To a tamne (03.03.23)
Sprawnosć w towaršnosći přisporjeć
Wonkowna ministerka, Annalena Baerbock (Zeleni) a ministerka za wuwiće, Svenja Schulze (SPD), stej wčera w Berlinje zhromadnje swój koncept ze směrnicami za feministisku wonkownu kaž tež za wuwićowu politiku předstajiłoj.
Baerbock namołwja Lawrowa
New Delhi (dpa/SN). Wonkowna ministerka Annalena Baerbock (Zeleni) je Rusku na zetkanju wodźacych hospodarskich krajow swěta G 20 namołwjała, wójnu přećiwo Ukrainje skónčić. Při tym wobroći so wona direktnje na ruskeho wonkowneho ministra Sergeja Lawrowa. „Je derje, zo sće tule w žurli, zo byšće připosłuchał“, rjekny Baerbock ruskemu ministrej. „Skónčće tutu wójnu. Nic za měsac abo za lěto, ale dźensa!“ Na zetkanju G 20 před lětom bě Lawrow žurlu wopušćił, zo njeby sej kritiku naposkać trjebał.
Wobaraja so koaliciji z CDU
Berlin (dpa/SN). Po rozsudźe Berlinskeje SPD na dobro koaliciskich jednanjow z CDU chcyła młodźinska organizacija Jusos zwjazkej po puću planowaneho woprašowanja čłonow zadźěwać. „Nětko dyrbi najwjetša nutřkostronska kampanja sćěhować, kotruž je Berlinska SPD hdy widźała“, piše organizacija dźensa internetnje. Koaliciju z CDU ma młodźinski zwjazk SPD za „wulki zmylk“. Knježaca wyša měšćanostka Franziska Giffey chcyła tajku koaliciju wutworić.
Wjace nadpadow zličenych
Wjacori klimowi aktiwisća skupiny „Poslednja generacija“ su so ...
Móhli samo krajne wólby wobwliwować
Kamjenica/Gera (dpa/SN). Wobdźělnicy předewšěm na wuchodźe wotměwacych póndźelnišich demonstracijow maja po nowej studiji zakładnje cyle hinaše zrozumjenje wo demokratiji hač wjetšina towaršnosće. To je wuslědk přepytowanja Berlinskeho Think Thanks „Progresiwny centrum“, kotryž je studiju zhromadnje z Bertelsmannowej załožbu a wědomostnikami Drježdźanskeje Techniskeje uniwersity zhotowił.
Na třoch póndźelnišich zarjadowanjach loni w nowembrje a lětsa w januarje su so fachowcy w Kamjenicy a Gerje wobdźělnikow prašeli. „W srjedźišću analyzy wobhonichmy so za motiwaciju a perspektiwami demonstrowacych, kotřiž njehodźa so prawicarsko-radikalnemu spektrumej přirjadować“, je w rozprawje wopisane. Naprašowani čuja so kaž „prawi demokraća“. Woni su přeswědčeni, zo knježerstwo w zmysle wobydlerjow njejedna.
Scholz: Ukrainu dale podpěrować
Berlin (dpa/SN). Zwjazkowy kancler Olaf Scholz je dalšu podpěru wot Ruskeje nadpadnjeneje Ukrainy jako přinošk k zakitowanju mjezynarodneje wěstoty wuzběhnył. „Kajke fatalne pozbudźenje nadpadnika by było, by-li ranjenje ludoweho prawa a europskeho měroweho porjada tež hišće mytowane było“, rjekny politikar SPD dźensa w zwjazkowym sejmje. „Europski měrowy porjad je zakitowanja kmany“, wón potwjerdźi a doda hladajo na wučby dweju swětoweju wójnow. „Naše ‚Nihdy wjace‘ rěka, zo njesmě so nadpadniska wójna jako srědk politiki nihdy wjace nawróćić.“
Scholz njewidźi wokomiknje žanych pokazkow na to, zo je ruski prezident Wladimir Putin zwólniwy, wo tajkich zasadach a wo sprawnym měrowym rjadowanju rěčeć. „Z pistolu při hłowje njemóžeš jednać – chiba w swójskim podćisnjenju.“ Scholz pokaza na apel hłowneje zhromadźizny UNO: Putina ma swoje wojerske jednotki hnydom z Ukrainy wotćahnyć. Ruska bě 27. februara 2022 susodnu Ukrainu wojersce nadpadnyła.
