Berlin (dpa/SN). Nowy zwjazk Sahry Wagenknecht chce so přichodne 30 do 40 lět w Němskej jako „ludowa strona“ zadomić a politiku kraja „zasadnje změnić“. Tole je něhdyša politikarka Zelenych ­Sahra Wagenknecht ze swojimi sobuwojowarjemi wčera připowědźiła. Do toho bě 44 prěnjotnych čłonow w Berlinje ­nowu stronu BSW formelnje załožiło a prěnje předsydstwo wuzwoliło.

Wagenknecht nowu stronu sama w dwójnym mustwje z Amiru Mohamed Ali, něhdyšej předsydku mjeztym rozpušćeneje frakcije Lěwicy w zwjazkowym sejmje, nawjeduje. Načolnaj kandidataj BSW k wólbam Europskeho parlamenta mataj bywšej politikarjej Lěwicy Fabio de Masi a wjelelětny politikar SPD Thomas Geisel być. Nowa strona chce při europskich wólbach 9. junija prěni króć na­stupić, runje tak kaž w septembru při wólbach wuchodoněmskich krajnych sejmow. Wagenknecht sama njekandiduje, ale wostanje w zwjazkowym sejmje. 54lětna Wagenknecht mjenowaše załoženje strony „historiski dźeń“.

Sakski ministerski prezident přećiwo powšitkownemu dźělnemu dźěłu

Drježdźany (dpa/SN). Sakski ministerski prezident Michael Kretschmer (CDU) žada sej reformu zakonja wo dźělnym a časowje wobmjezowanym dźěle. „Rjadowanje je runje w času pobrachowacych fachowcow wočiwidnje wopačny signal. Dyrbimy zakoń na rozumnu měru přinjesć“, rjekny Kretschmer powěsćerni dpa w Drježdźanach. „Što je to do sta­wizny: Němska skorži pobrachowacych dźěłowych mocow dla a chce wukrajnych fachowcow nawabić, runočasnje pak dźěłowy wobłuk w kraju bydlacych dźěłowych mocow redukujemy. To so ­tola hromadu njehodźi. Naš signal młodej generaciji měł rěkać: 40 hodźin wob tydźeń měł standard a wotchilenja we wobmjezowanych padach móžne być. Njemóže być, zo dźěłaja ludźo z wulkimi dochodami a wěstym dźěłowym městnom jenož podźělnje, ludźo ze snadnymi dochodami a njewěstymi dźěłowymi zrěčenjemi pak 40 hodźin a wjace“, mi­nisterski prezident argumentuje. Zdobom ma Kretschmer zrozumjenje za rozdźělne předstawy ludźi wo rjadowanju wosobinskeho žiwjenja.

Druhdy čitaš, zo je tuchwilu dale a mjenje kosmopolitow, potajkim ludźi, kotřiž njewidźa jenož swój kraj, ale cyły swět jako swoju domiznu. W Chrósćicach tomu tak njeje, tule pěstuja swěru swój serbski swět a su zdobom – hlej mjezynarodny folklorny festiwal a Europasion – z ludźimi cyłeho kontinenta, haj cyłeje zemje zwjazani. Serbskosć wotewrja ludźi hižo 350 milionam druhim Słowjanam. A najebać wšě horce diskutowane njedostatki katolskeje cyrkwje: Katolicizm zwjazuje bjezposrědnje 1,4 miliardy ludźi najwšelakorišich kulturow. Njedźiwajcy wšěch złóstnistwow zańdźenosće je katolska cyrkej dźensniši dźeń najwjetši global player za čłowjeske prawa. A wuraz dopóznaća, zo je kosmopolitizm wjac hač wšudźe Hollywood a McDonald‘s. Šef sakskeje statneje kenclije je w Chrósćicach na to skedźbnił, zo je 70 procentow wšěch ludźi na swěće w diktaturach žiwych. Porno tomu Europasion hódnoty swobody a dostojnosće čłowjeka wupruža. Marcel Brauman

Lipsk (dpa/SN). Wužiwarjo železnicy w Sakskej, Saksko-Anhaltskej a Durinskej dyrbja so planowaneho stawka dźěłarnistwa lokomotiwnikow GdL dla na bolostne poćežowanja železniskeho wobchada nastajić. Za čas stawka wot 2 hodź. jutře rano hač do 18 hodź pjatk wječor dóńdźe „k masiwnym haćenjam měšćanskeho, regionalneho a dalokowobchada železnicy“, rěčnica železnicy wčera zdźěli.

W dalokowobchadźe pojědu ćahi po nuzowym a tuž chětro wobmjezowanym jězbnym planje. Za to zasadźuje železnica dlěše ćahi z wjace městnami. Pućowacych železnica prosy, so nic nuznje trěbnych jězbow wzdać abo jězbu přestorčić. Nimo toho móža wšitcy, kotřiž su sej za čas stawka hižo jězdźenku kupili, tiket pozdźišo wužiwać. Wjazba na cyle wěsty ćah je zběhnjena. Rezerwowanja městnow móža ludźo darmotnje storněrować. Tež dočasna jězba je móžna.

Dźěłarnistwo lokomotiwnikow GdL chce w pasažěrskim wobchadźe wot jutře hač do pjatka stawkować, runje w tydźenju, w kotrymž su dróhi protesta ratarjow dla hižo zatykane. Po stawku so wobchad hakle poněčim normalizuje.