Najwažniši rozsud Wojerowskeje měšćanskeje rady na jeje wčerawšim posedźenju drje bě nowelěrowanje wobydlerskeho budgeta. Přichodnje maja so w tym wobłuku město mało wjetšich wjace mjeńšich projektow zwoprawdźić.
Wojerecy (AK/SN). Měšćanscy radźićeljo slědowachu namjetam dawkoweje skupiny a wobzamknychu nowe rjadowanje bjez napřećiwneho a ze wzdaćom jeničkeho hłosa. Nimo toho wobkrući rada přiměrjenje dotal płaćiweho wobydlerskeho budgeta nastupajo tak mjenowanu prioritnu lisćinu za lětuše projekty w nutřkownym měsće.
Incidenca snadnušce stupała
Budyšin. Incidenca po Roberta Kochowym instituće je dźensa w Budyskim wokrjesu 55,4 a w Zhorjelskim 47,1. Wobě hódnoće ležitej nad incidencu Sakskeje 45,3. Wokrjes Budyšin rozprawješe wčera wo 32 natyknjenjach z koronawirusom. Wot 330 schorjenych lěkuja tam dźewjeć w chorowni. Zhorjelski wokrjes rozprawješe wčera wo 42 infekcijach, 15 pacientow tam w klinice zastaruja.
Namjety za swětowe herbstwo
Drježdźany. Železniski cyhelowy móst přez dolinu rěki Göltzsch we Vogtlandskim wokrjesu a Mišnjanski pórclin chce Sakska jako nowej kandidataj za Swětowe kulturne herbstwo UNESCO konferency kulturnych ministrow přizjewić. Kabinet je tomu wčera přihłosował. Na kandidatnej lisćinje steja dale zahrodkowe město a ansambl festiwalneho domu w Hellerauwje kaž tež architekturny ansambl při Viji Regia w Zhorjelcu.
Hudźić w prózdninach
Ćiskowske kulturne towarstwo je zašłu sobotu na žnjowodźakny swjedźeń přeprosyło. Pod hesłom „Dawać, dźělić a dźakować so“ přiwabichu kreatiwne ideje mnohich zajimcow na Ćiskowski statok.
Ćisk (AK/SN). Wóń čerstweho chlěba stupa do nosa. Pjekar Nico Thäle je na žnjowodźaknym swjedźenju sobotu w Ćisku zhromadnje z Wolfgangom Fingerom nimale 70 originalnych Ćiskowskich chlěbow w drjewjanej pjecy napjekł. Łutowska pjekarnja Stefana Krause je za nje ćěsto spřihotowała. Nico Thäle rjekny: „Nam je wažne tradiciju pječenja chlěba dale dawać. Wona nima pozdźišo raz jeničce hišće w knihach stać.“
Pozdatneju zadobywarjow zajeli
Wojerecy. Njedźelu su zastojnicy policije we Wojerecach pozdatneju zadobywarjow zajeli. Młodaj Němcaj w starobje 24 a 32 lět běštaj wokoło połnocy z kolesom po měsće jěłoj. Při kontroli namakachu policisća předmjety, kiž buchu po wšěm zdaću samsny dźeń popołdnju při zadobywanju do bydlenja na Frederica Joliota Curiejowej pokradnjene. Mjez druhim běchu so tam laptop, tablet, debjenki a něhdźe 8 000 eurow zhubili. Při sebi měještaj mužej zdobom něhdźe dźesać gramow kristalinoweje substancy, po zdaću crystal, kaž tež. dalše pokradnjene wěcy.
Budyšin/Wojerecy (SN/MiR). Wulkej wokrjesnej měsće Budyšin a Wojerecy chcetej nastupajo strukturnu změnu wusko hromadźe dźěłać (SN informowachu). Za to stej nětko wyšej měšćanosće deklaraciju wotpohladow podpisałoj. Wosebje za nastaće wulkeho slědźenskeho centruma chcetej měsće sylny poskitk tworić, a to nastupajo stejnišćo objekta a zasydlenje jednotliwych zarjadnišćow a institucijow. Zahajena strukturna změna je nadawk do přichoda za cyły region. Łužica so za to wuznamnje spěchuje. Z tym ma wona zamołwitosć, strukturnu změnu jako šansu za swójsku transformaciju wužiwać. To potwjerdźištaj wyšej měšćanostaj Alexander Ahrens za Budyšin a Torsten Ruban-Zeh za Wojerecy (wobaj SPD). Hospodarske wuwiće regiona Łužica wotměwa so na zapado-wuchodnej liniji podłu awtodróhi A4 a železniskeje čary Drježdźany – Budyšin – Zhorjelc kaž tež na južno-sewjernej liniji Budyšin – Wojerecy – Choćebuz. Wobě měsće stej tuž relewantnej za hospodarske a dźěłowe wiki, wšako skićitej wotpowědnu infrastrukturu we wobłukach kubłanje, slědźenje a žiwjenska kwalita.
Incidenca zaso trochu niša
Budyšin. W Budyskim wokrjesu su wčera wo 74 natyknjenjach z koronawirusom rozprawjeli. Ličba wobjimuje zdobom pady wot kónca tydźenja. Incidenca tu je po Roberta Kochowym instituće dźensa z 54,5 trochu niša, a we wokrjesu Zhorjelc je 32,7. Tam informowachu wčera wo 20 infekcijach w minjenych třoch dnjach. Aktualna sydomdnjowska incidenca hospitalizacije w Sakskej je 0,96.
Nowy spěw wozjewili
Budyšin. Skupina Astronawt je sobotu nowy spěw z mjenom „Hory módre“ wozjewiła. Lil Handrij je rap za štučki napisał. Dohromady je na produkciji jědnaće hudźbnikow sobu skutkowało. Nimo toho wustupi skupina Astronawt sobotu w telewizijnej show „Das große Deutschland-Quiz“. Wusyłanje je w mediatece ZDF přistupne.
Za prózdne bydlenja pokućić?
Šepjerjate wotpadki so palili
Budyšin. Na Budyskej Alberta Einsteinowej je powołanska wohnjowa wobora wčera wječor woheń hašeć dyrbjała. Wokoło 20.30 hodź. počachu so tam z dotal njeznateje přičiny spěrawe wotpadki palić, kotrež ležachu pódla kontejnera za staru drastu. Pěšcy běchu woheń widźeli a nuzowe čisło wolili. Policija so nětko z naležnosću zaběra.