Firma z jubilejom

pjatk, 08. septembera 2017 spisane wot:

Budyšin. Składnostnje 160lětneho wobstaća Budyskeje twarskeje firmy Hentschke změja tam jutře, sobotu, dźeń wotewrjenych duri. Wot 10 do 15 hodź. móža wopytowarjo na Zeppelinowej kranowy simulator pospytać, ze segwayjom jězdźić, sej twarsku techniku wobhladać, bager wodźić, so šminkować dać a wjele dalšeho. Wottam pojědźe shuttlebus do wotdźěla firmy při Wojerowskej dróze, hdźež betonowe dźěle zhotowjeja.

Na jězbu njezabyć

Pančicy-Kukow. Čłonojo Domowinskeje skupiny Pančicy-Kukow njech njezabudu na swoju skupinsku jězbu jutře, sobotu, do Lipska. Bus wotjědźe dypkownje w 7.30 hodź. wot busoweho zastanišća před šulu.

Wodźa po kapałce

štwórtk, 07. septembera 2017 spisane wot:

Worklecy. Do regionalneje parlički přeproša njedźelu, 10. septembra, składnostnje dnja wotewrjeneho pomnika. Jónkrótna Worklečanska kapałka Marije maćerje Božeje je jedna z mało cyrkwjow po cyłej Němskej, w kotrejž su mólby w formje Beuronskeho stila hač do dźensnišeho zdźeržane. Towarstwo Worklečanskeje kapałki chce zajimcow tón dźeń hodźinsce mjez 12 a 16 hodź. wodźić. Organizatorojo wjesela so na mnohich hosći a poskića jim tohorunja kofej a tykanc.

Ekskursija k wjelkam

Rěčicy. Na přednošk wo wjelkach přeproša kontaktny běrow „Wjelki w Sakskej“ jutře, pjatk, w 15.30 hodź. na Rěčičanski Erlichtec dwór. Z mnohimi wobrazami informuja tam wo žiwjenskim wašnju wjelkow a jich wuwiću. Přizamknje so ekskursija na slědy wjelkow, kotraž traje něhdźe hač do 18.30 hodź. Přednošk a ekskursija stej darmotnej.

Modla so kadiš

pjatk, 01. septembera 2017 spisane wot:

Budyšin. Mjeztym 23. raz přeproša Hans-Eberhard Kaulfürst njedźelu, 3. septembra, w 17 hodź. na Budyske židowske pohrjebnišćo při Mužakowskej dróze na modlenje kadiša. Wominać chcedźa tam zamordowanu Budysku židowsku wosadu. Mužojo njech njeza­budu na čapku.

Porěča wo hosćencu

Worklecy. Wšitkich, kotrymž leži přichod Worklečanskeho hosćenca „Ke kupowemu hatej“ na wutrobje, přeproša tamniše kupowe zjednoćenstwo póndźelu, 4. septembra, w 19 hodź. do mjenowaneho hosćenca. Zhromadnje chcedźa tam rozmyslować, kak ma z hosćencom dale hić a štó móhł jón přichodnje wjesć.

Klarineta a pišćele

Šěrachow. Koncert za pišćele a klarinetu zaklinči njedźelu, 3. septembra, w 16 hodź. w Šěrachowskej Michałskej cyrkwi. Tobias Witke (klarineta) a Emma Witke (pišćele) zanjesetaj twórby Marcella, Bartholdyja a Bédarda. Zastup je darmotny, zarjadowar prosy wo mały dar.

Swjedźeń k jubilejej

Mjenje městna na Třělnišću

srjeda, 30. awgusta 2017 spisane wot:

Budyšin. Dźeń Saksow wot 1. do 3. septembra w Lubiju wuskutkuje so hač do Budyšina. Tu budźe w tym času na Třělnišću mjenje parkowanskich městnow. Přičina je, zo zarjaduja tam busowy serwis, kotryž ma prošenych hosći ze sprjewineho města hač do Lubija dowjezć.

Na torhošću zaso twarja

Kamjenc. Po Kamjenskej Boršći nětko na torhošću Lessingoweho města dale twarja. Tam wěnuja so třećemu twarskemu wotrězkej direktnje před radnicu. Paralelnje k tomu přihotuja instalaciju nabiwanskich stacijow za elektroawta. Te chcedźa po wšěm zdaću za tři tydźenje před bywšim Asia-wobchodom a před Gartenec pjekarnju nastajić. Za čas twarskich dźěłow wostanu wobchody runje tak kaž radnica pěškam přistupne.

