Brüssel (dpa/SN). Europska unija chce akciju k wuchowanju migrantow před pobrjohom Libyskeje najprjedy raz skónčić. Dokelž njemóža so čłonske kraje na nowy system k rozdźělowanju w morju wuchowanych ćěkancow dojednać, chcedźa aktiwity pašowarjow ludźi we wobłuku operacije Sophia nětko jenož hišće z powětra wobkedźbować.

Podlěšenje zasadźenja łódźow bě na spjećowanju Italskeje zwrěšćiło. Po nastupje noweho populistiskeho knježerstwa w Romje je so Italska na razny antimigraciski kurs podała. Wospjet běchu łódźe z wuchowanymi migrantami w Srjedźnym morju blokowali. Knježerstwo w Romje žada sej nowe prawidła zasadźenja, zo njebychu wuchowanych ćěkancow kaž dotal awtomatisce do Italskeje přiwjezli. Kraje kaž Madźarska abo Pólska pak so dale spjećuja, klučej rozdźělowanja ćěkancow přihłosować.

Wot zahajenja europskeje akcije lěta 2015 su nimale 50 000 migrantow wuchowali a do Italskeje přiwjezli, wjace hač 22 500 z łódźemi němskeje mariny.

Zjawne słyšenje w krajnym semje wo saksko-pólskich poćahach

Drježdźany (SN/MkWj). Jara wobšěrnje a šěroko su wčera w Sakskim krajnym sejmje wo saksko-pólskich poćahach debatowali. Při tym so wukopa, zo njeje dawno hišće wšitko w porjadku.

Na zjawne słyšenje přeprosył bě europski wuběrk sejma na próstwu frakcijow CDU a SPD. Při tym dźěše wo prašenje, kak mjezy přesahowace dźěło sylnić a dale wuwiwać. Cyłkownje jědnaće rěčnikow so k temje wupraji, mjez nimi wulkopósłanc Pólskeje w Němskej Andrzej­ Przyłębski a zastupnik delnjošleskeho wojewódstwa Krzysztof Bramorski. Mjez prošenymi bě tež bywši direktor Budyskeho Serbskeho instituta, polonist prof. Dietrich Šołta.

Tójšto dźěła su měli zamołwići Europ­skeho wuběrka Sakskeho krajneho sejma w přihotach na wčerawše zjawne słyšenje wo saksko-pólskich poćahach w Drjež­dźanach. Tak su samo wulkopósłanca Pólskeje w Němskej Andrzeja Przyłębskeho zdobyć móhli, zo by swój posudk podał. A tola je wčerawše zarjadowanje poka­zało, zo ma kóžda medalja dwě stronje. Na jednym boku takrjec oficialnu, politisku a na druhim woprawdźitosć na bazy. Tam wšak zwostanje tójšto dźěła najebać wšitke mjezy přesahowace programy a pro­jekty. Nimo toho so wčera zaso pokaza, kak wažny našim pólskim susodam že­lezniske zwiski mjez Němskej a Pólskej su. Sami hižo pilnje na tym dźěłaja, čaru ze Zgorzeleca do Wrocławja elektrifikować. Sakscy zapósłancy dyrbjachu sej kritiku lubić­ dać, zo njeje elektrifikacija čary mjez Drježdźanami a Zhorjelcom ani hišće do plana wobchadneho ministerstwa zapi­sana. Marko Wjeńka

Do wopačneho směra lećało je pasažěrske lětadło předewzaća British Airways po starće w Londonje. Město toho zo by so do Düsseldorfa podała přizemi mašina w šotiskim Edinburghu na sewjeru kraja. Hakle tam wobsadce zmylk napadny. Prawdźepodobnje běchu w Londonje wopačny plan hrabnyli. Kapitan so zamołwi a lětadło do Düsseldorfa wodźeše. Do toho bě so prašał, štó chcył tola hišće do Němskeje lećeć: Wšitcy so přizjewichu.

Prawy instinkt dopokazała je kóčka na Cypernskej, po tym zo bě z hłowu w blachowej tyzy tčacy wostała. W panice doběža woslepjene zwěrjo do policajskeje stacije w małej wsy Oroklini na juhu kupy. Tam jej zastojnicy pomhachu. Z wutrajnosću a z pomocu klěšćow móžachu zwěrjo z njepřijomneho połoženja wuswobodźić. Lědma swobodna, so kóčka hnydom zaso zminy.