EU plan klimy dla wujednała
Demokrat wólby w New Yorku dobył
New York (dpa/SN). Dobyćer wólbow měšćanosty w New Yorku, Zohran Mamdani, je w swojeje dobyćerskej narěči direktnu konfrontaciju z prezidentom USA Donaldom Trumpom pytał. „W tutym wokomiku politiskeje ćmy stanje so New York ze swětłom“, rjekny Mamdani po swojim wólbnym dobyću na zarjadowanju w měšćanskim dźělu Brooklyn.
Wón je sej toho wědomy, zo Trump tutu narěč sćěhuje, Mamdani rjekny, a so direktnje na njeho wobroći. Trumpowe knježerstwo bě naposledk jara razne přećiwo ludźom postupowało, kotřiž běchu ilegalnje do kraja přišli. New York wostanje město zapućowarjow, wón potwjerdźi. „Jeli chceće jednoho z nas dosahnyć, dyrbiće pola nas wšěch nimo.“
Lěwicarski demokrat je po dotalnych informacijach medijow USA přewšo wažne wólby měšćanosty w New Yorku dobył. 34lětny po wuličenju 97 procentow wšěch wólbnych lokalow jasnje před druhimi kandidatami nawjedowaše.
Na čole najwjetšeho města USA a jako prěni muslim w tutym zastojnstwje móhł so Mamdani z wažnym kontrahentom Trumpa stać. Tón bě hrozył, zo připłatki za New York na minimum zniži, dyrbjał-li „komunist“ wólby dobyć.
Knježaca błudnosć
Mjenje wukubłanskich městnow
Kamjenica (dpa/SN). W Sakskej wobkedźbuja woteběracu ličbu wukubłanskich městnow. Runočasnje je dale a wjace młodych ludźi, kotřiž pytaja za wučomniskim městnom, Kamjeničanska regionalna direkcija zwjazkoweje agentury za dźěło zdźěla. „Napjate hospodarske połoženje a globalne njewěstosće swoje slědy přiběrajcy zawostajeja – nětko tež na wukubłanskich wikach“, rjekny Klaus-Peter Hansen, nawoda direkcije dźěłoweje agentury.
Porno lońšemu je so ličba wukubłanskich městnow w swobodnym staće lětsa wo 5,7 procentow na 19 647 pomjeńšiła. Wot dobrych 18 600 požadarjow nimale 1 300 přeco hišće za městnom pyta. Přiwšěm njemóžachu wšitke sakske předewzaća swoje swobodne wukubłanske městna wobsadźić: na wšěch 1 700 městnow je njewobsadźenych.
Industrijna komora w Kamjenicy, Drježdźanach a Lipsku je po informacijach Klausa-Petera Hansena 11 670 wukubłanskich zrěčenjow wotzamknyła. To je 4,5 procentow mjenje hač loni.
Nazymska pycha na wikach wabi
To a tamne (05.11.25)
Na wšěch 300 brónjow, dźěle brónjow kaž tež municiju a rozbuchadło je policija w domje zemrěteho rentnarja w bayerskim Augsburgu našła a sćazała. Za wjace hač połojcu brónjow njeměješe muž, kiž bě přirodneje smjerće zemrěł, žanu dowolnosć, policija zdźěla. Policija trjebaše cyły tydźeń, zo by ilegalnu zběrku dokumentowała a wotwjezła. Kriminalna policija nětko slědźi, zwotkal brónje pochadźeja.
Z „Mytom přećelstwa“ je ruski prezident Wladimir Putin němskeho pianista a dirigenta Justusa Frantza w Moskowskim Krjemlu wuznamjenił. „Justus Frantz přinošuje hižo wjele lět spomóžnje přibliženju a mjezsobnemu wobohaćenju kulturow Ruskeje a zwjazkoweje republiki Němskeje“, rjekny Putin w swojeje narěči składnostnje spožčenja rjadu na Dnju narodneje jednoty Ruskeje. Frantz bě najebać sankcije do Moskwy přijěł.
