EU: Ukrainje municiju přewostajić
Brüssel (dpa/SN). Wonkowni a zakitowanscy ministrojo čłonskich krajow Europskeje unije su dźensa wo dalšej podpěrje na dobro Ukrainy we wójnje přećiwo Ruskej wuradźowali. Při zetkanju w Brüsselu dźěše wosebje wo dalše dodawanje nuznje trěbneje municije. Pozadk je strach, zo móhli Ukrainje přichodny čas wažne družiny municije pobrachować. Při tym dźe w prěnim rjedźe wo granaty za artileriju.
Komisija EU z jeje społnomócnjenym za wonkowne naležnosće Josepom Borrellom bě njedawno plan předpołožiła, kak móhli dodawanje municije pospěšić. Při tym dźe wo to, Ukrainje municiju ze swójskich składow čłonskich krajow přewostajić a na druhim boku municiju ze srědkami EU zhromadnje nakupować. EU chcyła za to dwě miliardźe eurow přewostajić, w Brüsselu zdźělichu.
Mjeztym je ruski prezident Wladimir Putin wot ruskeje armeje wobsadźeny ukrainski teritorij wopytał. 70lětny jědźeše sobotu ze swojimi přewodnikami po zničenym Mariupolu.
Kretschmer za spušćomnosć
Kritizuja plany Zelenych za dočasne skónčenje zmilinjenja brunicy
Drježdźany (dpa/SN). Generalny sekretar sakskeje CDU Alexander Dierks je plany frakcije Zelenych w zwjazkowym sejmje nastupajo zažniši termin skónčenja zmilinjenja brunicy raznje kritizował. Přestorčenje termina na lěto 2030 by wujednany, tak mjenowany wuhlowy kompromis tež za wuchodnu Němsku wupowědźiło, rjekny Dierks sobotu w Drježdźanach. „To je wosom lět prjedy, hač termin, na kotryž běchu so wšitcy wobdźěleni dojednali.“ Tak wohrožuje so po jeho słowach wěstota planowanja za wuhlowe kónčiny a za wuspěšnu změnu strukturow. Nimo toho zniča tole dowěru ludźi do demokratiskich rozsudow.
To a tamne (20.03.23)
Zwjazk ma so zasadźić
Podstupim/Berlin (dpa/SN). Braniborski ministerski prezident Dietmar Woidke (SPD) sej wot zwjazka podpěru při zaměstnjenju ćěkancow žada. „Naše komuny trjebaja pomoc“, wuzběhny wón wčera po zetkanju ministerskich prezidentow krajow w Berlinje. Je to nadawk knježerstwa, so za fairne rozdźělenje po Europje zasadźić. Dalše zetkanje šefow krajow budźe 10. meje, na kotrymž wočakuja tež zwjazkoweho kanclera Olafa Scholza (SPD), kiž měł konkretne naprawy podpěry předpołožić.
Abituru přiměrja
Berlin (dpa/SN). Zwjazkowe kraje zasadźeja so za to, zo ma abitura w Němskej bóle přirunujomna być. Kultusowi ministrojo krajow wobzamknychu wčera w Berlinje, dojednanje gymnazialneho schodźenka změnić. Dojednanje wobsteji hižo wot lěta 1972 a je so hižo wjace króć přiměriło. Abiturne pruwowanje so njezměni, ale dźe wo kwalifikacisku fazu do toho. Tak dźe na přikład wo to, kelko klawsurow dyrbja šulerjo pisać abo kelko kursow so do abiturneho přerězka liča.
Trend pokročuje
Sakski ministerski prezident Michael Kretschmer (CDU) je wot Zwjazka ...
Za tiket hłosowali
Znowa stawkuja
Změna wólbneho prawa schwalena
Berlin (dpa/SN). Zwjazkowy sejm w Berlinje je dźensa reformu wólbneho prawa w Němskej wobzamknył. Koalicija SPD, Zelenych a FDP je ze swojim hłosami trěbnu jednoru wjetšinu hłosow docpěła. Z nowym zakonjom chcedźa na mjeztym 736 zapósłancow rozrosćeny zwjazkowy sejm dołhodobnje na 630 mandatow wobmjezować.
Do wothłosowanja je w sejmje k raznym diskusijam dóšło. Zastupnicy opozicije CDU/CSU, Lěwicy a AfD koaliciji wumjetowachu, zo chcyła zasady demokratiskich wólbow wotstronić. Po nowych prawidłach móže so stać, zo je kandidat w swojim wólbnym wokrjesu drje direktnje dobył, zo pak najebać to do zwjazkoweho sejma njezaćehnje. Nimo toho ma mjeza pjeć procentow kruće płaćić. Dotalne wuwzaća chcedźa wotstronić.
Woleny słuša do sejma
Demokratija je drohotna – štož towaršnosće bjez parlamentariskeje kontrole tež materielnje přisadźeja, móžeš po wšěm swěće widźeć. Debata wo zalutowanju něšto wjac zapósłancow zwjazkoweho sejma je směšna – wosebje hladajo na rosćacy personal ministerstwow. Dokelž dyrbi kóžde nowe knježerstwo „swojich ludźi“ instalować, bjeztoho zo bychu přiwisnikow stareho knježerstwa wotbyć móhli. „Reforma“ wólbneho prawa, přećiwo kotrejž opozicija protestuje, je podhladna.
Najjednoriša metoda, parlament pomjeńšić, by po modelu Wulkeje Britaniskeje, jedneje z najstaršich demokratijow, była, ryzy wólbow wosobow zawjesć: Štóž je we wólbnym wokrjesu direktnje woleny, zastupuje region w parlamenće. Amplowa koalicija je so za nawopačny puć rozsudźiła: Na dobro kandidatow lisćinow, kotrež su strony postajili, móhli jednotliwi direktnje woleni zwonka parlamenta wostać. To je podrywanje demokratije. Marcel Brauman
To a tamne (17.03.23)
Zwjazkowa policija je zwěsćiła, zwotkel 1 500 blešow palenca pochadźeja, kotrež su zastojnicy spočatk měrca na zwjazkowej awtodróze A 11 mjez Berlinom a Szczecinom při přepruwowanju dweju jězdźidłow namakali. Tak pokradnyštaj skućićelej připowěšak nakładneho awta w centrumje blisko Berlina, hdźež twory rozdźěluja. Wjace hač 220 kartonkow z originalnje zapakowanymi blešemi zeloweho likera, wódki a whiskyja běštaj Polakaj w nocy pokradnyłoj, jako šofer nakładneho awta spaše.
Britiski parlament ma wjele tradicijow. Tak smě sej financny minister škleńcu alkohola dowolić, hdyž swój etat w Delnjej komorje předstaji. Přičina toho je, zo ma swoje čuwy změrować. Amtěrowacy pokładowy kancler Jeremy Hunt wzda so zawčerawšim móžnosće a popřa sej město alkohola wodu. Dotal posledni financny minister, kiž w běhu narěče alkohol trjebaše, bě Ken Clarke (1993– 1997) – wón žadaše sej whisky.
