Wolij zaso dróši
To a tamne (04.04.23)
Policija měješe 77lětneho muža dla trochu dlěšu honjeńcu. W Braniborskej bě wón njezbožo zawinił a z městna njeskutka přez Saksko-Anhaltsku do Sakskeje ćeknył. Na zwjazkowej awtodróze A 9 blisko Lipska su zastojnicy jeho skónčnje zadźerželi, policija dźensa zdźěli. Tola 77lětny nochcyše so podwolić a hrozyše z rozbuchlinu, kotryž měješe w dwěmaj kófromaj w awće. Kaž so wukopa, tomu tak njebě. Muža dowjezechu skónčnje do psychiatriskeje chorownje.
Kuntwory su najwjac ludźom w lěću njepřećel. Tola Doreen Werner z Leibnizoweho centruma w Müncheberg so tele dny jara wjeseli. Kuntwory maja lětsa dobre wuměnjenja so wuwiwać. Tak lubuja włóžnotu a ćopłotu. Dešća drje mějachmy w nalěću dosć a tuž móža jejka we łužach abo włóžnej zemi wotkładować. Nětko su hišće ćopliše temperatury trěbne.
Prócuja so wo dialog
Genf/Vatikan (B/SN). Swětowa cyrkwinska rada chce dialog mjez ortodoksnej cyrkwju Ruskeje a Ukrainy a dalšimi za kulojtym blidom nastorčić. Wo tym su bamža Franciskusa informowali, zdźělištaj generalny sekretar Ekumeniskeje rady cyrkwjow (ÖRK) Jerry Pillay a ewangelski krajny biskop Bayerskeje Heinrich Bedford-Strohm.
Njeměr w Pólskej
Waršawa (B/SN). Telewizijna dokumentacija wo splažnych znjewužiwanjach w cyrkwinskim wobłuku zadźerženje něhdyšeho bamža Jana Pawoła II kritizuje. Nětko njewotwisna skupina specialistow statne a cyrkwinske archiwy přepytuje. Prezident Andrzej Duda wšak wuzběhuje: „Za nas Polakow je dopomnjeće na swjateho Jana Pawoła II. wažny wobstatk narodneho herbstwa.“
Bamž so za modlitwy dźakował
Habeck do Kijewa dojěł
Kijew (dpa/SN). Wicekancler Robert Habeck je so k politiskim rozmołwam do Ukrainy podał. Politikar Zelenych dojědźe dźensa rano z delegaciju zastupnikow hospodarstwa do ukrainskeje stolicy. Temy jězby su znowonatwar wot Ruskeje nadpadnjeneje Ukrainy a zhromadne dźěło na polu energije. Zmysł jězby je, Ukrainje jasny signal posrědkować, rjekny Habeck na Kijewskim dwórnišću, po tym zo bě ćah dojěł.
Podhladnu atentata zajeli
Pětrohród (dpa/SN). Po atentaće na znateho ruskeho wojerskeho blogera Wladlena Tararskeho w Pětrohrodźe je policija podhladnu zajała. Žona bě Tatarskemu wčera na zarjadowanju w kofejowni pozłoćanu postawu přepodała, w kotrejž bě bomba schowana, powěsćernja Interfax rozprawja. Při rozbuchnjenju bomby bu 40lětny Tatarski morjeny, wjace hač 30 so zranichu. Atentat je mjez knježacymi w Moskwje zludanje wubudźił.
Zelenskyj přińdźe do Waršawy
„Skupiny situacije znjewužiwaja“
Žitawa (dpa/SN). Po strašnej situaciji minjeny štwórtk w Žitawje je nětko dale a wjac detailow znate. Na demonstraciji přećiwo planowanemu přebywanišću za azyl pytacych z něhdźe 350 wobdźělnikami běchu so někotři z nich, zdźěla agresiwnje, na zjawne posedźenje měšćanskeje rady podali. „Policija je warnowała, zo móhła tajka situacija nastać“, wujasni Žitawski wyši měšćanosta Thomas Zenker (Zittau kann mehr). Tež w časach z napjatosćemi chcedźa zamołwići wobydlerjow zapřijeć a jim přistup k zjawnym posedźenjam zmóžnić. Zenker je na prašenja demonstrantow wotmołwjał. Nimo toho pak skedźbni wón na to, zo prawicarske skupiny ludźi znjewužiwaja. K demonstraciji běše strona „Freie Sachsen“ namołwjała.
