Policija (15.12.20)
Pjenjezy duplikaty byli
Wojerecy. Z witriny wotnožki pjenježneho instituta na Hrodowej we Wojerecach su njeznaći w nocy na minjenu njedźelu wustajene pjenjezy pokradnyli. Kaž policija zdźěli, pak jedna so wo duplikaty. Kelko jednotliwych pjenjez su skućićeljo sobu wzali, njeje hišće jasne.
Centralna biblioteka začinjena
Budyšin. Wot nowych škitnych naprawow, kotrež wot wčerawšeho w Sakskej płaća, su tež serbske institucije potrjechene. Kaž Serbski institut zdźěli, wostanje serbska centralna biblioteka hač do 10. januara 2021 začinjena.
Za wikowarjow a kupcow
Budyšin. Dokelž dyrbja drobnowikowarjo swoje wobchody zawrjene měć, skići jim město Budyšin móžnosć, aktualne poskitki internetnje pod www.bautzen.de předstajić. Tam móža wobchodnicy darmotnje informować, što móža kupcy online skazać a hač jim twory domoj přiwjezu.
Radźićeljo so schadźuja
Pančicy-Kukow. Přichodne posedźenje gmejnskeje rady Pančicy-Kukow wotměje so zajutřišim, štwórtk, w 19 hodź. w awli Šule Ćišinskeho. Na dnjowym porjedźe steji nimo twarskich naležnosćow wotzamknjenje zrěčenja wo planowanju a přizamknjenju noweje bydlenskeje štwórće z milinu.
Móža wuwiće posudźować
Hač do januara naprašuja so wobydlerjow města a wjesnych dźělow
Kulow (AK/SN). Wuwićowy koncept hač do lěta 2035 zdźěłuja tuchwilu za město Kulow a jeho jědnaće wjesnych dźělow. Kaž měšćanosta Markus Posch (CDU) zdźěli, z tymle konceptom lokalne problemy analyzuja a móžne naprawy města pomjenuja. Při tym město swojich wobydlerjow intensiwnje sobu zapřijima.
W Kulowje přewjeduja tuchwilu wobydlerske naprašowanje wo měšćanskim wuwiću. Hač do 11. januara móža wobydlerjo na internetnej stronje www.wittichenau.de wozjewjeny naprašnik z namjetami, pokiwami a kritikami wupjelnić a měšćanskemu zarjadnistwu připósłać.
Hodownu stawiznu w Róžeńće změja
Lětsa je wšitko trochu hinaše, tež wokoło hodownych swjatych dnjow. Koronakriza wšitkich nući kontakty miniměrować. Přiwšěm kroča mnozy zdźěla njewšědny puć, swoje předewzaća zwoprawdźić. Tež w Róžeńće su móžnosć namakali, zo njetrjebaja so lětsa hodowneje stawizny wzdać.
Róžant (SN/JaW). W Róžeńće kroča młode swójby njewšědne puće, zo bychu tež lětsa patoržicu hodownu stawiznu předstajili. Kaž zdźěli Diana Šołćina na naprašowanje našeho wječornika, su so „dźěći hižo w oktobrje prašeli, što lětsa z hodownej stawiznu budźe“. Jasne wšak bě, zo hru kaž minjene šěsć lět předstajić njemóža. Róžeńčanka chcyše tuž sceny tak spisać, zo w jednej jenož bratřa a sotry abo rjadowniske cyłki zhromadnje wustupja. Mjeztym je pak tež jasne, zo scyła live hrać njemóža. Zrodźichu tuž mysl, sceny natočić a film zdźěłać. Tak su zdobom njewotwisne wot toho, hač budźe patoržicu w Róžeńće nyšpor abo nic, film na kóždy pad pokazaja.