Informuja wo studiju

Budyšin. Powołanski informaciski centrum Budyskeje agentury za dźěło přeproša młodostnych na informaciske zarjadowanje jutře, štwórtk, w 16 hodź. Mišnjanska fachowa šula za zjawne zarjadnistwo předstaji tam studijne móžnosće w powšitkownym a socialnym zarjadni­stwje. Zajimcy njech přizjewja so pod telefonowym čisłom 03591/ 661 410.

Słowjanskosć w němčinje

pjatk, 25. awgusta 2017 spisane wot:

Budyšin. Klub wuchowarjow rěče přeproša na přednošk pod hesłom „Słowjanskosć w němskim słowoskładźe“. Referentka je Iris Adler ze Załomja, čłonka předsydstwa Němskeho zwjazka wučerjow rušćiny. Zarjadowanje wotměje so wutoru, 29. awgusta, w 19 hodź. w rumnosćach towarstwa Swětłownja Majak na Budyskej Nagelowej 1 (zachod naprawo pódla kubłanskeje agentury). Zastup je darmotny. Wot 18.30 hodź. budźe móžno sej towarstwowe rumnosće wobhladać.

Poskićeja kursy čěšćiny

Smjerdźaca. Wječorne kursy čěšćiny z maćernorěčnym čěšćinarjom poskići Rěčny centrum WITAJ wot 18. septembra stajnje póndźelu wot 17 do 18.30 hodź. w Smjerdźacej a wutoru w Budyšinje wot 16.30 do 18 hodź. za pokročenych a wot 18.30 do 20 hodź. za započatkarjow. Přizjewjenja přijimuja w RCW pod telefonowym čisłom 03591/ 550 400 abo emailnje pod .

Wopominaja zemrětych

srjeda, 23. awgusta 2017 spisane wot:

Kamjenc. W kapałce Kamjenskeje chorownje maltezow swj. Jana wotměje so srjedu, 30. awgusta, w 16.30 hodź. wopomnjenska nutrnosć za tych, kotřiž su wot meje hač dosrjedź awgusta 2017 w chorowni zemrěli. „Chcemy tam mjena zemrětych přednjesć a za kóždeho swěčku we wołtarnišću nastajić“, zdźěli dušepastyr chorownje Vincenc Böhmer. Wšitcy­ přiwuzni a znaći su přeprošeni, wšojedne kotreho wěrywuznaća su.

Na slědach njetopyrjow

Kamjenc. Swójbna ekskursija na slědach njetopyrjow započnje so zajutřišim, pjatk, w 19.30 hodź. při Kamjenskim Muzeju­ zapadneje Łužicy. Z kapsnej lampu a ultrazwukowym detektorom powjedźe Arndt Hochrein zajimcow k městnam, hdźež móžeš nócnych hońtwjerjow derje wobkedźbować. Wobdźělenje płaći štyri eura, potuńšene 2,50 eurow. Přizjewjenja přijimuje muzej pod telefonowym čisłom 03578/ 788 30.

Za jězbu so přizjewić

pjatk, 18. awgusta 2017 spisane wot:

Chrósćicy. Župa „Michał Hórnik“ přeproša swojich čłonow a dalšich zajimcow na kubłansku jězbu sobotu, 30. septembra, do Wrócławja. Na programje steja wo­dźenje po měsće, wopyt tachantskeje cyr­kwje a dalšich wosebitosćow města. Wotjězd je w 7 hodź. z Chrósćic. Swójski přinošk z wobjedom wučinja 25 eurow za dorosćenych a 15 eurow za dźěći. Přizjewjenja přijimuja hač do 20. septembra w regionalnym běrowje Domowiny w Chrósćicach pod telefonowym čisłom 035796/ 96 254 abo pod emailowej adresu .

