Berlin (dpa/SN). Organizacija za zhromadne dźěło hospodarstwa (OECD) přepoda wčera pruwowanskej rozprawje wo hospodarstwje a wobswětoškiće. W tutymaj rozprawomaj chwali OECD němske knježerstwo za přirodny škit klimy kaž tež za dobry krizowy management. Zwuraznichu pak tež, zo měło zwjazkowe knježerstwo raznišo jednać, chcyło-li klimowu neutralitu 2045 docpěć. Wosebje w sektoromaj wobchada a twara widźa eksperća potrjebu za polěpšenja, wšako tam klimowe cile njedocpěchu. We wobchadnym sektoru měło so na přikład wjace do kolijow a bliskowobchada inwestować, zo bychu wjesne kónčiny lěpje z městami zwjazali. Je pak tež pozitiwnych signalow. Tak kroči Němska při přirodnym škiće klimy a přiměrjenju přirody po prawym puću. Naprawy pak měli so hišće pospěšić a na přikład přez zaměrne subwencije podpěrować. Hospodarski minister Robert Habeck a wobswětowa ministerka Steffi Lemke (wobaj Zeleni) přiwzaštaj rozprawje. Habeck komentowaše: „Wo klimowej a hospodarskej politice dyrbimy zhromadnje rozmyslować a jej tež zhromadnje zwoprawdźić.“

Zhromadnje z konjom do tramwajki zalězł je muž w Stuttgarće. Na wjacorych widejach je widźeć, kak muž z cowboyjowym kłobukom a běłym lacom hač na nastupnišćo přijěcha. Tam wón z konja zalěze a zwěrjo při hłowojcy do tramwajki wjedźeše. Kuriozna scena je so njedźelu rano w Fellbachu sewjernje Stuttgarta wothrawała. Pječa pak je muž z konjom hnydom zaso wulězł, po tym zo běchu ludźo scenu ze šmóratkom nahrawali.

Hobersku słomjanu wutrobu je winicar w Stuttgarće swojimaj dźowkomaj wěnował. Na naddimensionalnej wutrobje stej mjenje Lotte a Ida čitajomnej. Wutroba njeje jenož wuznaće lubosće nana k dźowkomaj w starobje dweju a dźewjeć lět, ale je tež cyle praktiski srědk přećiwo zesuwanju zemje na nahłej skłoninje. Muž produkuje na swojim „Małym kuble“ wot lěta 2020 přirodne wino.

Dawidowu hwězdu dóstała

Drježdźany (dpa/SN). Nazymu 2021 załožena Židowska kultusowa wosada Drježdźany je mjeztym wo nimale dwě třećinje rostła. „Mamy wokomiknje něhdźe 200 čłonow“, rjekny rabi Akiva Weingarten w zwisku z připrawjenjom Dawidoweje hwězdy kónc apryla na wonkownej sćěnje domicila. W měsće su mnozy židźa, kotřiž do toho žanej wosadźe přisłušeli njejsu a su pola nich domiznu našli. „Studowacy, Israelića abo tež němscy židźa“. Ze starobnym přerězkom 28 lět je kultusowa wosada nimo toho młode zhromadźenstwo.

Dawidowu hwězdu je po słowach Weingartena Drježdźanska gratytwarska firma z drohowocla zhotowiła. Jako přewšo rědki mjenowaše rabi fakt, zo je „ultraortodoksny rabiner“ připrawił zdobom mesusu, kapslu spisow z tekstami, na pergamenće z biblije.

Přezcyłne sposrědkowanje serbšćiny wot pěstowarnje hač do matury we Wojerecach - tute žadanje běše najwažniša tema na posedźenju parlamentariskeje přirady Załožby za serbski lud w měsće.

Wojerecy (SN/mb). We wšěch wjesnych dźělach Wojerec nimo Hórnikec poskićuja dźěćom we Witaj-skupinach žiwu serbšćinu. Po pěstowarni móža na zakładnej šuli „Handrij Zejler“ po koncepće „2plus“ abo jako cuzu rěč serbšćinu wuknyć. Za přichodne šulske lěto je samo wjace přizjewjenjow hač městna k dispoziciji steja, tohodla je dalša wučerka serbšćiny njeparujomna, tak županka župy „Handrij Zejler“ Wojerecy, Gabriela Linakowa, w rozprawje parlamentariskej přiradźe zašły pjatk we Wojerowskim domje Domowiny. Tola z wuwučowanjom serbšćiny na dale wjeducych šulach klaca.