Kral je derje spinkał
Wulke wolóženje – to je wšo wobknježace začuće po wjerškowym zetkanju NATO w Den Haagu a wosebje po wotlěće prezidenta USA Donalda Trumpa do domizny. Žadyn skandal, žane wumjetowanja a žane fatalne sceny. Bohudźak, wšitko je derje wotběžało.
Nižozemscy hosćićeljo su wšitko činili, zo by so zapleńčenemu wysokemu hosćej z Ameriki derje šło. Trump je w kralowskim palasće přenocował a nižozemska kralowna jeho wosobinsce po Rotterdamje wodźeše. Při snědani bě wažne zwěsćić, hač je wón tež woprawdźe derje spał. Generalny sekretar NATO Mark Rutte wustupowaše kaž słužownik Trumpa. Čłonojo aliancy pěknje wobzamknychu, štož bě sej Trump přał: Hišće wjac pjenjez za brónjenje. Hłowna wěc, zo sej z nim njerozkidaja a zo wón Europu dale škita. Sym wćipny, kak dołho tute spodźiwne zwjazkarstwo dźerži. Jeli so jeho majestosć jutře při snědani zasrěbnje, móhło wšitko zaso hinak być. Marko Wjeńka
To a tamne (26.06.25)
Z laserowym pointerom su njeznaći minjenu nóc w Rheinbergu pola Düsseldorfa policajski helikopter slepili. W tym času běchu wjacore helikoptery po puću, zo bychu za zhubjenej wosobu pytali. Muža su njezranjeneho našli. Za čas akcije pilot jedneje z mašinow pytny, zo so na zemi něchtó ze sylnym laserom na njeho měri. Pilot alarmowaše policiju, kotraž skupinu ludźi zwěsći. Laserowy nastroj pak běchu hižo zrumowali. Pilotow helikopterow a lětadłow z laserom slepić je chłostajomny njeskutk.
Nimale štyri promile alkohola měješe šofer wosoboweho awta w kreji, jako při čerwjenej ampli do čakaceho nakładneho awta zrazy. Při dokumentaciji njezboža namakachu zastojnicy wjacore prózdne bleše alkohola a nimo toho drogi w awće. 40lětny dyrbješe krej a jězbnu dowolnosć wotedać. Wěcna škoda: 10 000 eurow.
Sankcije přećiwo Ruskej žadane
Den Haag (dpa/SN). Němska, Francoska a Wulka Britaniska dale na tym wobstawaja, z nowymi sankcijemi ćišć na Rusku we wójnje přećiwo Ukrainje zwyšić. Tole su zwjazkowy kancler Friedrich Merz, francoski prezident Emmanuel Macron a britiski premier Keir Starmer na wjerškowym zetkanju NATO w Den Haagu potwjerdźili. Prezident USA Donald Trump njeje so dotal k dalšim chłostanjam Ruskeje wuprajił.
Objekty jenož wobškodźene
Washington (dpa/SN). Nadpady USA na Iran njejsu Teheranski atomowy program skónčili, ale jenož wo někotre lěta zadźerželi. Tole wuchadźa z rozprawy tajneje słužby. W njej steji, zo njejsu ameriske bomby podzemske atomowe zawody Irana zničili ale jenož wobškodźili, medije USA rozprawjeja. Prezident USA Donald Trump bě bjezposrědnje po nadpadach twjerdźił, zo su atomowe objekty w Isfahanje, Natansu a Fordo dospołnje zničili.
Znowa mortwi w Gazy
Ze spektakularnej akciju su wobswětoškitarjo dźensa na centralnym ...
Dalše miliardy za brónjenje
Młoda unija šwika zadołženje
Spahn nahubnikow dla woprašany
Berlin (dpa/SN). Kritiske postupowanje při wobstaranju nahubnikow za čas koronakrizy bě dźensa hłowna tema w zwjazkowym sejmje. W etatowym wuběrku dyrbještaj bywši minister za strowotnistwo Jens Spahn a tuchwilna ministerka Nina Warken (wobaj CDU) prašenja zapósłancow wotmołwjeć. Wosebje prašachu so za rozprawu wurjadneje přepytowarki Margerety Sudhof, kotruž bě 2024 tehdyši strowotniski minister Karl Lauterbach zasadźił. Sudhof měješe wosebje kupowanje nahubnikow přepytować. Spahn bě swój čas nahubniki bjez wupisanja kupował. To je Němskej škodu wjacorych miliardow eurow naparało. Spahn pokazuje na wurjadne połoženje, kotrež je tehdy wšitkich zamołwitych w njewšědnej formje wužadało.
Předsydka BSW, Sahra Wagenknecht, předźěłanje koronakrizy w přepytowanskim wuběrku jako „politiku wukładneho wokna“ kritizuje. „Njeńdźe jenož wo nahubniki, ale wo njeprawdu, kotraž je so tehdy stała. Lockdown bě zdźěla dospołnje přehnaty“, wona kritizuje.
