Něhdźe 600 demonstrantow je wčera w Binzu na Rujanach přećiwo ...
Warnuja před sypnjenjom
Třo zranjeni w Ruskej
Zelenskyj žada sej čłonstwo w NATO
Kijew (dpa/SN). Ukrainski prezident Wolodymyr Zelenskyj je NATO namołwjał, na wjerškowym zetkanju w juliju wuhibki nastupajo přiwzaće kraja do zapadneho wojerskeho zakitowanskeho zwjazka stajić. Ani w Ukrainje, ani w NATO abo w Europje njeby wjetšina ludźi rozumiła, njeby-li Kijew „woprawdźe zasłužene přeprošenje“ dóstał, rjekny Zelenskyj wčera wječor w swojim wšědnym widejowym poselstwje. Do toho bě wón prěni króć po zahajenju ruskeje nadpadniskeje wójny před nimale 14 měsacami generalneho sekretara NATO Jensa Stoltenberga w Kijewje witał. Wopyt Stoltenberga w Ukrainje njeběchu připowědźili.
W rozmołwje ze Zelenskym je Stoltenberg jemu přiwzaće do NATO kaž tež dalšu wojersku pomoc w boju přećiwo Ruskej přilubił. „Ukraina ma prawo na městno w NATO“, wón rjekny.
Na wojerskim zepěranišću USA w němskim Ramsteinje su so dźensa zakitowanscy ministrojo čłonskich statow NATO zetkali, zo bychu wo dalšej pomocy na dobro Ukrainy wuradźowali.
Haj, ale pola nas tež nic!
To a tamne (21.04.23)
Při kramosćenju w „kisće darjenych wěcow“ je muž w Kielu tójšto pjenjez namakał. Policija rěči wo wysokej třicyfrowej sumje, kotruž bě 22lětny namakar wotedał. Nětko pytaja zastojnicy za wobsedźerjom pjenjez a jendźelskorěčneje knihi, kotraž jedna w 19. lětstotku.
Z cyłym kófrom kradnjeneje drasty je policija w kupnicy na Berlinskim Hermannowym naměsće paducha lepiła, kiž bě tež hišće pjany. 43lětny bě drastu minjenu nóc w kupnicy w měšćanskim dźělu Kreuzberg nahromadźił a do kófra stykał. Dokelž pak bě při tym alarm zawinował, ze swojej rubiznu daloko njepřińdźe. Wěstotna słužba kupnicy wołaše policiju, kotraž paducha na to zaja.
„Želniwje a ponižnje“
Zwjazkowy prezident Steinmeier wopory Waršawskeho zběžka wopominał
Waršawa (dpa/SN). Składnostnje 80. róčnicy Waršawskeho zběžka je zwjazkowy prezident Frank-Walter Steinmeier wo wodaće za wot Němcow skućene historiske złóstnistwo zničenja Židow prosył. Na wopomnjenskim zarjadowanju we Waršawje zhromadnje z pólskim prezidentom Andrzejom Dudu a israelskim prezidentom Izchakom Herzogom wuznawaše so wón wčera k zamołwitosći Němskeje, „kotraž nima žanoho kónca“. Zdobom dźakowaše so wón Pólskej a Israelej za wujednanje, kotrež njebychu Němcy takle poprawom wočakować směli. Tole je „njesměrnje drohotny dar“, kotryž měł so wobchować a do přichoda dale wjesć, Steinmeier rjekny.
Tehdy morjeni Židźa njebychu drje sej předstajić móhli „zo tu 80 lět pozdźišo stejimy, prezidenća Pólskeje, Israela a Němskeje, zo bychmy jich zmužitosć wuzběhnyli a zhromadnje swjaty slub ponowili: Nihdy wjace“, Steinmeier rjekny. Po kładźenju wěncow sej wšitcy třo prezidenća symbolisce ruku zawdachu, gesta to, kotruž bě sej Němska přała.
„Generalny podhlad šěrić nochcemy!“
Lipšćanscy wědomostnicy su so z wliwom předewzaćelow na prawicarske zmyslenje we wuchodnej Sakskej rozestajeli
Nimo towarstwow a organizacijow ciwilneje towaršnosće přewozmu hustohdy tež angažowani mali a srjedźni předewzaćeljo – runje we wjesnych kónčinach – towaršnostnu zamołwitosć. Podpěruja měšćanske swjedźenje a sportowe towarstwa, financuja wólbny bój abo su sami politisce aktiwni. W swojej poslednjej studiji su so wědomostnicy Instituta Else-Frenkel-Brunswick (EFBI) z wliwom předewzaćelow na prawicarske zmyslenje we wokrjesomaj Zhorjelcu a Budyšinje rozestajeli. EFBI je Lipšćanskej uniwersiće přirjadowany.
Planuja zlemjenje Berlina
Berlin (dpa/SN). Klimowi aktiwisća skupiny „Poslednja generacija“ su w Berlinje dźensa rano protestny pochod zahajili. Něhdźe 30 z nich ćehnjechu po informacijach nowinarjow spočatnje pomału po Dróze 17. junija a haćachu nadróžny wobchad. Při dalšim protestnym pochodźe běžeše 30 wosobow po hłownej dróze w Berlinje-Charlottenburgu. Po informacijach skupiny planuje něhdźe 800 aktiwistow přichodne dny w zwjazkowej stolicy akcije a blokady „k zlemjenju města“.
Na lětanišćach stawkowali
Düsseldorf (dpa/SN). Na wjacorych lětanišćach Němskeje dyrbjachu so pasažěrojo dźensa a jutře na zapozdźenja a wupady nastajić. Na lětanišćach w Düsseldorfje, Hamburgu a Kölnje/Bonnje su w nocy dwaj dnjej trajace warnowanske stawki zahajili. W Stuttgarće ma jutře cyłodnjowski stawk slědować. Do stawka namołwjeni su sobudźěłaćerjo wěstotneho wobłuka, kontrole pasažěrow a kontrole wačokow. Pozadk su tarifowe jednanja mjez dźěłarnistwom ver.di a dźěłodawarjemi wo wyšich přiražkach.
Digitalne ličaki zasadźić
Bołharska: Zakaz tworow Ukrainy
Sofia (dpa/SN). Po Pólskej, Madźarskej a Słowakskej je nětko tež Bołharska nachwilnje zakazała, ukrainske ratarske wudźěłki do kraja wozyć. Zakaz importa ma hač do kónc junija 2023 płaćić, zdźěli amtěrowacy ratarski minister Jawor Gečew wčera po wotpowědnym rozsudźe přechodneho knježerstwa w Sofiji.
Bołharscy ratarjo a producenća ratarskich wudźěłkow běchu sej minjene tydźenje z protestami a blokadami namjeznych přechodow k Rumunskej zakaz importa ukrainskich ratarskich wudźěłkow žadali. Producenća juhowuchodneho čłonskeho kraja EU skorža, zo njejsu swójske ratarske wudźěłki naprawow EU a tunich bjezcłownych ukrainskich importow dla hižo wubědźowanja kmane. „Wostanjemy solidarni z Ukrainu, dyrbimy pak swoju ratarsku industriju před bankrotom škitać“, rjekny nutřkowny minister Bołharskeje Galab Donew. Transit ukrainskich ratarskich wudźěłkow je runje tak kaž w Pólskej dale móžny.
