CDU do přichoda
Telefonat Zelenskeho „dobry signal“
Kijew (dpa/SN). Telefonat ukrainskeho prezidenta Wolodymyra Zelenskeho a chinskeho statneho prezidenta Xi Jinpinga su mjezynarodnje jako pozitiwny signal wuzběhnyli. Wotpowědne reakcije su z Berlina a Washingtona znate.
Ukrainski prezident sam rěči wo „dołhej a chětro rozumnej rozmołwje“. Xi a Zelenskyj staj wčera wječor prěni króć po ruskim nadpadźe na Ukrainu telefonowałoj. Z ruskim prezidentom Wladimirom Putinom je Xi porno tomu hižo wospjet rěčał. Kritikarjo Chinje wumjetuja, zo njeje w konflikće mjez Ruskej a Ukrainu neutralna, kaž so stajnje zaso twjerdźi a zo njeje inwaziju hač do dźensnišeho hišće zasudźiła.
Zwjazkowe knježerstwo chwaleše telefonat jako dobry signal. China ma jako kruty čłon Bjezstrašnostneje rady UNO „wosebitu zamołwitosć za skónčenje ludowe prawo ranjaceho wójnskeho nadpada Ruskeje na Ukrainu“, zdźěli rěčnik knježerstwa. Němska pozicija k wójnje je znata: „Zakład sprawneho měra w Ukrainje je cofnjenje ruskeho wójska.“
Swět započina so před durjemi
Sakski krajny sejm wo wuwićowej pomocy na juhu Afriki debatował
Drježdźany (dpa/SN). Sakska chce swoju wuwićowu pomoc dale wutwarić a w tym zwisku projekty towarstwow podpěrać. We wusko splećenym swěće njeje hižo žanych izolowanych problemow wjace, nawopak, rjekny šef statneje kenclije Oliver Schenk (CDU) wčera w krajnym sejmje. „Štož so dźensa w Africe a na tak mjenowanym globalnym juhu – potajkim we wuwićowych a prohowych krajach – stawa, nas cyle bjezposrědnje potrjechi.“ Wuwića w Europje so na druhim boku na globalnym juhu hnydom wuskutkuja. Jako přikład mjenowaše wón wuskutki wójny w Ukrainje na dodawanje žita do afriskich krajow. „Swět započina so před našimi durjemi. Jenož tón, kiž wostawa wotewrjeny za wuwića w druhich krajach, móže wliw a strategije wuwić, zo móhł na to reagować“, Schenk rjekny. “ Dźe wo to, wuwiće na městnje podpěrować, zo bychu tam puć do směra stability a perspektiwy do přichoda namakali. Za to měło so zrozumjenje za wužadanja globalneho juha sylnić.
Ignoranca wohańbja
To a tamne (27.04.23)
Nowa wosa nosy wot dźensnišeho mjeno ministerskeho prezidenta Badensko-Württembergskeje Winfrieda Kretschmanna (Zeleni). W Stuttgartskim přirodowědnym muzeju su nowu družinu wosy „Aphanogmus kretschmanni“ w přitomnosći knježerstwoweho šefa předstajili. Muzej hódnoći po tutym puću tež prócowanja Kretschmanna wo zachowanje mnohotnosće překasancow. Nowu wosu běchu w Tübingenje našli a w Stuttgarće přeslědźili.
Dźiwnu namakanku je policija w Šotiskej wuhladała. Při kontroli awta namakachu zastojnicy jehnjo – a wulke mnóstwa drogow. Zwěrjo přepodachu ratarjej. Dotal njewědźa, čehodla je w awće sobu jěło. Při kontroli awta reagowaše na drogi trenowany psyk. Na to namakachu tam kokain a heroin w hódnoće 11 300 eurow. Policija je třoch dealerow zajała.
Dalšich ludźi wuchowali
Berlin (dpa/SN). Zwjazkowa wobora je ze swojimi lětadłami dalšich 120 ludźi ze Sudana – hdźež raznje wojuja – wuchowała. Z tym je zasadźenje ewakuowanja oficialnje skónčene. Wojerske lětarstwo je minjene dny cyłkownje 600 ludźi ewakuowało, zakitowanske ministerstwo zdźěla. Dźensa chcyše zwjazkowy sejm wuchowanskej misiji zwjazkoweje wobory wotpowědny mandat spožčić.
Wólbny bój w USA zahajeny
Washington (dpa/SN). Ze swojim wčerawšim přizjewjenjom za druhi čas zastojnstwa prezidenta USA je Joe Biden wólbny bój oficialnje zahajił. Pola republikanow wšak je bywši prezident Donald Trump hižo loni w nowembru wotpowědnu poziciju zabrał. Mjez republikanami ma Trump drje wjacorych konkurentow, dotal pak 76lětny w stronje jasnje nawjeduje. Zahoritosć mjez ludźimi pak njeje wulka: Po woprašowanjach wjace hač 50 procentow wobydlerjow wo žanoho z wobeju kandidatow njerodźi.
Raznišo přećiwo aktiwistam
Alkohol a tobak jara rozšěrjenej
Berlin: Koalicija ma zrěčenje
Kijew žada sej Rusku chłostać
Kijew (dpa/SN). Ukrainski prezident Wolodymyr Zelenskyj je sej po najnowšich ruskich nadpadach na ciwilne objekty w Ukrainje žadał, sankcije přećiwo Moskwje dale přiwótřić. „Terorisća su so na domizniski muzej a wokolne domy měrili“, rjekny wón wčera w swojim wšědnym widejowym poselstwje. Do toho běštaj při raketowym nadpadźe na město Kupjansk na sewjeru Ukrainy dwaj wobydlerjej žiwjenje přisadźiłoj, dźesaćo so zranichu. Mjeztym je mjezynarodna skupina fachowcow dokument zdźěłała, kotryž wobjednawa móžne nowe sankcije přećiwo Ruskej, Zelenskyj připowědźa.
Wotpokazuja test seniorow
Berlin (dpa/SN). Rada za wobchadnu wěstotu Němskeje móžne winowatostne přepruwowanje jězbneje kmanosće seniorow wotpokazuje. Tole by nadměrne zasahnjenje do prawow ludźi było, rjekny rada powěsćerni dpa. „Sam z awtom jěć, woznamjenjatej najwjace ludźom njewotwisnosć a fleksibilita. Runje staršim ludźom je swójske awto wažny wobstatk wšědneho dnja“, gremij zdźěla.
Pozadk je tuchwilna debata wo planach komisije EU. Brüsselski zarjad bě je hižo spočatk měrca předstajił. Jedyn ze zaměrow je, dróhi EU wěsćiše činić. K tomu planuja tež nowe prawidła za seniorow. Při tym dźe po planach komisije wo to, zo ludźo nad 70 lětami po pjeć lětach sami posudźuja, hač su jězdźenja kmani abo du k lěkarskemu přepytowanju. Nimo toho chcedźa přesadźić, zo płaća wšitke jězbne dowolnosće, kotrež su po 19. januara 2013 přizwolene, jenož hišće 15 lět, komisija EU piše. Wot 70. žiwjenskeho lěta dyrbjeli šoferojo jězbnu dowolnosć po pjeć lětach podlěšić dać. Europski parlament a staty EU dyrbja so k tomu wuprajić a zhromadny kompromis namakać. Změny su hišće móžne.
