Moderny internet za kóždeho
Naročny plan noweho knježerstwa – Budyski wokrjes hižo aktiwny
Berlin (SN). Narok je wulki: Němska chce so na „sylny kraj digitalizacije“ wuwić. Tak znajmjeńša steji to w koaliciskim zrěčenju CDU/CSU a SPD. Přichodna statna ministerka za digitalne naležnosće Dorothee Bär (CSU) je připowědźiła, zo wobhladuje polěpšenja na polu digitalizacije jako swój wosobinski nadawk. W nowym zastojnstwje chcyła wona k tomu přinošować, zo njeje Němska jenož wuspěšny industrijny kraj, ale zo stanje so zdobom z „wuspěšnym digitalnym narodom“, kaž Bär při swojim předstajenju připowědźi. Na lisćinje jeje nadawkow steja mjez druhim „wšón kraj wopřijaca digitalna infrastruktura swětoweje klasy, wjace wěstoty w internetnym rumje a wjace bliskosće k wobydlerjam přez moderne, digitalne zarjadnistwa“.
To a tamne (07.03.18)
Wjele lět wopačny drohokamjeń wobdźiwali su wopytowarjo čěskeho narodneho muzeja po informacijach medijow. Pjećkaratowy diamant bě dotal jedyn z najwažnišich eksponatow zběrki drohokamjenjow w Praze. Při inwenturje so nětko wukopa, zo jedna so wo škleńčanu podobiznu. Prawdźepodobnje běchu paduši diamant hižo před lětdźesatkami pokradnyli a z tunjej kopiju narunali. Tež pola dalšich kamjenjow maja dwěle.
Klučik ručnych putow wotłamała je 29lětna žona w Kamjenicy, jako ju policisća zajachu. Chětro so wobarajo je wona tež policistku snadnje zraniła. Dokelž njemóžachu zastojnicy puta hižo wjace wotamknyć, dyrbješe wohnjowa wobora žonu z wosebitymi klěšćemi wuswobodźić. 29lětna bě policistomaj na dwórnišću napadnyła. Při kontroli wona zwěsćištaj, zo předleži wukaz zajeća přećiwo njej wjacorych deliktow dla.
Jurk: Tež na Serbow myslić
Wšelake reakcije na wotum čłonow SPD wo wulkej koaliciji
Berlin (SN). Rozsud čłonow SPD na dobro noweje wulkeje koalicije z CDU a CSU němska zjawnosć jara wšelako hódnoći. Tak je sej sakska krajna předsydka Lěwicy Antje Feiks wěsta, zo je so wjetšina čłonow wulkemu zjawnemu ćišćej podwoliła, štož so po jeje měnjenju w jasnym 66procentowskim wuslědku wotbłyšćuje. Zdobom je z wuslědkom nětko tež „historiske woknješko“ zawrjene. „Lědma hdy bě tajkeje dobreje składnosće nowozapočatka“, wona piše. Wotpokazać wulku koaliciju by sej wužadało, politiske mocy dospołnje noworjadować. Móžnosć je z wutworjenjom mjeńšinoweho knježerstwa takrjec na blidźe ležała, Feiks rozprawja. „Bohužel njebu składnosć wužiwana.“
„Tale koalicija je špatna za Němsku a wosebje za jeje wobydlerjow. Dyrbimy wočaknyć, kak dołho wona dźerži“, piše Budyski zapósłanc AfD w zwjazkowym sejmje Karsten Hilse w zdźělence. „Za Němsku trěbne změny njemóžemy z tajkim słabym zwjazkom, kotryž nima ani wjetšinu mjez wolerjemi, wočakować.“
Wjetši respekt trěbny
Kiel (B/SN). Dźěćacy škitny zwjazk w Schleswigsko-Holsteinskej je na wšěch wužiwarjow interneta apelował, so online runje tak z respektom zadźeržeć kaž w direktnym žiwjenju. „Za dźěći a młodostnych dźensa słušeja temy kaž hatespeech abo cybermobbing bohužel k jich swětej“, praji jednaćelka krajneho škitneho zwjazka Susanne Günther. Tohodla namjetuje wona za wirtuelne žiwjenje: „Pisaj a wozjew jenož teksty, z kotrymiž druhich njeraniš. Pruwuj, kak by było, by-li wo tebje šło.“
Dóstanje medijowe myto
Köln (B/SN) 19lětna Natalie Dedreux z Kölna dóstanje medijowe myto BOBBY zwjazkoweho zjednoćenstwa Žiwjenska pomoc. Młodu žonu z downsyndromom wobdźiwaše zwjazkowa kanclerka kaž tež miliony telewizijnych přihladowarjow, jako je wona Angeli Merkel loni we wusyłanju ARD prašenje stajiła: „Čehodla směš ćěšenki z downsyndromom samo hišće krótko do poroda wotehnać? Ja sym bohudźak na swět přišła.“ „Młodostna sta so tak ze sylnym hłosom, z posołku za zbrašeneho čłowjeka“, wopodstatnja Ulla Schmidt, předsydka zjednoćenstwa Žiwjenska pomoc, počesćenje młodostneje.