Postajenja triage zběhnjene
Karlsruhe (dpa/SN). Zwjazkowe wustawowe sudnistwo je lěta 2022 wot zwjazkoweho sejma wobzamknjene rjadowanje nastupajo tak mjenowaneje triage zběhnyło. Sudnicy wotpowědowachu skóržbje wjacorych lěkarjow nuzneje a intensiwneje mediciny. Zasahnjenje do powołanskeho prawa lěkarjow njeje woprawnjene, sudnistwo rozsudźi. Lěkarjo mějachu swoju powołansku swobodu za ranjenu. Triage postaja, w kotrym rjedźe maja lěkarjo ćežko chorych pacientow lěkować, hdyž je nuza wulka.
Kijew prěje ruske wuspěchi
Kijew (dpa/SN). Ukrainski prezident Wolodymyr Zelenskyj prěje informacije Ruskeje, po kotrychž su ruske jednotki pola Pokrowska wuspěšne. Tam njeje njepřećel „žane wuspěchi měł“, Zelenskyj rjekny. W susodnym Dobropiliju ma Ukraina dale iniciatiwu, w druhich wotrězkach fronty njeje so połoženje změniło. Ruska twjerdźi, zo je ukrainske jednotki pola Pokrowska a Kupjanska wobkružiła.
Trump hrozy New Yorkej
Po zapławjenjach přez tajfun Kalmaegi w centralnej Philippinskej ...
Merz: Syriskich ćěkancow wotsunyć
Berlin (dpa/SN). Zwjazkowy kancler Friedrich Merz (CDU) dale na tym wobstawa, zo so syriscy ćěkancy w Němskej do swojeje domizny nawróća, a chce so za to pola nachwilneho syriskeho prezidenta Ahmeda al-Sharaa wosobinsce zasadźić. „Wobydlerska wójna w Syriskej je nimo. Njeje tuž žaneje přičiny wjace za azyl w Němskej. Tuž móžemy z tym započeć, ludźi wróćo słać“, rjekny předsyda CDU na wopyće w schleswigsko-holsteinskim Husumje. Wón je syriskeho prezidenta do Němskeje přeprosył, zo by z nim wo tym rěčał, Merz rjekny.
Zwjazkowy kancler so na to spušća, zo so wulki dźěl syriskich ćěkancow dobrowólnje wróći, zo bychu so na natwarje kraja wobdźělili. „Tych, kotřiž so spjećuja, Němsku wopušćić, prawje bórze wotsunjemy.“
Merz reagowaše ze swojimi wuprajenjemi na słowa wonkowneho ministra Johanna Wadephula. Politikar CDU bě po wopyće roztřělaneho městačka w Syriskej dwělował, zo so Syričenjo hladajo na wójnske škody we wulkej ličbje dobrowólnje do swojeje domizny nawróća.
Hišće raz z połnej paru
Kamjeničanska kulturna stolica 2025 na kóncu z wjacorymi wjerškami
Kamjenica (dpa/SN). K zakónčenju zarjadowanjow w Kamjeničanskej kulturnej stolicy knježi tam kónc měsaca hišće raz folklorna nalada. Na wulkej paradźe hórnikow poćehnje 29. nowembra něhdźe tysac wobdźělnikow w tradicionalnych drastach po měsće, zarjadowarjo zdźěla. Nimo toho planuje wulke spěwanje hodownych spěwow před historiskej kulisu na naměsće před dźiwadłom, na kotrymž móža so wopytowarjo z přewodom chórow a profesionalnych hudźbnikow wobdźělić. Po hesłom „Swjatok“ zhladuja wječor na jewišću na nachilace so lěto kulturneje stolicy. Poslednje słowo maja tón dźeń diskotekarjo, kotřiž přeměnja Mostowu dróhu na wulku rejwansku milu pod hołym njebjom.
Lěto kulturneje stolicy běchu srjedź januara wotewrěli. Wot toho časa poskićuja tam šěroki program z koncertami, wustajeńcami, festiwalemi a wšelakimi akcijemi. Kónčny spurt w nowembru chcedźa z połnej paru jako wulki wjeršk wurjadneho podawka woswjećić.
