Wjelki tema w kabineće
Berlin. Po wjele diskusijach předpołoži zwjazkowe knježerstwo skónčnje naćisk wjelčeho zakonja. Tón je kabinet dźensa w Berlinje schwalił. Přichodnje budźe lóšo problematiske wjelki třěleć směć. Přiwšěm budźe stajnje hišće wotpowědna dowolnosć trěbna. Wowčerjo zakoń jara witaja. Wobswětoškitna organizacija BUND plany kritizuje.
Zhladuja na róčnicy
Podstupim/Choćebuz. Serbski zakoń Braniborskeje wobsteji 25 lět, pjeć lět skutkuje knježerstwowa społnomócnjena za naležnosće Serbow w susodnym zwjazkowym kraju. Přiležnosć to ministerstwu za wědomosć, slědźenje a kulturu wuhotować póndźelu, 27. meje, zarjadowanje z přeprošenymi hosćimi w Choćebuskim Delnjoserbskim gymnaziju, zo bychu na wobě róčnicy zhladowali.
Nihdy njezabyć
Bórze nowa terminowa protyka
Budyšin. Załožba za serbski lud je kooperaciske zrěčenje z firmu SAXO’Phon GmbH podpisała. Tak chce serbsku kulturnu protyku dalewuwić, kaž zdźěla. Předewzaće ma nazhonjenja z kalendrom dźenika Sächsische Zeitung a je tuž kompetentny partner za wuwiwanje protyki. Nastać ma nowa trojorěčna homepage za serbske terminy, kotraž ma wot septembra přistupna być.
Poslednja šansa podpisać
Drježdźany. Za podpismowu akciju „Zhromadne šule w Sakskej – dlěje zhromadnje wuknyć“ bu dotal 35 757 wobkrućenych podpismow zezběranych. Posledni dźeń, na kotrymž budźe po cyłej Sakskej składnosć tajke hromadźić, je Mjezynarodny dźeń dźěsća 1. junija. To zdźěli wčera Burkhard Naumann, koordinator mjenowaneje akcije.
Šupiznak město pandy
Koncert žněje dobry wothłós
Budyšin. Koncertny rjad Serbskeho ludoweho ansambla „Wobkuzłaca klasika“ žněje dobry wothłós. Wo tym informuje zamołwity za nowinske a zjawnostne dźěło Stefan Cuška. Sobotny druhi koncert rjadu w Hodźijskej cyrkwi je znowa tójšto zajimcow wopytało. Za kónc tydźenje připowědźi SLA specielne wudaće koncerta z hudźbu znatych filmow a musicalow w Bukecach a Budyšinje.
Swobodny stat spěchuje přetwar
Chwaćicy. Sakska spěchuje Chwačanske woltižěrowanske a jěchanske towarstwo z něhdźe 60 000 eurami. Pjenjezy nałoža tam za přetwar wjacefunkciskeho twarjenja, informuje zapósłanc Sakskeho krajneho sejma Marko Šiman (CDU) w nowinskej zdźělence. Chwačanske jěchanske towarstwo wukonja wot załoženja 1985 dobre dźěćace a młodźinske dźěło, Šiman podpěru wopodstatni.
Železniskej čarje wožiwić
Próstwa za wutwar A 4 zapodata
Drježdźany. Za šěsćčarowy wutwar awtodróhi A 4 mjez wotbóčkomaj Połčnica a Budyšin-wuchod je sakske wobchadne ministerstwo wčera próstwu Zwjazkej zapodało. Frakcija Zelenych w krajnym sejmje wobchadnemu ministrej Martinej Duligej (SPD) porokuje, zo „před lawinu nakładnych awtow na A 4 kapituluje“, město toho zo wužadanju njewotpowěduje, „klimje přichilenišu železnicu za nakładowy wobchad přichoda wukmanić“.
Wěstotnu centralu předstajili
Choćebuz. Město Choćebuz je wčera hižo dlěje planowany wěstotny centrum předstajiło. Tam stej policija a porjadowy zarjad zhromadnje městnosć za wobydlerjow zarjadowałoj. Wšědnje je tam něchtó k dispoziciji, kotrehož móža ludźo nastupajo wěstotu narěčeć. Rumnosće maja tohorunja jako zasadźenska centrala za wjetše zarjadowanja słužić.
Za lěpše busowe zwiski
Pokazaja tež serbsku drastu
Lubin. Na drastowym swjedźenju Němskeje kónc tydźenja w błótowskim Lubinje budźe tež serbska narodna drasta widźeć. Milena Stockowa z Choćebuskeje Lodki skedźbni napřećo powěsćerni dpa na wosebitosće w drasće jednotliwych wsow. Mnohe z nich budu w Lubinje zastupjene, hdźež wočakuja 2 500 nošerkow a nošerjow drasty z cyłe Němskeje.
„Wuchowajće pčołki!“
Brüssel. Europska komisija je wčera w Brüsselu Europsku wobydlersku iniciatiwu „Wuchowajće pčołki!“ registrowała. Organizatorojo komisiju namołwjeja „prawniske předpisy postajić, zo bychu žiwjenske rumy za překasancy jako indic intaktneho wobswěta zachowali a polěpšili“. Nětko je lěto chwile milion podpismow ze sydom krajow EU nazběrać, kotrež namjet podpěruja.