Za rozdźělnej plakeće
Berlin (dpa/SN). Prezidentka Zwjazkoweho wobswětoweho zarjada Maria Krautzberger žada sej dwaj pućej w boju přećiwo dieselowym wotpłunam w městach. Za to měł Zwjazk dwě wobswětowej plakeće zawjesć. Krautzberger namjetuje, dieselowym awtam z euronormu pjeć a šěsć přichodnje swětłomódru plaketu spožčić. Jězdźidła z nowej normu Euro 6d-TEMP, kotrež wjele mjenje dusykoweho oksida wustorkuja, měli ćmowomódru plaketu dóstać.
Tež SPD ministrow pomjenuje
Berlin (dpa/SN). Po CDU a CSU chcyła tež SPD přichodnje ministerske zastojnstwa w nowym zwjazkowym knježerstwje wobsadźić. „Personalne rozsudy zrjadujemy hišće tutón tydźeń“, rjekny městopředsydka strony Malu Dreyer nowinarjam. Wulku napjatosć zbudźa prašenje, štó stanje so z wonkownym ministrom. Zo Sigmar Gabriel w zastojnstwje zwostanje, je po rozkorach minjeneho časa tak derje kaž wuzamknjene. Znowawuzwolenje zwjazkoweje kanclerki Angele Merkel a spřisahanje noweho knježerstwa Němskeje planuja 14. měrca.
Pomocne srědki dóstali
Nowy wěstotny konceptza park Pücklera
Choćebuz (dpa/SN). Po wohenju na Pücklerowej jězorowej pyramidźe w Rogeńskim parku w Choćebuzu chcedźa wěstotu objekta polěpšić. Tak mysla na stražnikow, kotřiž krajinowu zahrodu rano wotwěraja a wječor zaso zamkaja, kaž na- woda parka Claudius Wecke powěsćerni dpa rjekny. Dotal bě historiski park wšědnje 24 hodźin přistupny. Nimo toho chcedźa płót zwuporjedźeć. W tym zwisku ma wěstotny koncept nastać. Woheń bě posledni nastork, nic pak hłowna přičina noweho koncepta, Wecke zdźěli. Najwjace škody nastawa zwonka wobchodnych časow. Nimo toho maja minjenej lěće masiwny problem z dźiwimi swinjemi.
Wopytowarjo parka běchu woheń pjatk wječor wuhladali. Wohnjowa wobora płomjenja podusy. Policija po prěnich dopóznaćach z toho wuchadźa, zo bu woheń wotpohladnje zamiškrjeny. Wona pyta swědkow a je so mjeztym na zjawnosć wobroćiła. Dotalnu škodu hišće njeznaje. Hakle nalětu budu widźeć, hač su korjenje dźiwjeho wina w zemi pyramidy wobškodźene. Wecke pak je optimistiski. Přiwšěm bě woheń wulke dźěle wegetacije na pyramidźe zničił.
Iniciatiwa: Demokratija rozpaduje
Berlin (dpa/SN). Wólbne dobyće europsko-kritiskich stron při wólbach parlamenta w Italskej je proeuropskej wobydlerskej iniciatiwje Pulse of Europe jasne znamjo wosłabjeneje demokratije. „Trend dale dźe, zo ludźo etablěrowanym stronam dale a mjenje dowěrjeja“, rjekny załožer iniciatiwy Daniel Röder nowinarjam. Nakromne strony a protestne hibanja pak su dźeń a sylniše. „To su z mojeho wida jasne pokazki na rozpadowacu demokratiju, štož w mnohich krajach dožiwjamy.“
Při wólbach parlamenta je protestne hibanje „Pjeć hwězdow“ z 32 procentami jako najsylniša jednotliwa strona wušło. Zwjazk prawicarskich stron nažnja dohromady 37 procentow hłosow.
