To a tamne (18.03.19)
W awće na kromje dróhi dźěćo porodźiła je žona we wuchodnej Hessenskej. 28lětna bě wčera po puću do chorownje, jako dósta sylne hrona. Tak muž na kromje zwjazkoweje dróhi B 84 pola Hünfelda zasta. Policija wodźeše wobchad nimo awta, nuzowy lěkar při porodźe pomhaše. Mać a hólčk Feliks staj strowaj. Tež nan je wšitko derje přetrał.
W cuzym domje wusnyłoj staj sej wopitaj młodostnaj w saksko-anhaltskim Halberstadće. Na dompuću z party běštaj so zabłudźiłoj. Jedyn z njeju widźeše wotewrjene durje terasy a dźěše do ćopłeho bydlenja. Tamny sej na stólcu na zahrodźe wusny. Jako wobsedźer domu jeju wuhlada, zawoła policiju. Zastojnicy su 16lětneju na to domoj pósłali.
Knježerstwo ma přihłosować
Berlin (dpa/SN). Předsydstwo frakcije unije zwjazkoweho sejma je po britiskim wothłosowanju za přestorčenje wustupa z EU zwurazniło, zo měł britiski parlament na kóždy pad za dojednane zrěčenje hłosować. Wotum za přestorčenje pokazuje, zo chce knježerstwo Wulkeje Britaniskeje rjadowany brexit. Po woli premierministerki Theresy May njeměł kraj EU 29. měrca, ale hakle kónc junija wopušćić. Kaž zastupowaca předsydka frakcije CDU za europsku politiku Katja Leikert zwurazni, měło britiske knježerstwo dokładnje rozkłasć, za čo přidatny čas trjeba.
Přibrjohej hrozy katastrofa
Brest (dpa/SN). Woblubowanej turistiskej kónčinje na zapadźe Francoskeje hrozy katastrofa. Dwaj kilometraj dołhej wolijowej tepichaj bližitej so přibrjohej. Strach zanjerodźenja kónčiny wokoło města La Rochelle je wulki. Minjenu wutoru bě so pod italskej chorhoju jězdźaca łódź podnuriła, a z njeje bě wolij wuběžał. Nětko maja jón wosebite łódźe z morja wotklumpać. Wjedro pak wotstronjenje wolijoweje woršty chětro poćežuje.
Zhladuja kristisce na zakoń
Po cyłej Němskej su so dźensa šulerjo na swětowym akciskim dnju ...
Zetkaja so z Piwarzom
Budyšin (SN/JaW). Sakska Rada za serbske naležnosće je na swojim wčerawšim wuradźowanju w Budyšinje wupisanje wubědźowanja spěchowanskeho programa tak mjenowaneho „Sakskeho fondsa Čiń sobu“ rozjimała. Kaž předsydka serbskeje rady Marja Michałkowa na naprašowanje zdźěli, je wot dźensnišeho pod www.mitmachfonds.de přizjewjenska maska wozjewjena. „Jako serbska rada so nadźijamy, zo so prawje wjele serbskich jednotliwcow, skupin, towarstwow, komunow a dalšich cyłkow ze swojimi projektami wobdźěli. Wšako je to wubědźowanje, kotrež wunjese hnydom tež impulsy wšěm zajimcam. Tohodla namołwjam hišće raz wšitkich so wobdźělić“, Michałkowa rjekny. Dale je sakska serbska rada rozsudźiła nominować Marju Michałkowu do jury, kotraž wo spěchowanju projektow fondsa rozsudźa.
Přihotowali su wčera tež přichodne wuradźowanje serbskeje rady, kotrež budźe 20. měrca w Drježdźanach. Přeprosyli su sej sakskeho kultusoweho ministra Christiana Piwarza (CDU). „Rozjimać chcemy předewšěm kubłanske temy, kaž ewaluaciju wučby serbšćiny w Sakskej“, Marja Michałkowa podšmórny.
Surowy nadpad na dwě mošeji
Wellington/Christchurch (dpa/SN). Při teroristiskim nadpadźe na dwě mošeji w nowoseelandskim měsće Christchurch bu dźensa znajmjeńša 49 ludźi zatřělenych, 48 muslimskich wěriwych bu zranjenych a leži w chorownjach. To wobkrući premierministerka přewažnje křesćanskeho kraja Jacinda Ardern.
Policija je mjeztym štyri wosoby zajała, mjez nimi Awstralčana, kiž je po wšěm zdaću wšitko z kameru nahrawał. Dokładny wotběh atentata za čas pjatkowneho modlenja dotal jasny njeje.
Dokelž bojachu so dalšich nadpadow, su wšitke šule a zjawne twarjenja města najprjedy raz zawrjene. W młódšich stawiznach Nowoseelandskeje je dźensniši njeskutk jedyn z najhrózbnišich. Jenož mjeńšina ludnosće su muslimojo, kotřiž běchu z Pakistana a Bangladesha přišli.
