W spomnjeću na našeho přećela Paula Šnajdera

póndźela, 17. julija 2023 spisane wot:

Dóńt w Serbach jara woblubowaneho Paula Šnajdera, kiž je po krótkej ćežkej chorosći 19lětny zemrěł, jima wjele ludźi. Tule čitaće spomnjeće SJ Chrósćicy.

Testowa hra w Lubušu

póndźela, 17. julija 2023 spisane wot:

FC Energija Choćebuz –

Zaglebie Lubin 2:1 (2:1)

Energija Choćebuz, prěni połčas: Sebald – Slamar, Hildebrandt, Campulka, Milde, Borgmann, Putze, Hofmann, Hasse, Oesterhelweg, Thiele

Energija Choćebuz, druhi połčas: Sebald – Slamar, Hildebrandt, Campulka, Pelivan, Prokopenko, Kujović, Juckel, Halbauer, Euschen, Ndualu

Slěd wrotow: 1:0 Hildebrandt (9.), 2:0 Borgmann (15.), 2:1 Kruszelnicki (19.)

Z pólskim prěnim ligistom měješe FCE po wšelakich nižoklasowych přećiwnikach nětko woprawdźite měritko, přećiwo kotremuž docpě na zakładźe jara spodobneho prěnjeho połčasa w Lubušu (Hohenleipisch) zasłuženy wuspěch 2:1.

Hižo po jědnaće mjeńšinach trjechi Jonas Hildebrandt po flance Axela Borgmanana z hłowu. Krótko po tym namaka dalokotřělwa kapitana Borgmanna swój puć do wrotow. Jako FC Energija pjeć mjeńšinow na to prawje bjezstarostnje we wobaranju agěrowaše, přińdźechu Polacy k přizamknjenskim wrotam.

Widźał, słyšał, napisał (17.07.23)

póndźela, 17. julija 2023 spisane wot:
Awtor dźensa Křesćan Korjeńk

,,Što radosć rjeńšu dawa....“, hač měć prózdniny, dowol abo swobodne a směć činić, štož wjeselo čini. Haj, smy wosrjedź lěćnych prózdnin a tež sportowcy maja nimale wšitcy swój dowol abo přihotuja so hižo na nowu sezonu. Ći, kotřiž maja tróšku wjace fenki sebi přihot we wukraju popřeja, ći tamni wostanu doma abo znajmjeńša w bliskosći. Hłowna tema w kopańcy su tuchwilu jednanja, štó budźe w přichodźe w kotrym mustwje hrać, kelko budźe zasłužić a to najwažniše – kelko maš za noweho hrajerja płaćić abo kelko za předateho, snano tež jenož wupožčeneho, hrajerja dóstanješ. A to ći takle ličby wokoło wuši lětaja, wo statysacach eurow lědma hišće něchtó rěči, dźensa dźe jenož hišće wo miliony. A tam njeje žana hranica wjace data ... Koparjo su twora, z kotrejž so wikuje a dru­hdy maš zaćišć, zo so pomału wid na normalne pozhubi. W awgusće smy mudriši a dajmy so překwapić, w kotrym trikoće toho jednoho abo tamneho potom wuhladamy.

Sport (14.07.23)

pjatk, 14. julija 2023 spisane wot:

Zaso wšědnje wotewrjeny

Fanowy wobchod „Hokejowa liška Łužica“ w Běłej Wodźe je wot spočatk pražnika zaso wšědnje wotewrjeny. Tak hodźa so zaso k znatym wotewrjenskim časam fanowe a sportowe artikle kaž tež lodohokejowy ekwipment kupić. Při tym zahaja so rabatowe tydźenje, wobliča na WARRIOR drastu a ekwipment runje tak kaž na cyły sortiment HUMMEL 20 procentow rabata. Wot 20. julija započnje so předpředań za lisćiki k přihotowanskim hram.

Satkula-bičtura w Jaseńcy

Po zazběhowym bičwolejbulowym turněrje minjenu póndźelu z 15 mustwami we Worklecach budźe tura Radija Satkule póndźelu w Jaseńcy. Cyłki njech so hač do 17.30 hodź. přizjewja. Přichodne stacije:

24.07.  Njebjelčicy

31.07.  Kulow

07.08.  Konjecy

14.08.  Nuknica

21.08.  Pančicy-Kukow

28.08.  Miłoćicy / finale

Přihotowanske koparske hry

Zastupjer krajneje klasy stafla wuchod Rakečanske ST změje dźensa a jutře dwě přihotowanskej hrě zasobu. Prěnju hru w Rakecach sudźi serbska koparska sudnica Lea Krječmarjec. Testowa hra Chróšćanow přećiwo hrajnemu zjednoćenstwu Łaz/Běły Chołmc so njepřewjedźe.

15.07.  13:00 FSC Luckenwalde –

  FC Energija Choćebuz

Karjerju zakónčił

štwórtk, 13. julija 2023 spisane wot:
We wobłuku jubilejneho sportoweho swjedźenja w Ralbicach je Hórčan Beno Domaška (srjedźa) z 75 lětami hišće raz na hrajnišću stał a z cyłkom Zeleno-běłych Hórki přećiwo Sokołej Ralbicy/Hórki hrał. Do hry bu Domaška wot Klemensa Bětki (čisło 3) jako aktiwny hrajer rozžohnowany. Bětka zwurazni, zo měješe a ma Domaška wulke zasłužby wokoło serbskeje kopańcy. Foto: Markus Bruess

Energija ma noweho nadběhowarja

štwórtk, 13. julija 2023 spisane wot:

Z 21lětnym němsko-ukrainjanom Aleksanderom Prokopenkom je FC Energija Choćebuz dalšeho hrajerja za nowu sezonu regionalneje ligi zawjazała. Zašły tydźeń přizemi w Němskej rodźeny hrajer pola FCE, hdźež zetka z Dennisom Slamarom a Maksimilianom Oesterwegom stareju znateju z časa pola Carl Zeiss Jeny. „Aleks přinjese enormne tempo sobu, je technisce jara derje wukubłany a třěla z woběmaj nohomaj. To čini našu ofensiwnu hru wariabelnišu a da nam wjace móžnosćow. Wjeselimy so, zo je so za nas rozsudźił“ praji šeftrenar Claus-Dieter Wollitz. Dźensa w Hohenleipischu přećiwo pólskemu prěnjemu ligistej Zaglebie Lubinej budźe Prokopenko prěni raz zasadźeny.