Karawana pinguinow zawjesela
Jemjel wosebje požadany
Krótkopowěsće (15.12.20)
Mjenje testow přewjedli
Budyšin. Z mjenje testami kónc tydźenja dla zwěsćichu w Budyskim wokrjesu wčera 42 dalšich koronanatyknjenjow. Ličba smjertnych padow je wo šěsć na 147 rozrostła. Z 2 829 schorjenych lěkuja 161 (-27) w klinikach. Zhorjelski wokrjes informowaše wčera wo sydom nowoinfekcijach a dalšich pjeć pacientach, kotřiž su w zwisku z koronu zemrěli.
Sputnik informuje wo Serbach
Lipsk. Młodźinski sćelak MDR Sputnik zetkawa we wusyłanju Popkult tónle tydźeń kóždy wječor „serbsku wosobu, kotraž je mjezynarodnje wuznamna“, kaž na internetnej stronje čitamy. Tydźeń wuhotuja hromadźe z redakciju Radija Satkula. Nimo interviewow připowědźa Sputnik přinoški, zaběrace so ze wšelakimi aspektami serbskeho žiwjenja.
Łužicu do domu přiwzać
Na digitalny koncert
Budyšin. Tradicionalny hodowny koncert Budyskeje wokrjesneje hudźbneje šule so lětsa digitalnje wotměje, a to pjatk, 18. decembra a 19 hodź. Zastup budźe móžny z laptopom, kompjuterom abo smartfonom pod www.kreismusikschule-bautzen.de. Přizjewjenje je tež anonymnje móžne. Mali a trochu wjetši šulerjo hudźa na najwšelakorišich instrumentach, tež ansamble so předstaja. Swójbne hudźenje změje na njewšědnym koncerće tohorunja swoje městno. Štóž chce šulerjam přikleskować, měł swoju webcam aktiwizować. Wobhladać móža sej zajimcy dospołny koncert tež hač do 6. januara na Youtube.
Zaměrowy zwjazk wuradźuje
Chrósćicy. Přichodna zjawna zhromadźizna zaměroweho zwjazka za wopłóčki Při Klóšterskej wodźe wotměje so jutře, wutoru, w 19 hodź. w Chróšćanskej „Jednoće“. Na dnjowym porjedźe steji mjez druhim diskusija wo klětušim hospodarskim planje zaměroweho zwjazka.
Křižer a serbska žona w nowym swěčkowym wobłuku
Němcy (aha/SN). W adwentnym času maja w Němcach, kotrež běchu 1998 do města Wojerec zagmejnowali, stajnje wulku, ze swěčkami pyšenu jědlu. To wobydlerjow a nimo jěducych na to dopomina, zo so hody bliža. Wjacore lěta su wjesny předstejićer Eugeniusz Diesterheft, předsyda wjesneho kluba Bernd Grofa a dalši wjesnjenjo wo někajkej swojoraznej adwentnej pyše rozmyslowali. Zo móhli swoje předstawy zwoprawdźić, pak trjebachu pjenjezy. Tuž bě we Wojerecach loni zarjadowany wobydlerski budget witany, tak zo móžachu nětko wšitcy wobydlerjo direktny wliw na wužiwanje tychle zjawnych srědkow wukonjeć.
Policija (14.12.20)
Za hody so zastarać chcyli
Budyšin. Jenož krótki čas móžachu so minjeny pjatk wječor štyrjo mužojo w Budyšinje nad swojej słódkej rubiznu wjeselić. Sobudźěłaćer kupnicy na Drježdźanskej dróze je policiju informował, zo su cuzy wjetše mnóstwo šokolody spakosćili a z awtom wotjěli. Dźakowano dobremu wopisanju skućićelow lepichu policisća štyrjoch muži w starobje 17, 18, 19 a 25 lět na wotpočnišću Hornja Łužica při awtodróze A 4. W jich wosobowym awće typa Daihatsu namakachu na to nimo šokolody tež kofej, płokanski próšk, palenc a drogerijowe wudźěłki w cyłkownej hódnoće něhdźe 1 200 eurow. Wšěch štyrjoch zastojnicy nachwilnje zajachu. Po wotzamknjenju policajskich naprawow jich zaso pušćichu. Kriminalna policija pad dale přepytuje.