„Wjele ludźi so powšitkowneje situacije dla starosća a su njewěsći“, Zenker rozkładźe. Přebywanišćo začuwaja jako wohroženje. Wyši měšćanosta prosy wo zrozumjenje a chce tež tajke situacije w Žitawje zmištrować.
Koaliciske zrěčenje předstajili
Berlin (dpa/SN). Sydom tydźenjow po wospjetnych wólbach w Berlinje stej CDU a SPD dźensa koaliciske zrěčenje předstajiłoj. Tři tydźenje su zastupjerjo zhromadnje jednali. W mjezyčasu chwalachu woni dobru atmosferu rozmołwow.
K ćežišćam noweho knježerstwa słušeja twar bydlenjow, program za škit klimy a reforma zarjadnistwa. Tež policija a wohnjowa wobora měłoj lěpše wuhotowanje dóstać. Woběmaj stronomaj je wažne pokazać, zo je město Berlin pisane a mnohostronske.
Hišće minjeny kónc tydźenja stej CDU a SPD na koaliciskim zrěčenju dźěłałoj. Naposledk dyrbjachu čłonojo wo financowanju rěčeć. Tež wšelake ressorty sej rozrjadowachu. Tak zamołwja CDU ressort wobswět, mobilita a škit klimy. Dale přewza strona senatne zarjady za kubłanje, financy, justicu a kulturu. SPD dósta zamołwitosć za wobłuki nutřkowne naležnosće, bydlenje a twarstwo, dźěło, socialne, hospodarstwo, strowotnistwo a wědomosć. Jako nowy wyši měšćanosta Berlina je krajny šef CDU Kai Wegner předwidźany.
Humor jako šulski předmjet
Diskusija a z njeje wuchadźacy kompromis „zakład demokratije“
Budyšin (CS/SN). Referent najmłódšeje „Budyskeje narěče“ bě minjeny pjatk z Wiena do Budyšina přijěł, zo by w tachantskej cyrkwi porěčał. Znaći běchu Hasnainej Kazimej prajili: „Ow božo, ty pojědźeš do Budyšina ... ?“ – jakož by so do „krizoweje kónčiny podał, hdźež drje něšto njetrjechi“. Tohodla chcyše „něšto wo Budyšinje zhonić“.
Po swojej zawodnej narěči bě tójšto prašenjow a statementow. Referent rjekny, zo so wón tež rady w socialnych medijach z wužiwarjemi rozestaja. To jemu woznamjenja, rozdźělne argumenty wotwažować a swójsku poziciju ewentualnje znowa postajić. „Njeměli so konflikta bojeć, přetož zwada je něšto dobre, dołhož njedóńdźe k skřiwdźenjam abo nadpadam. Diskusija je zakład demokratije. Njech pytamy za wurunanjom mjez wolu wjetšiny a mjeńšinu wobydlerstwa kaž tež mjez indiwidualnymi zajimami. Njeńdźe wo to, zo jedna strona ‚dobudźe‘, ale wo kompromis.“
Terminy sej dorěčeć III
Předań zahajena
Hooliganaj do jastwa
Drježdźany (dpa/SN). Nimale dwě lěće po dotal najhóršich namócnosćach koparskich chaotow w Drježdźanach je hamtske sudnistwo sakskeje stolicy dweju muži w starobje 48 a 39 lět k jastwu zasudźiło. Wobaj běštaj zaměrnje nowinskich fotografow nadběhowałoj a ćežko zraniłoj. Nimo toho nadawaštaj policistam „přeradnikow ludu“ a „sranych statnych słužownikow“. Před sudnistwom měještaj so wobaj strašneho zranjenja ćěła, ranjenja krajneho měra a spjećowanja přećiwo zastojnikam při přesadźenju porjada dla zamołwić.
Starši muž dyrbi lěto a dźesać měsacow do jastwa, młódši 15 měsacow bjez pruwowanskeho časa. „Wonaj staj fotografow bjez přičiny, spontanje a jara brutalnje nadběhowałoj“, sudnik při wozjewjenju wusuda minjeny štwórtk rjekny. Wón kritizowaše, zo njejstaj wobskorženaj njeskutk wobžarowałoj, ani so pola woporow zamołwiłoj. Na kromje domjaceje hry Dynama Drježdźany přećiwo Mnichowskemu mustwu Türkgücü bě w Drježdźanskim měšćanskim parku k masiwnym namócnosćam dóšło. Na wšě 185 policistow so při tym zrani.
