Ličba ludow pčołkow w Sakskej woteběra – přičiny za to su wšelakore
Budyšin (SN/MiP). Dźensa je Mjezynarodny dźeń pčołkow. W Sakskej ma pčołarstwo wulku tradiciju, nic naposledk Hadama Bohuchwała Šěracha dla – serbskeho fararja a pućrubarja moderneho pčołarstwa, kotryž je w Budyšinku powołansce skutkował. Ličba pčołarjow je loni porno předlětu w Swobodnym staće wo 115 na dohromady 9 592 stupała. Po informaciji kasy za zwěrjeće mrětwy pak je ličba ludow pčołkow porno tomu woteběrała: W lěće 2024 běše w Sakskej dohromady 68 424 ludow registrowanych – wo 776 mjenje hač w lěće 2023.
Wojerecy (KD/SN). „Kultura Łužicy skići wjele wjace hač pomolowane jejka, drasty a nabožne nałožki. Kultura Łužicy wopřijima tohorunja ‚sex, drugs & Annemarie‘. Njehladajmy kazanja!“ Z tymile słowami zahaji Grit Lemke minjeny pjatk druhi raz wuhotowany festiwal Subsorb we Wojerowskej Kulturnej fabrice. Zaměr zarjadowanja je „pokazować modernu hudźbu a wuměłstwo zwonka klišejow“. Centralny element festiwala je hišće hač do spočatka julija přistupna wustajeńca „,,Wobrazy splećenych dušow!?“ z twórbami čłonkow kolektiwa Wakuum a w lěće 1974 załoženeje iniciatiwy Nowe serbske wuměłstwo. Kolaže, rysowanki a instalacije wuměłcow posrědkuja widy na domiznu. Narok Bernharda Schippera z Budyšina je, „serbsku modernu w tworjacym wuměłstwje wutworić“. Antje Senftleben z Radworja rozestaja so ze swojimi přinoškami wo „zhubjenej dwurěčnosći a přisłušacej kulturje“ a kritizowaše jako wučerka wuměłskeho kubłanja, zo „serbske wuměłstwo w šulach nic jenož we Łužicy lědma rólu hraje“. ...
SZ Großnaundorf –Sokoł Ralbicy/Hórki 3:3 (2:1)Zestawa hosći: Schöne – L. Heidorn (76. Mjechela), Wałda, B. Heidorn, Bejma, Gloxyn, Šnajder (80. Rawš), Šewc, Bejmak, Domaška, Hicka (64. Matka)Na próstwu hosćićela wotmě so hra hižo pjatk wječor a nic kaž zwučene njedźelu. Hladajo na wjedro běše to prawy rozsud.
Po tydźenje trajacej blokadźe ze stron Israela su wčera prěnje nakładne awta z nuznje trěbnymi žiwidłami Gazaske pasmo docpěli. Cyłkownje dźewjeć awtow smědźeše mjezu dospołnje zawrjeneho pasma přeprěčić. Pomocne organizacije rěča wo „kapce na horcy kamjeń“. Ludźo w pasmje mjeztym hłód tradaja. Połoženje je katastrofalne. Foto: dpa/Maya Alleruzzo
800. jubilej města Kamjenc su prošeni hosćo wčera ze swjatočnosću w klóšterskej cyrkwi swj. Hany woswjećili. Mjez druhim wobdźělichu so sakski ministerski prezident Michael Kretschmer (CDU, nalěwo), zapósłanc zwjazkoweho sejma Karsten Hilse (AfD), zapósłanča krajneho sejma Elaine Jenčec (CDU), předsyda Domowiny Dawid Statnik a krajny rada Budyskeho wokrjesa Udo Witschas (CDU). W swojej narěči wuzběhny Kamjenski wyši měšćanosta Roland Dantz (njestronjan, naprawo), zo město wosebitu městnosć dowěry a domizny skići. Michael Kretschmer wuži składnosć a je wyšemu Rolandej Dantzej wosobinsce k jubilejej gratulował. Wyši měšćanosta so jemu za słowa z darom dźakowaše. Foto: SN/Bojan Benić
Bratislava (dpa/SN). Stajnje zaso dochadźa w Słowakskej k tragiskim zražkam mjez ludźimi a brunymi mjedwjedźemi. Nětko zasadźuje kraj pod Wysokimi Tatrami wójsko, zo by při mjedwjedźowym managemenće pomhało. Knježerstwo w Bratislavje je zasadźenju 50 powołanskich wojakow hač do kónca oktobra přihłosowało. Woni maja pomhać, zwěrjata wuslědźić a wobkedźbować.Prěni króć běchu wojacy na ležownosći muzeja pod hołym njebjom w Pribylinje na sewjeru čłonskeho kraja EU zasadźeni, při čimž su mjedwjedźa morili. Jeho su z pomocu trutow a kamerow našli, kiž na prudy ćopłoty reaguja. „Technika wójska we wulkej měrje tomu přinošuje, mjedwjedźe wuslědźić a identifikować“, rjekny Filip Kuffa, statny sekretar we wobswětowym ministerstwje.