Na dworowy swjedźeń

Dubrjenk. Šesty dworowy swjedźeń budźe njedźelu, 20. awgusta, w Dubrjenskim Krječmarjec hosćencu. Wot 11 hodź. změja tam wobjed a jězby z konjacym zapřahom po Dubrjenskim bahnje. W 14 hodź. započnje so wubědźo­wanje w kałanju wěnca, na čimž chce so ně­hdźe 15 jěcharjow wobdźělić. W 16 hodź. přizamknje so wubědźowanje konjacych zapřahow z něhdźe runje telko korejtami­. Wězo poskića popołdnju kofej a tykanc, dźěćom pak zabawu na ska­kanskim hrodźe a při paslenju. Wšitcy su do Dubrjenka přeprošeni.

Motorscy so zetkaja

Lisćiki za jubilej

pjatk, 11. awgusta 2017 spisane wot:

Chrósćicy. Serbska lajska dźiwadłowa skupina Chrósćicy swjeći lětsa swój 40lětny jubilej załoženja. Jubilejny swjedźeń wotměje so sobotu, 2. septembra, we 18 hodź. w Chróšćanskej „Jednoće“. Tam budźe premjera noweje dźiwa­dłoweje hry. Mjez hosćimi budźetej chór Lipa a skupina něhdyšich rejwarjow z Wudworja. K rejam zapiska kapała Logarhythmus.­ Zastupne lisćiki dóstanu zajimcy we wobchodźe časnikarja Jürgena Njeka w Chrósćicach.

Na wjesny swjedźeń

Róžant. Z natočenjom piwa a jednoeurowej party započnje so dźensa wječor Róžeńčanski wjesny swjedźeń. Jutře popołdnju změja zaběry za dźěći a beachvolleyballowy turněr, wječor slěduje black ice-party z hudźbu za młódšich a staršich. Njedźelu popołdnju swjedźeń z kofejom a tykancom wuklinči.

SKI budźe měsac zawrjena

pjatk, 04. awgusta 2017 spisane wot:

Budyšin (SN). Kupcy měli so na to nastajić, zo wostanje Budyska Serbska kulturna informacija wot 30. awgusta do 22. septembra zawrjena. Před wjace hač dźesać lětami běchu rumnosće posledni króć ponowili. Tež techniskich přičin dla je tuž načasu SKI modernizować.

Dalše wjelče šćenjata

Rěčicy (SN). Kónc julija Rěčičanski wjelči běrow wozjewi, zo su w dźewjeć dalšich sakskich wjelčich kónčinach „reprodukcije dopokazali“. Tak móžachu mjez druhim we łužiskej jězorinje, pola Niskeje a blisko Róžanta šćenjata fotografować.

Nowa software we VVO

Budyšin (SN). Kupcowski serwis wob­cha­dneho zwjazka Hornje Łobjo (VVO) wužiwa hižo poł lěta nowy program, zo by napra­šowanja, pokiwy, kritiki a pady garantije pasažěram lěpje wobdźěłać móhł. Po přewšo dobrych nazhonjenjach planuje VVO zhromadnje ze 14 předewzaćemi zwjazka, program dale rozšěrić.

Wopička so narodźiła

Połčas w sotrowni

štwórtk, 03. awgusta 2017 spisane wot:

Mały Wjelkow (SN). Přewšo raduja so ludźo, a to nic jeno z Hornjeje Łužicy, nad pisanym kulturnym lěćom w Małowjelkowskej sotrowni. „Třinaće derje wopytanych zarjadowanjow z hudźbu a reju smy hižo wotměli. Ze stilistiskej a wobsahowej mnohostronskosću zbudźichmy tójšto wjesela“, praji hłowny organizator Mike Salomon. Hač do 10. septembra planuja w Małym Wjelkowje hišće 15 zarjadowanjow.

Prěnju stwu sej wobhladać

Kamjenc (SN). W nowym Kamjenskim centrumje seniorow AZURIT z nutřkownymi dźěłami zaměrnje pokročuja. Dom chcedźa spočatk septembra wotewrěć. Zajimcy móža sej hižo prěnju mustrowu stwu wobhladać. Přichodnje chcedźa seniorow w hladanskim srjedźišću w 94 stwach z jednym a jědnaće z dwěmaj łožomaj­ zaměstnić. Dalokož móžno budu sej tež swójske meble sobu přiwjezć móc. Wšitkim ma so tam přijomne bydlenje w swójbnej atmosferje zmóžnić.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND