Njeznaju nikoho, kotryž by ideju serbskeho parlamenta zasadnje za wopačnu měł. Tež wutworjenje serbskeje korporacije zjawneho prawa drje nima nichtó za zwoprědka špatnu wěc. Přiwšěm słyšiš tuchwilu na přewažnje serbskorěčnych wsach tójšto ludźi, kotřiž zwuraznjeja – raz wótřišo, raz zaćichim –, zo njejsu přezjedni z postupowanjom iniciatiwneje skupiny za tak mjenowany „Serbski sejm“. Chcył někotre mysle wo problematice sformulować:

Česću sej angažement kóždeho, kotryž so za Serbstwo zasadźuje. Widźu a připóznawam prócu a dźěło sejmarjow. Inicia­tiwa je docpěła ludźi, kotřiž njeběchu dotal w serbskej zjawnosći aktiwni. Sprěnja je to rjad Serbow zwonka Łužicy. Zdruha pochadźa nahladny dźěl sym­patizantow sejma z kónčin, hdźež serbska rěč a kultura dźensa skromnu rólu hra­jetej. Woni widźa w mjenowanej inicia­tiwje šansu, so zaměrnje na serbskim žiwje­nju wobdźěleć. Zestawa přiwisnikow pokazuje snano na – woprawdźite abo začuwane – dźěry w etablě­rowanych strukturach, kotrež dyrbjeli – a hodźeli – so zapłatać.

Nastupajo wólby Serbskeho sejma piše dr. Christiana Piniekowa z Choćebuza:

Dźakuju so redakciji SN za wotćišć wobkedźbowanjow Měrka Šołty wokoło wólbow Serbskeho sejma (SN z 19. oktobra 2018). Rěča mi z wutroby. Dodać chcyła, zo běchu so reformowe mocy Serbskeje narodneje zhromadźizny a Wěteńčanskeje iniciatiwy bohužel zateptali, wólby Serbskeho sejma su prěnje cyłoserbske wólby scyła.

Škoda, zo njejsu wšelake towarstwa wažnosć a móžnosće tutoho podawka hišće spóznali. Być přećiwo serbskemu wuznaću a być přećiwo wólbam je runjewon wuraz strachoćiweho wustupowanja, kotrež sylnja njewolerjow a wosłabja demokratiju.

Měrko Šołta z Budyšina: Serbski sejm – nowa šansa abo spočatk kónca?

Wěsty njeměr knježi tuchwilu w Budyskim Serbskim domje. Něšto so hiba, ale nic w nim. Něšto nowe serbske chce so załožić, a to bjez wotžohnowanja zarjada abo samo zwjazkoweho předsydstwa. Serbja maja sej swój sejm wolić. Wězo je to najprjedy jónu jeno zhromadźenstwo, něšto, štož ma a budźe so hakle skonstituować. Čehodla pak tajke přećiwnistwo? Čehodla sobu nječinja? Někotři maja tele wólby skoro za statnu aferu.

Wšelacy hižo nětko sejmej wumjetuja, zo njebudźe serbski dosć – cyła Domo­wina wobsteji hižo po połojcy z němsce rěčacych Serbow – a zo njebudźe jed­nan­ska rěč serbska – w zwjazkowym předsydstwje wjetšina sobustawow ze srjedźneje a Delnjeje Łužicy lědma něšto zapřim­nje, hdyž so tam hornjoserbscy mjez sobu wurěčuja – atd. Dale šěri so strach před němskej zjawnosću – zo móhli­ Němcy přewjele zhonić wo serbskej realiće, serbskich wobstejnosćach, snano samo napřećiwnych měnjenjach. A to w medijowym lětstotku!

Předsyda Praskeho Towarstwa přećelow Serbow (Společnost přátel Lužice – SPL) Lukáš Novosad měješe wobšěrny interview z předsydu Domowiny Dawidom Statnikom. Čěsko-serbski tekst (wobaj partneraj rěčeštaj w swojej maćeršćinje) bu w čisle 6/2018 časopisa Česko-lužický věstník wozjewjeny. Dawid Statnik dźakowaše so SPL za jeho skutkowanje. „Bjez SPL bychu Serbja byli wo wažneho zwjazkarja chudši“, je dźě wone „přewšo aktiwne a produktiwne towarstwo“, kotrehož skutk je „tež skutk słowjanskeje zhromadnosće“. Statnik zwurazni, zo njech „wostanje Serbski seminar dale trajny domicil SPL a zo SPL, Serbja a w samsnym domje zaměstnjeny sakski běrow dale dobre styki wudźeržuja“.