Wobaraja so planam Habecka
Knježerstwo chcyło wot 2024 nowe płunowe a wolijowe tepjenja zakazać
Berlin (dpa/SN). FDP chcyła planowanemu zakazej nowych płunowych a wolijowych tepjenjow wot lěta 2024 zadźěwać. „Našej frakciji dotal žadyn naćisk k zakazej wolijowych a płunowych tepjenjow njepředleži. Tomu tež njedóńdźe“, rjekny frakciski šef FDP w zwjazkowym sejmje Christian Dürr wčera nowinarjam. Wón so boji, zo twarske a podružne kóšty ze zakazom tajkich tepjenjow dale přiběraja. „Pawšalne zakazy mam za wopačne. Město toho měli technologije wuwiwać, z kotrymiž móhli klasiske tepjenje tež w přichodźe na klimje přichilene wašnje dale wužiwać“, Dürr rjekny. Nowiny běchu předwčerawšim, wutoru, wo naćisku hospodarskeho a twarskeho ministerstwa rozprawjeli, po kotrymž ma wot lěta 2024 zakazane być, nowe płunowe a wolijowe tepjenja zatwarić. Město toho měli so tepjenja wužiwać, kotrež 65 procentow swojeje potrjeby z wobnowjomnych energijow wuzbytkuja. Nadrobnosće njejsu hišće znate.
To škitej klimy njetyje
Wot klětušeho žane nowe tepjenje z wolijom abo płunom? Njedawno rěkaše ze stron knježaceje politiki, po tym zo su wobzamkli, po zakónčenju wužiwanja atomoweje energije tež kóncej wudobywanja wuhla puć rubać: Zemski płun je jako ekologisce najčisćiši fosilny nošer energije móst do epochi produkowanja bjez negatiwnych sćěhow za klimu. Tohodla je dosć ludźi spěchowanje stata za nowu termu abo přiražku zjawneje ruki za optiměrowanje płunoweho tepjenja dóstało. Nětko bychu po woli ministerstwa Roberta Habecka (Zeleni) samo ludźo nuzowani byli, so z płunom rozžohnować, hdyž je so tepjenje skóncowało.
Sakski ministerski prezident Michael Kretschmer kaž modlerski młynčk wospjetuje, zo njesměmy poskitk nošerjow energije dale pomjeńšować a tuchwilnu situaciju wójny dla jako dołhodobnje „normalnu“ wobhladać. Škit klimy trjeba dobru towaršnostnu klimu jako bazu. Tomu tajki naćisk njetyje. Marcel Brauman
To a tamne (02.03.23)
Přewšo zajimawy astronomiski zjaw je hišće hač do dźensa wječora na njebju widźeć: „Napřemoběh jaskraweju hwězdow našeho słónčneho systema Jupitera a Venus. Minjene dny běštej so hwězdźe wšědnje zbližiłoj. Dźensa ma Venus Jupitera „přesćahnyć“. Změna pozicije zwisuje ze zemskej perspektiwu na słónčny system. We woprawdźitosći stej wobě hwězdźe daloko wot so zdalenej.
Lód ze sušenymi insektami poskićuja wot najnowšeho w lodarni w badensko-württembergskim Rottachu nad Neckarom. Wumyslił je so njewšědnu kreaciju 33lětny předewzaćel Thomas Micolino. W swojim wobchodźe při hłownym torhošću historiskeho stareho města zbudźa wón tak wjele kedźbnosće. Přiwšěm dóstanješ tam tež cyle normalny lód.
Marko Suchy zaso předsyda rady
Drježdźany (SN). Čłonojo Rady za serbske naležnosće Sakskeje zetkachu so wčera w přitomnosći zastupjerkow a zastupjerjow wšěch knježerstwowych frakcijow a opozicije w rumnosćach Sakskeho krajneho sejma. Po połdralětnej wakancy wuzwolichu Marka Sucheho znowa za předsydu rady. Wón bě zastojnstwo mjez druhim dla njedosahaceho organizatoriskeho wuhotowanja rady złožił. Ze zarjadowanjom jednaćelnje je so tutón njedostatk wotstronił. Wotpowědne městno so bórze zjawnje wupisa. Dale předpołožichu čłonojo swójski jednanski porjad rady, kotryž so dotal na wustawkach krajneho sejma orientowaše. Jedna ze změnow je, zo budu kwartalne posedźenja w Drježdźanach w přichodźe zasadnje zjawne.