Informuja wo hladanju
Z 15 lětami z mopedom jězdźić
Berlin. Zwjazkowy kabinet je dźensa puć runał, zo smědźa młodostni hižo wot staroby 15 lět jězbnu dowolnosć za moped złožić. Zo móža kraje minimalnu starobu wot tuchwilu 16 na 15 lět trajnje znižić, dyrbja zakoń wo nadróžnym wobchadźe změnić. Modelowe testy, tež w Sakskej a Braniborskej, planuja hač do apryla 2020.
Rěča rěč wobydlerjow
Budyšin. Z certifikatom „Rěčimy rěč našich wobydlerjow“ je Budyski Klub wuchowarjow rěče krajnoradny zarjad wuznamjenił. Wosebje chwaleše sej wotpohlad, tež přichodnje runoprawosć splahow jako „woprawdźitu politisku naležnosć spěchować“. Předsyda Diethold Tietz je wopismo krajnemu radźe Michaelej Harigej (CDU) póndźelu na posedźenju wokrjesneho sejmika přepodał.
Zwěrjenc wuda swójski euro
Zelena swěca za běrow data
Budyšin. Za serwisowy běrow za komuny w serbskim sydlenskim rumje je Budyski wokrjesny sejmik wčera zelenu swěcu dał. Z jednym hłosawzdaćom su wokrjesni radźićeljo wobzamknyli, zo přewozmje Budyski wokrjes nadawk, zarjadować běrow, kotryž ma so hłownje wo přełožki starać. Srědki přewostaja Sakska we wobłuku serbskeho komunalneho programa.
Saněrowanje wjele dróše
Lubuš. Ponowjenje Lubušanskeho (Laubusch) kulturneho domu budźe dróše hač wobličene. Kaž wjacore regionalne medije informuja, je so suma z nimale 370 000 eurami potrojiła. Předewšěm wohnjoškit w domje maja minimalnym zakonskim žadanjam přiměrić. W Lubušanskim kulturnym domje běchu do a hišće po přewróće mnohe serbske předstajenja wotměli, kaž ptači kwas SLA.
Sulšečenjo sej dobyće zapisali
Tankownju na A 4 nadpadnyłoj
Budyšin. Na awtodróhowym zastanišću Hornja Łužica na A 4 blisko Słoneje Boršće bu něhdźe w 3.10 hodź. tankownja do směra na Zhorjelc nadpadnjena, kaž policija wozjewi. Jedyn skućićel bě předawarce tankownje z pistoli podobnym objektom wohrozył a žadaše sej pjenjezy. Žonje so na to schowaštej. Pokradnyłoj nadpadnikaj ničo njejstaj. Policija přepytuje nětko pospytaneho rubježneho wudrěwanja dla a pyta za swědkami.
Susanne Heinrich počesćena
Zgorzelec. Film „Melancholiska holca“ filmytwórče Susanny Heinrich dósta hłowne myto 16. nysoweho filmoweho festiwala w třikrajowym róžku. „Z humorom měri so režiserka ... na paradoksy našeho moderneho swěta“, rěka we wopodstatnjenju jury. Z 10 000 eurami dotěrowane hłowne myto je sakska ministerka za wuměłstwo Eva-Maria Stange (SPD) sobotu w Zgorzelecu přepodała.
Zahaja kónčne pruwowanja
Zhladuja kritisce na domiznu
Berlin. Hudźbna skupina Silbermond w swojim nowym spěwje „Mój wuchod“ kritisce na swoju domiznu zhladuje. W dźensa wozjewjenej akustikowej baladźe tematizuje skupina ze spěwarku Stefanie Kloß njepřećelske nadběhi na wukrajnikow a pačenje towaršnosće. „Škałby du přez swójby a škałba dźe tež přeze mnje. Wšako wěm: Ze srjedźnym porstom problem njerozrisamy“, w spěwje rěka.
Nastupny wopyt pola Serbow
Budyšin. Nowy nawoda Smochčanskeho Domu biskopa Bena Sebastian Kieslich chce nawjazać na dobre zhromadne dźěło swojeho předchadnika z Domowinu a jeho zarjadnišća jako spěchowanskeho čłona třěšneho zwjazka. To wobkrući Kieslich na wčerawšim nastupnym wopyće w Serbskim domje, hdźež je so z předsydu Dawidom Statnikom a jednaćelom Markom Kowarjom rozmołwjał.
Serbowce najlěpšej
Nowu zběrku předstajił
Drježdźany. Varnsdorfski basnik Milan Hrabal je předwčerawšim w Drježdźanskim měšćanskim muzeju swoju němsku zběrku basnjow „Wenn die Fische davonfliegen“ předstajił. Wona je njedawno w Ludwigsburgskim nakładnistwje Pop wušła. Hrabal čitaše swoju lyriku w čěšćinje. Přełožki Petera Gehrischa přednjese před něhdźe 25 připosłucharjemi Róža Domašcyna.
K zachowanju serbšćiny
Drježdźany. Sakscy Zeleni chcedźa, zo stanje so jich angažement za serbske naležnosće wočiwidniši. Tohodla budu jutře w Budyšinje serbske dźěłowe zjednoćenstwo załožić. Z nim wotpohladuja k zachowanju serbskeje rěče a kultury wšědny dźeń přinošować. Wosebje wažne jim je, zawěsćić serbsku syć pěstowarnjow a šulow kaž tež rozšěrić poskitk serbskorěčneje wučby za wšitke generacije.
Zhromadnje kemše swjećić