To a tamne (15.03.19)
Mortwa myš je wulkozasadźenje wohnjoweje wobory w Mnichowskim arcybiskopstwje zawiniła. Přistajeni ordinariata běchu wo „ćahatej brunej maćiznje“ w listowej wobalce rozprawjeli. Jedna sobudźěłaćerka dyrbješe samo bluwać, jako list wočini. Tukajo na jěd wobornicy wšitkich potrjechenych dekontaminowachu. Skónčnje zwěsćichu, zo njebě w lisće jěd, ale powostanki myše. Štó bě je připósłał, pak njewědźa.
Palaceho so baćonjaceho hnězda dla njeměješe połojca wsy Theisbergstegen w Porynsko-Pfalcy milinu. Wohnjowa wobora bě při hašenju milinowód wobškodźiła, na čož milina wupadny. Baćonjace hnězdo bě za čas wohenja prózdne. Paliło so je, dokelž běchu baćony hnězdo direktnje do milinowoda twarili. Na to dóńdźe ke krótkospjeću a k wohenjej. Baćon hašenje zwysoka wobkedźbowaše.
Spahn: Ideja Europy spřećelenych krajow wulkotna
Kopata połna wjacezaměrowa hala na Budyskim Třělnišću bě hłownemu organizatorej kóždolětneje politiskeje popjelneje srjedy, serbskemu zapósłancej CDU w Sakskim krajnym sejmje Markej Šimanej, dopokaz, zo měješe zbožownu ručku při přihotach: Lětsa bě so zwjazkowy minister za strowotnistwo Jens Spahn jako rěčnik připowědźił.
Tróšku sćerpnosće wšak wopytowarjo lětušeje mjeztym 27. politiskeje popjelneje srjedy sakskeje CDU trjebachu. Dobre 20 mjeńšin dyrbjachu na zahajenje zarjadowanja čakać. W tym času so minister Jens Spahn zhromadnje z Markom Šimanom demonstrantam wěnowaše, kotřiž před halu z transparentami a hwižkami přećiwo přiběracej běrokratiji w strowotnistwje protestowachu. Na plakatach sej woni žadachu: „Wjace chwile za pacientow“ abo „Nic za pisanskim blidom, ale při łožu choreho“. Minister Spahn je demonstrantam, kotřiž dyrbjachu dlěje hač hodźinu w šćipatym wětřiku čakać, pomoc přilubił.
Wuhlady wo tójšto špatniše
Mnichow (dpa/SN). Z institutom Ifo je dalši wažny slědźenski institut swoju prognozu za lětuše wuwiće němskeho hospodarstwa chětro pohubjeńšił. Fachowcy Ifo su prognozu hospodarskeho wuwića nimale społojčili a liča lětsa jenož hišće z rozrostom 0,6 procentow, kaž dźensa zdźělichu. Dotal běchu rozrost 1,1 procenta wěšćili. Minjeny tydźeń bě Organizacija za hospodarske zhromadne dźěło a wuwiće wuhlady za němske hospodarstwo wot 1,6 na jenož hišće 0,7 procentow jasnje pomjeńšiła.
Pokazki na podobnosć zražkow
Washington (dpa/SN). Po tym zo su w USA lětadłam typa Boeing 737 Max startować zakazali, je flota toho typa po cyłym swěće w dalokej měrje zlemjena. Zarjad USA za lětarstwo w tym zwisku zdźěla, zo maja nowe dopóznaća k njezbožu Boeing 737 w Etiopiskej, kotrež pokazuja na podobnosće k njezbožu lětadła samsneho typa loni w oktobru w Indoneskej. Tež tam bě pasažěrska mašina jenož mjeńšiny po wotlěće na zemju zrazyła.
Kak dale ze spěchowanjom?
Wot wutory hač do dźensnišeho je policija w zwjazkowych krajach k ...
Nowy rozsud parlamenta brexita dla
London/Brüssel (dpa/SN). Zapósłancy britiskeho parlamenta chcedźa dźensa wječor wo tym wothłosować, hač njemóhli wustup kraja z Europskeje unije přestorčić. Při tym móža so po woli premierministerki Theresy May mjez krótkej a dlěšej dobu rozsudźić. Wuměnjenje za podlěšenje doby wšak je přihłosowanje wšitkich zbywacych 27 čłonskich statow EU. Poprawom chcyše Wulka Britaniska Europsku uniju 29. měrca, za dobrej dwaj tydźenjej, wopušćić.
Wčera wječor běchu zapósłancy ze snadnej wjetšinu přećiwo tomu hłosowali, zo kraj EU bjez zrěčenja z Brüsselom wopušći. May bě to indirektnje ze swojim z Brüsselom wujednanym zrěčenjom wo wustupje kraja z EU zwjazała.
Wotum delnjeje komory parlamenta bě zdźeržliwe reakcije zbudźił. Zwjazkowy wonkowny minister Heiko Maas (SPD) rěčeše drje wo „rozumnym znamjenju, nětko pak měli Britojo rjec, što poprawom chcedźa“. Justicna ministerka Katarina Barley (SPD) warnowaše, zo rozsud „jenož na wokomik“ změruje.
