjerny wječork z Łušćanskim
Krótkopowěsće (07.02.23)
Chróšćanka politikarka ÖDP
Kamjenica. Ekologisko-demokratiska strona (ÖDP) je na swojim stronskim zjězdźe Serbam zhromadne dźěło při klětušich wólbach na komunalnej a krajnej runinje poskićiła a podpěruje wutworjenje ludoweho zastupnistwa Serbow. Chróšćanku Annu-Rosinu Wjeselinu su do krajneho předsydstwa wolili. Při wólbach do zwjazkoweho sejma 2021 je ÖDP w Sakskej 0,2 procentaj hłosow dóstała.
„Grammy“ za DJja z Drježdźan
Drježdźany/Los Angeles. Drježdźanski „DJ Purple Disco Machine“ Tino Piontek je wčera w nocy wažne myto w ramiku „Grammy Awards 2023“ žnjał. Woni su jeho w kategoriji „Best Remix Recording“ za remix titula „About Damn Time“ US-spěwarki Lizzo wuznamjenjeli. „Grammy Awards“ słušeja do najawažnišich mytow za hudźbu na swěće, kotrež su lětsa w 91 kategorijach spožčili.
Křesćan Baumgärtel njebohi
Krótkopowěsće (06.02.23)
Chedźa muzej saněrować
Wojerecy. Zarjadnistwo wokrjesa Budyšin planuje, w lěću wobšěrne saněrowanje Konrada Zusoweho kompjuteroweho muzeja ZCOM zahajić. Tuchwilu dźěła institucija pod nuzowymi postajenjemi. Dohromady chcedźa něhdźe sydom milionow eurow nałožować, kotrež přewostaja po wjetšinje Zwjazk z fondsa za zesylnjenje strukturow.
„Pomniki adoptować“
Drježdźany. Rjadownje, kursy a wuknjenske skupiny wšěch šulskich družin móža so wotnětka projektowe ideje nastupajo kulturne pomniki w Sakskej wo premiju zapodać. Kultusowe ministerstwo a krajny zarjad za pomnikoškit stej mjeztym 29. wubědźowanje krajneho programa „PEGASUS – šule adoptuja pomniki wupisałoj, požadanje je hač do 7. junija móžne.
„Bonnie a Clyde“ za Ukrainu
Praha. Čěska narodna banka je Ukrainje dwě pancerowanej jězdźidle, pomjenowanej „Bonnie“ a „Clyde“, dariła. Awće, wužiwanej za transport pjenjez, budźetej po přetwarje za transport ćežko ranjenych wojakow zasadźenej. Posrědkowar awtow je fonds „Darik za Putina“, kotryž w Čěskej pjenjezy na dobro wojowaceje Ukrainy hromadźi.
Krótkopowěsće (03.02.23)
Zelene wodźikowe hospodarstwo
Choćebuz. Energijowej předewzaći LEAG a HH2E stej w memorandumje wotpohlad wobkrućiłoj, zo chcetej zhromadnje za natwar regionalneho a nadregionalneho wodźikoweho hospodarstwa dźěłać. Kaž LEAG dźensa informuje, ma so to předewšěm w Sakskej, Saksko-Anhaltskej a Braniborskej w zwisku z planowanymi projektami wobeju předewzaćow na wšelakich polach jednanja stać.
Wopory wopominali
Luboraz. Składnostnje 78. róčnicy rozpušćenja bywšeho kaceta Luboraz su wčera mnohe wopory wopominali. Zastupjerjo politiki, gmejnow a towarstwow zeńdźechu so při wopomnišću, połožichu wěncy a spominachu na wosud zamordowanych. Prezidentka Krajneho sejma Braniborskeje Ulrike Liedtke (SPD) rjekny, zo „smy winowaći, njezabyć a wšo za to činić, zo z Němskeje ženje wjace tajke horjo njewuńdźe“.
Wotpokazuje, na znamkach być