Póstniski wóz w Europje po puću
Düsseldorf (dpa/SN). Štož je so něhdy jako kołwrótna myslička započało, je mjeztym přewšo wuspěšna akcija: Póstniski wóz twarca Jacquesa Tillyja „Žrački demokratije“ z lońšeho póstniskeho ćaha róžowu póndźelu w Düsseldorfje je po wjace hač dwanaće měsacach přeco hišće na turneji. „Wóz bě mjeztym w mnohich pólskich městach. Sym wjace hač 30 přinoškow w pólskich nowinach wo nim namakał“, rjekny Tilly powěsćerni dpa w Düsseldorfje. Tillyjowe motiwowe wozy ze šćipatej politiskej satiru zbudźeja hižo wjele lět po wšěm swěće kedźbnosć.
Wozy z papjercowymi motiwami poprawom dźeń po póstnicach zaso wottwarjeja. Z wozom „Žrački demokratije“ bě to hinak. Wobydlerska iniciatiwa bě sej jón wuprosyła a na turneju po wuchodnej Europje pósłała. Na nim so tučne husańcy z mjenami kaž „Putin“, „Orbán“, „Kaczyński“, „Erdoğan“ a wězo njeparujomny „Trump“ přez zelene łopjeno „demokratije“ přežeru.
Wóz bě hižo w Čěskej wulku kedźbnosć zbudźił a warnuje nětko w Pólskej před strachami, kotrež tam demokratiji hroža.
To a tamne (06.03.18)
W kamorje schowany lubkar je w Bremerhavenje dwójne zasadźenje policije zawinił. 38lětna žona bě jeho kónc tydźenja sobu domoj wzała. Jako njedźelu rano jeje žiwjenski partner přińdźe, so wona do njeho da, zo njeby lubkowarja w kamorje wuhladał. Zwada so tak přiwótři, zo dyrbjachu susodźa policiju wołać. Zastojnicy chětro agresiwny porik zajachu. Krótko na to tam policiju znowa wołachu: Njeznaći běchu so do bydlenja zadobyli, zo bychu lubkarja wuswobodźili, kiž njemóžeše ze zamknjeneho bydlenja.
Nakusana makowa całta je dopokazała, zo bě paduch w Kielu handy sobudźěłaćerki pjekarnje pokradnył. Mobilny telefon bě so tam srjedź nowembra z dźěłarnje zhubił. Jako paduch znowa do pjekarnje přińdźe, zawoła žona policiju. Ta móžeše z pomocu DNA dopokazać, zo bě pakostnik w zadnjej rumnosći był, hdźež wot njeho nakusana całta ležeše.
Žana jasna wjetšina
Rom (dpa/SN). Europje napřećo kritisce nastajene protestne hibanje „Pjeć hwězdow“ wobhladuje so jako dobyćer wólbow italskeho parlamenta. „Nětko dyrbja wšitcy z nami rěčeć“, rjekny Alessandro Di Battista, jedyn z najznaćišich zastupnikow hibanja, w Romje. Po prěnim wuličenju dósta wone 33,6 procentow hłosow, štož přiwšěm za wjetšinu w parlamenće njedosaha. To samsne płaći za zwjazk prawicarskich stron, kotryž dósta 36,5 proc. Wobkedźbowarjo liča tuž z wobćežnymi koaliciskimi jednanjemi.
Přećiwo šmórnjenju popłatka
Bern (dpa/SN). Njewočakowano jasnje su so wobydlerjo Šwicarskeje přećiwo wotstronjenju rozhłosoweho popłatka wuprajili. 71,6 procentow ludźi je wčera wotpowědne žadanje iniciatiwy wotpokazało a tak zjawnoprawniske sćelaki zachowało, kotrež tež programy mjeńšin wusyłaja. Sakski ministerski prezident Michael Kretschmer (CDU) wuslědk wita a zamołwitych zdobom namołwja, kwalitu programow zaručić. W Němskej je něhdźe 55 procentow za to, zjawnoprawniske sćelaki zachować.
Wjace wojakow do Afghanistana
