Aachen (dpa/SN). Wšitke zasadne prašenja w zwisku z nowej wšoněmskej jězdźenku za 49 eurow w bliskowobchadźe su zrjadowane. Tiket ma wot 1. meje płaćić a je wot spočatka apryla na předań. ­Tole je předsyda konferency wobchadnych ministrow, sewjerorynsko-westfalski šef ressorta Oliver Krischer (Zeleni), dźensa w rańšim magacinje ZDF připowědźił. Nadrobnosće chcychu w běhu dnja na nowinarskej konferency rozłožić.

Problemy načinjenja po słowach Krischera dale rozdźělne rjadowanja zwjazkowych krajow. Te poćahuja so mjez druhim na móžnosće transporta kolesow abo psow kaž tež wosebitych rjadowanjow za studentow.

Na posedźenju w Aachenje wuradźowachu wčera tež wo kontrolach pasažěrow na lětanišćach a wo dalšich pasmach w komunach z wobmjezowanej spěšnosću 30 km/h. Wobswětoškitny zwjazk BUND protestuje na městnje konferency přećiwo dalšemu wutwarej awtodróhow. Dźensa běchu tam dalše protesty organizacijow za škit klimy připowědźene.

Hamburg (dpa/SN). Swědkojo Jehowy chcedźa zajutřišim, sobotu, wopory amokoweho njeskutka w Hamburgu ­wopominać. Swjatočnosć wotměje so w sportowej hali měšćanskeho dźěla ­Alsterdorf, rěčnica swědkow Jehowy wčera zdźěli. Nimo přiwuznych žarowacych a přežiwjenych woporow su zastupnikow 53 Hamburgskich wosadow swědkow ­Jehowy kaž tež reprezentantow politiki a komunow přeprosyli. Wosada w Hamburgu-Winterhude prosy wo zrozumjenje, zo njeje žarowanska swjatočnosć městna dla dalšim wopytowarjam přistupna. „Smy městu Hamburgej jara ­dźakowni, zo móžachmy ze sportowej halu w Alsterdorfje kmanu městnosć njedaloko potrjecheneje wosady namakać. Po informacijach sćelaka NDR chce so tež prěni měšćanosta dr. Peter Tschentscher na swjatočnosći wobdźělić.

35lětny Philip F. bě před tydźenjomaj na zhromadźiznje wosady swědkow Jehowy w Hamburgu sydom ludźi zatřělił – mjez nimi njenarodźene dźěćo w maćernym žiwoće. Dźewjeć dalšich wosobow je při amokowym njeskutku zranił. Po tym je so sam morił.