Zapósłanča biowobchod wopytała
Třělc w USA 17 ludźi morił
Parkland (dpa/SN). Cyłkownje 17 ludźi je přez wutřěle 19lětneho na šuli w Parklandźe w zwjazkowym staće USA Florida žiwjenje přisadźiło. Znajmjeńša dwanaće wosobow bě amokowy třělc zranił, kaž policija zdźěla. Někotre z nich su hišće w kritiskim stawje. Policija móžeše třělca zajeć. Po informacijach zamołwitych jedna so wo bywšeho šulerja kubłanišća, kiž bě je disciplinariskich přičin dla wopušćić dyrbjał.
Žadaja sej razny kurs
Berlin (dpa/SN). Krótko do zetkanja zwjazkoweje kanclerki Angele Merkel (CDU) z turkowskim ministerskim prezidentom Binalijom Yıldırım su sej Lěwica a Zeleni kruty kurs Němskeje napřećo Turkowskej žadali. Předsydka frakcije Lěwicy w zwjazkowym sejmje Sahra Wagenknecht žada sej hnydomny kónc brónjenskich eksportow do Turkowskeje. Zapósłanc Zelenych Cem Özdemir kanclerku namołwi, turkowsku ofensiwu w Syriskej tematizować. Wočakuja, zo Angela Merkel z Yıldırımom wo zajatym žurnalisće Denizu Yücelu rěči, kiž je mjeztym lěto w turkowskim jastwje.
Dźěći w krizowych kónčinach
Nowy centrum NATO w Němskej nastanje
Brüssel (dpa/SN). We wobłuku brónjenja NATO přećiwo Ruskej chce Zwjazkowa wobora nowy rozkazowanski centrum za spěšne přepołoženje wojakow a materiala natwarić. Zakitowanska ministerka Ursula von der Leyen (CDU) je na wčerawšim zetkanju wojerskeho zwjazka w Brüsselu wotpowědne plany wobkrućiła. „Němska je poskićiła, jako ramikowy kraj skutkować, za čož su nam druzy jara dźakowni.“ Na dobro Němskeje su jeje centralne połoženje wosrjedź Europy a jeje nazhonjenja na polu logistiki a podpěry, von der Leyen doda.
Hdźe dokładnje nowe logistiske komando nastanje a kelko wojakow budźe tam słužbu wukonjeć, njeje hišće znate. Po rešeršach nowinarjow měrja so pječa na kónčinu wokoło Kölna a Bonna.
To a tamne (15.02.18)
Dźesatki pizzow wšědnje je Dortmundski prawiznik přez dlěši čas dóstawał, bjez toho zo bě je scyła skazał. Štó je na tym wina, policija nětko přepytuje. Tukaja na „pizza-stalking“, šikanu z pomocu skazankow w mjenje druheho. Akcija je nimo, za skućićelom pak dale pytaja. Pizzy zapłaćić prawiznik njetrjeba. Škodu zaruna dodawar pokładźeneho pječwa.
Při mosće wisajo wostało je nakładne awto w Kamjenicy. Prawdźepodobnje bě 62lětny šofer Lkw-ja wysokosć mosta wopak posudźował. Pod mostom bě jenož 3,50 metrow wysoko městno. Na připowěšaku nakładowane twory pak přesahowachu wjace hač štyri metry. Na nakładnym awće a na mosće nastatu škodu trochuje policija na něhdźe 8 500 eurow. Wona wšak tež přepytuje, kak móžeše šofer dale jěć, byrnjež wysokosć mosta wupokazana była.
Bioratarstwo dale přiběra
Berlin (dpa/SN). Amtěrowacy zwjazkowy ratarski minister Christian Schmidt (CSU) je přeswědčeny, zo ekoratarjenje w Němskej dale přiběra. „Bio dawno wjace nišowy produkt njeje“, rjekny politikar powěsćerni dpa składnostnje wotewrjenja přehladki za přirodnu jědź Biofach dźensa w Nürnbergu. Tež přichodnje budźe bioratarstwo podpěrane a projekty předewšěm mjeńšich zawodow za regionalne zwičnjenje spěchowane.