Z tym je FC Energija Choćebuz w přihotach na přichodnu sezonu 2023/2024 swój šesty nowopřichad přez zrěčenje zdobyła. Claus-Dieter Wollitz praji: „Njeje žane potajnstwo, zo chcemy swój kadr wuwaženy nastajić pytajo za hrajerjemi, wo kotrychž smy přeswědčeni, zo naše mustwo dale wjedu a zdobom žadanja rjadowanja předpisow DFB spjelnjeja. Jeho kwality su nam hižo z časa pola FC Carl Zeiss Jena znate.“

Nowe trikoty za Sokołow

štwórtk, 13. julija 2023 spisane wot:
Prěnje koparske mustwo Sokoła Ralbicy/Hórki je njedźelu popołdnju prěni raz w nowych trikotach hrało. Zhromadnje z drastowej firmu Erima a Njebjelčanskim předewzaćelom Robertom Lejnartom su delanscy sportowcy trikot wuwili, kotryž ma načasne, ale tež historiske elementy. Hłowny premijumowy sponsor Sokołow Handrij Šuster, kotryž ma swoju elektrofirmu w Kamjencu, je nowu ekskluziwnu drastu zapłaćił. Prěni raz steji na chribjeće tež hesło Ralbičanskich koparjow „Štó, hdyž nic my!“. Foto: Jan Hrjehor

Chabłace wukony

srjeda, 12. julija 2023 spisane wot:

K hrajnej dobje 2022/2023 bě so nowe koparske hrajne zjednoćenstwo z druheho mustwa Sokoła Ralbicy/Hórki a z rezerwu SJ Njebjelčicy wutworiło. Wobaj cyłkaj samej njebyštej we wobłuku winowatostnych dypkowych hrow nastupić móhłoj.

Domjace hry prěnjeje połserije přewjedźechu so najprjedy w Ralbicach. Mjez sobu so namakać a zeznajomić běše wažny cil. Městno trenarja přewza nazhonity Beno Šram ze Smječkec. W prěnjej hry dobychu domjacy tež hnydom přećiwo hrajnemu zjednoćenstwu z Radworja a Wulkeje Dubrawy. K njedźelnišim hram stejachu tež přeco dosć hrajerjow k dispoziciji. Sobotu wupadaše to nažel hinak. Tak njenastupichu w Lubušu a dypki běchu preč. Sćěhowaše chłostanje. Wulke manko běše w prěnjej połseriji, zo woni přemało wrotow docpěchu. Na tamnym boku pak steješe škit dosć solidnje. Wrotowy poměr wučinješe 13:12. Z třomi dobyćemi, štyrjomi njerozsudnymi rezultatami a dwěmaj poražkomaj wotzamkny mustwo z 13 dypkami na dobrym pjatym městnje wot cyłkownje dźesać mustwow.

Bičwolejbulowa tura zahajena

srjeda, 12. julija 2023 spisane wot:
Prěnja stacija bičwolejbuloweje tury Radija Satkule běše póndźelu we Worklecach. 15 mustwow je so wobdźěliło. Na kóncu přesadźi so cyłk Sambuca Allstars z kapitanom Casparom Dźisławkom. Worklečanska młodźina je turněr wuhotowała a so wo něhdźe 300 wopytowarjow starała. Přichodna stacija je póndźelu w Jaseńcy, po tym ćehnje tura dale do Njebjelčic. Lětsa steji w hrajnym planje znowa sydom stacijow, wulke finale budźe potom 28. awgusta w Bobkec jěchanskej hali w Miłoćicach. Hłowny zamołwity ze stron Radija Satkule je lětsa Fabian Hejduška. Foto: Mia-Katarina Hrjehorjec

We wobłuku 100lětneho wobstaća su Sokoljo z Ralbic před něšto dnjemi hnydom štyri dorostowe koparske turněry přewjedli. Hižo pjatk, 30. junija, hrajachu na jednej połojcy hólcy młodźiny D Sokoła Ralbicy/Hórki přećiwo serbskej wubrance samsneje starobneje klasy. Wokrjesny mišter z Delan so w tutej hrě ze 4:2 přesadźi. To pak njebě jenički dorostowy sportowy podawk.

Runočasnje kopachu pjatk popołdnju na tamnym polu najmłódši koparjo do bula, tak mjenowane bambinije. Do Ralbic běštej dwě mustwje z Njebjelčic a jedne z Pančic-Kukowa přijěli. Sokołki a Sokoljo wutworichu tři domjace cyłki. W tak mjenowanym funino-modusu hrajachu potom stajnje třo přećiwo třom a to sydom mjeńšinow dołho. Potom hraješe kóždy přećiwo kóždemu a z tym běchu mali koparjo chětro hordźi na swójski wukon. Tuž sej wšitcy rjanu 100lětnu medalju zasłužichu, kotruž je Dawid Statnik, předsyda Domowiny, jako kmótr tutoho turněra wobstarał.

Wubědźowanje starobneje klasy młodźina E

Serbska debata

nowostki LND