Budyšin (SN/at). Zwyša-li so klětu renty, dyrbi po wšěm zdaću dalšich 54 000 rentnarjow dochodowy dawk płaćić. Stat móže z dalšimi dochodami 300 milionow eurow ličić. To wuchadźa z wotmołwy zwjazkoweho financneho ministerstwa na prašenje frakcije Lěwicy w zwjazkowym sejmje. Ministerstwo piše dale, zo rozsudźa wo dokładnym zwyšenju rentow wot 1. julija 2018 hakle klětu w měrcu. Tuchwilu je rěč wo tym, renty na wuchodźe wo 3,2 procentaj a na zapadźe wo tři procenty zwyšić.

Tamna strona klětušeho zwyšenja renty je, zo su něhdźe 4,4 miliony wuměnkarjow winowate, na rentu dawk płaćić, skoro dwójce telko kaž w lěće 2005. Wosebje we wuchodnej Němskej překroči wjace rentnarjow bjezdawkowy minumum eksistency, kotryž wučinja 2018 za samostejacych 9 000 eurow a za poriki 18 000 eurow. Štóž leži z lětnej bruttorentu minus pawšale za wabjenske kóšty (102 euraj) a minus wosobinskeje rentoweje bjezdawkoweje sumy nad zakładnym­ bjezdawkowym přinoškom (klětu 9 000 eurow), je winowaty, financnemu zarjadej dawkowu deklaraciju zapodać.­

Dobre přeća a wočakowanja, ale tež kritika Michaelej Kretschmerej

Drježdźany (SN/at). Sakski krajny sejm je Michaela Kretschmera (CDU) wčera za noweho sakskeho ministerskeho prezidenta wuzwolił. Jenož 69 ze 77 hłosow koaliciskeju frakcijow bě za kandidata.

Prěni gratulant bě předsyda frakcije CDU Frank Kupfer, kotryž rjekny mjez druhim: „Přejemy sej dobre zhromadne dźěło a přilubimy Michaelej Kretschmerej jako knježerstwo nošaca frakcija swoju podpěru.“ Jeho kolega z SPD Dirk Panter skedźbni na wozjewjenje wotpohladow koaliciskeho wuběrka: „Budźemy we wobłukach kubłanje, wěstota, komuny, infrastruktura, wutwar spěšneho interneta kaž tež socialne a hladanje nowe puće namakać, zo bychmy wočiwidne problemy zmištrowali.“

Kretschmer njesměł so „wulkim wužadanjam kaž su to trěbny kónc wudobywanja brunicy a strukturna změna we wuhlowych regionach wotwlakować. Tak móhła so Sakska stać z pućrubarku za škit klimy a pokazać, kak inowatiwne, na přichod wusměrjene energijowe zastaranje funguje“, poruči frakciski předsyda Zelenych Volkmar Zschocke

Nětko to pomału něšto budźe. Tole sej zawěsće mnozy rjeknu, słyša-li, zo je mjeztym wjac hač 350 000 ludźi wobydlersku iniciatiwu Federalistiskeje unije europskich narodnych mjeńšin FUEN Minority SafePack podpisało. Derje tak! To poka­zuje mi zdobom, zo so tež prócowanja Serbskich Nowin wo iniciatiwu wudanja. W běhu měsaca 250 000 podpismow wjac měć, to je wukon, kotryž dyrbimy jasnje připóznać. Přiwšěm pak njeměli zabyć, zo je hač do miliona hišće tójšto powětra. Wobhladam-li sej statistiki online poda­tych podpismow jednotliwych krajow, so trochu hańbuju. W Němskej je hakle móličke štyri procenty trěbnych podpismow hromadźe. Druhdźe maja samo dźesać króć wjac hač trjebaja. Na čim pak zaleži? Wabjenje běži, ludźo podpisuja. Ale kelko ludźi dokładnje je w Němskej podpisało, njemóže nichtó prawje rjec. Dokładna ličba­ je zawěsće pohon. Janek Wowčer

Sowa je so do hale twornje VW w Braun­talu zadobyła a spjećuje so hižo tydźeń wšěm pospytam, ju wuswobodźić. Ptaka su w produkciskej hali za kolesyny wuhladali. Wutwarichu wokna, zo by so wón na swobodu dóstał, a sokołar spyta jeho won wabić. Kaž VW zdźěla, direktny strach za sowu njewobsteji. Po wšěm zda­ću ma w hali dosć cyrobizny. Kónc tydźenja znowa spytaja ju wuswobodźić.

Mały plastikowy bow połny drobnych pjenjez je 69lětna na dnju swj. Mikławša w sewjerorynsko-westfalskim Meerbuschu namakała a policiji donjesła. Kripo zwěsći bórze na to mějićela nimale 600 eurow: Spediter bě pjenjezy wot kupca kasěrował, na nakładnym awće wotstajił a na nje zabył. Krótko po tym, zo bě wot­jěł, padny bow z awta. Byrnjež so žona namakarskeje mzdy wzdała, je so jej předewzaćel z darikom dźakował.