Yıldırım nadźija so pohiba
Istanbul/Berlin (dpa/SN). Turkowski ministerski prezident Binali Yıldırım nadźija so po swójskich słowach bórzomneho pušćenja korespondenta nowiny Welt Deniza Yücela, kiž je bjez wobskóržby hižo lěto w turkowskim jastwje. Do zetkanja ze zwjazkowej kanclerku Angelu Merkel (CDU) jutře w Berlinje pak Yıldırım na to skedźbnja, zo wo tym justica Turkowskeje rozsudźi, nic jeje knježerstwo. Po přełožku sćelaka rjekny wón wčera we wusyłanju ARD-Tagesthemen: „Nadźijam so, zo jeho za krótki čas pušća.“
Inflacija wobmjezowana
Po wšej republice su strony dźensa swoju politisku popjelnu srjedu ...
Woborna wučba zaso šulski předmjet
Praha (dpa/SN). Čěske knježerstwo populistiskeho hibanja ANO chce wobornu wučbu zaso jako winowatostny předmjet na šulach zawjesć. Šulerjo měli nawuknyć, „što rěka Čech być“, rjekny zakitowanska ministerka Karla Šlechtová w internetnym wudaću nowiny Mladá fronta Dnes. Šulski předmjet běchu 1991, dwě lěće po somoćanej rewoluciji, wotstronili. Na wučbnym planje ma nimo toho posrědkowanje zakładneje wědy wo wójsku, kurs k prěnjej pomocy a prawe zadźerženje při terorowym nadpadźe stać. Kritikarjo widźa w planach knježerstwa „militarizaciju towaršnosće“.
Čěska republika je wot 1999 z čłonom NATO. Wobornu winowatosć běchu lěta 2005 zběhnyli. Wójsku nětko dorost pobrachuje.
Kaczyński skorži „antipolonizma“ dla
Biskop: Mjaso wědomišo jěsć
Hannover (dpa/SN). Składnostnje dźensnišeje popjelneje srjedy je sej Hannoverski ewangelski krajny biskop Ralf Meister žadał, wědomišo z mjasom wobchadźeć. „Wašnje a mnóstwo produkcije mjasa njejstej přichodakmanej“, rjekny Meister Osnabrückskim nowinarjam. „Njebudźemy přiběrace wobydlerstwo swěta z tej formu mjasoweje produkcije nasyćić móc, bjez toho zo ekologiskemu systemej swěta masiwnje škodźimy.“
Hannoverski biskop chce so w póstnym času mjasa wzdać. Runje w Delnjej Sakskej je to wosebite znamjo. „Kraj so sylnje wot produkcije mjasa žiwi.“ Nawoda najwjetšeje krajneje cyrkwje Němskeje zdobom na to skedźbnja, zo „kóždy wobydler Němskeje přerěznje 60 kilogramow mjasa wob lěto zjě. Sam sym wotrostł z klasiskim rozdźělenjom: Mjaso sydaše jenož njedźelu a swjate dny, wotydźenja bě wone wulke wuwzaće.“
Scholz nachwilny nawoda SPD
Načolne gremije socialdemokratow chcyli Andreju Nahles za předsydku
Berlin (dpa/SN). Jako prěnja žona na čole SPD ma předsydka frakcije Andrea Nahles stronu z hłubokoje krizy wjesć. Dotalny předsyda Martin Schulz je wčera oficialnje wotstupił. Na to nominowachu načolne gremije strony 47lětnu Nahles jednohłósnje za jeho naslědnicu. Hač k wólbam na wurjadnym stronskim zjězdźe 22. apryla we Wiesbadenje ma městopředsyda Olaf Scholz socialdemokratow komisarisce nawjedować. Pospyty, Andreji Nahles hnydom zastojnstwo předsydy dowěrić, běchu po protestach wjacorych krajnych zwjazkow zwrěšćili.
Nahles mjenowaše swoje nominowanje „wulku česć a wulku zamołwitosć za naš kraj“. Wona so nadźija, zo wuchadźa ze stronskeho zjězda „signal rozmacha“. Zdobom zakituje wujednane koaliciske zrěčenje. Dale je sej wěsta, zo čłonojo strony při swojim wotumje wot 20. febraura hač do 2. měrca z „haj“ hłosuja. Na prašenje žurnalistow, hač swój politiski přichod z wuslědkom wothłosowanja zwjazuje, Nahles rjekny: „Swój dóńt ze scyła ničim njezwjazuju.“
