„Rěč zdźeržeć a spěchować, serbsku swjedźensku kulturu šěrić a serbsko-němske přećelstwo hajić“ – tónle nadawk je sej towarstwo Serbska murja stajiło. Mjez druhim chce tomule narokej z wuhotowanjom koncertow wotpowědować, kaž činješe to na přikład minjenu sobotu w Budyšinje. Byrnjež wječor pod hesłom „Lit the house 2.0“ dosć derje wopytany był, zbywaja prašenja. Sprěnja – a tu wujewja so problem, kotryž łužiski publikum často wužaduje – měło so wo tym rozmyslować, čehodla pola nas móžno njeje sej terminy wotrěčeć. Zdruha dyrbjeli sej zarjadowarjo wuwědomić, zo tež w času socialnych medijow klasiske puće připowědźenja hišće rólu hraja. Střeća nješkodźi, do koncerta znajmjeńša hruby programowy přehlad, tak mjenowanu running order, wozjewić. Najlěpši poskitk ničo njepomha, njeje-li móžno jón wužiwać – jelizo publikum docyła wo nim wě. Bosćan Nawka

Pjaneho pilota předewzaća British-Airways je policija bjezposrědnje do wot­lěta pasažěrskeje mašiny zajała. Zastoj­nicy wotwjedźechu 49lětneho direktnje z cock­pita Boeing 777 na lětanišću Gatwick. Muž bě jednomu z třoch pilotow jědnaćehodźinskeho lěta na Mauritius napadnył, dokelž za alkoholom smjerdźeše. Mjeztym je zaso na swobodźe. Mašina móžeše z dwuhodźinskim zapozdźenjom startować, po tym zo běchu druheho pilota namakali.

Hoberska zličbowanka je štyrjoch turistow z Japanskeje w hosćencu we Venedigu chětro rozhoriła. Woni dyrbjachu za štyri steaki, fritěrowane mórske płody a wodu 1 100 eurow zapłaćić. Mjeztym je měšćanosta Venediga Luigi Brugnaro připowědźił, zo chcył „wohańbjacy podawk“ pruwować. A dyrbjało-li so to wobkrućić, wón zamołwitych pochłosta.

Paderborn/Drježdźany (B/SN). Ze 14 milionami eurow podpěruje Bonifacijowy skutk lětsa projekty w němskej, sewjeroeuropskej a w baltiskej diasporje. Z toho wužiwaja 225 000 euro za twarske a saněrowanske dźěła w biskopstwje Drježdźany-Mišno. Pomocny skutk zasadźa so za to, katolikow w diasporje we wěrje sylnić a jim dožiwjenja w zhromadnosći wěriwych zmóžnić. Financne srědki wužiwaja mjez druhim za zdźerženje cyrkwjow a wosadnych centrow, za dušepastyrstwo dźěći a młodostnych, za socialnokaritatiwne akcije a za spěchowanje projektow k skrućenju wěry.

Łaćonsku Ameriku wopytał

Vatikan (B/SN). Bamž Franciskus přebywaše wot 15. do 21. januara w Chile a Peruwje – w krajomaj, kotrejž stej so po wojerskej diktaturje a awtokratiji pomału zaso zhrabałoj. Wonej stejitej na dypku přewróta a takrjec na křižnišću towaršnostneho přichoda. W prěnim rjedźe wustupowaše bamž na swojej jězby jako dušepastyr, stej dźě tam dwě třećinje ludnosće katolskej. Přiwšěm njeje so do nutřkowneje politiki krajow měšał.

Katedralu poswjećili

Davos (dpa/SN). Do zahajenja swětoweho hospodarskeho foruma w šwicarskim Davosu warnuje organizacija Oxfam před přiběracej hospodarskej njesprawnosću na swěće. Ta wohroža towaršnosće a demokratije. Štóž je chudy, so na politiskich procesach njewobdźěla abo woli protestne strony, rjekny fachowča organizacije Ellen Ehmke powěsćerni dpa. Po zwěsćenju Oxfam wobsedźi 42 wosobow na swěće runje telko kaž 3,7 miliardow chudych ludźi. Najbohatši jedyn procent wobsedźi wjace hač zbywace 99 procentow ludźi.

Kardinal bamža kritizował

Rom/Boston (dpa/SN). Jedyn z najwažnišich społnomócnjenych bamža za škit dźěći před znjewužiwanjom je Franciskusa toho wuprajenjow w zwisku ze znjewužiwanjom w Chile kritizował. Kardinal Sean O’Malley, nawoda bamžowskeje komisije za škit dźěći, rjekny, zo su wšelake wuprajenja swjateho wótca za čas jězby po Chile woporam splažneho znjewužiwanja „žórło wulkeje bolosće“. Bamž je wumjetowanja, zo bě chilski biskop Juan Barros pedofilneho duchowneho škitał, jako „wočornjenje“ wotpokazał.

„Shutdown“ dale traje