William a Kate na wopyće w Pólskej
Merkel za kónc brunicy
Protesty přećiwo reformam
Pólske knježerstwo chcyło sudnistwa bóle kontrolować
Waršawa (dpa/SN). We wjacorych pólskich městach su ludźo kónc tydźenja za njewotwisnu justicu demonstrowali. Na najwjetšim zarjadowanju zhromadźi so we Waršawje něhdźe 5 000 ludźi před sejmom, delnjej komoru parlamenta. Po informacijach powěsćernje PAP wołachu woni „swoboda, runoprawosć, bratrowstwo, demokratija“. Protesty měrjachu so přećiwo dwělomnej justicnej reformje narodnokonserwatiwneho knježerstwa strony Prawo a sprawnosć (PiS).
Nawoda wobydlerskeho hibanja KOD Krzysztof Łoziński rjekny, zo je nětko posledni wokomik přišoł, postajenju diktatury zadźěwać. „Kóžda diktatura kónči so w teroru“, publicist w swojej narěči warnowaše. Tež konserwatiwne a opoziciske strony so na demonstracijach Komiteja k zachowanju demokratije (KOD) wobdźělichu.
Prud ćěkancow wobmjezować
Brüssel (dpa/SN). Wonkowni ministrojo krajow Europskeje unije su dźensa w Brüsselu wo tym wuradźowali, kak hodźał so prud ćěkancow z Libyskeje wobmjezować. Při tym w prěnim rjedźe na to mysla, zamóženje cwólbow pašowarjow blokować a zamołwitym zakazać do EU zapućować. Po wobličenjach EU běchu pašowarjo ludźi jeničce w Libyskej loni znajmjeńša 1,6 miliardow dolarow zasłužili. Ze sewjeroafriskeho kraja přińdźe přerěznje wjace hač 10 000 migrantow wob měsac po Srjedźnym morju do Europy.
Mjeztym je bayerska CSU swoje žadanje potwjerdźiła, zo njesměło wjace hač 200 000 ćěkancow wob lěto do Němskeje přińć, zo njeby stat přežadany był.
Motodrom kupili
To a tamne (17.07.17)
Do policajskeho awta prasnyła je 17lětna kolesowarka w Münsterskim kraju, dokelž njebě so na nadróžny wobchad, ale město toho na swój handy koncentrowała. Zastojnikam bě wona napadnyła, dokelž přez słuchatka hudźbu słuchaše a runočasnje mobilny telefon posłužowaše. Policisća holcu přesćahnychu a spytachu ju z trubjenjom na jeje lochkomyslne zadźerženje skedźbnić. Podarmo. 17lětna měješe woči jenož za handy, doniž do policajskeho awta njezrazy. Při tym so snadnje zrani.
Z energiskim znapřećiwjenjom je 86lětny muž w južnej Hessenskej rubježnika wotbył. Muž bě sej w předrumnosći banki kontowe podłožki wućišćeć dał, jako jeho zakukleny z pistolu wohrozy a sej žadaše, zo tysac eurow wotzběhnje. „Za to sym přestary“, rentnar znapřećiwi. Zadźiwany paduch so na to zminy.
Serbiska žada sej termin
Běłohród (dpa/SN). Serbiska, kandidat za přistup k EU, nochce dlěje čakać a žada sej datum za přistup k uniji. „Prajće, hdy mamy w čakarni być“, cituje Běłohródska knježerstwowa nowina Politika dźensa statneho prezidenta Aleksandara Vučića. Tón dwěluje, zo bě Bołharska, jako lěta 2007 Europskej uniji přistupi, za to zrališa hač Serbiska dźensa. Serbiska je wot 2012 oficialny kandidat za přistup. EU žada sej polěpšenja na polu justicy, medijow a prawostatnosće kaž tež lěpši poměr k něhdyšej serbiskej prowincy Kosowo.
Lěkarsku pomoc zapowědźili
Göttingen (SN). Towaršnosć za wohrožene ludy (GfbV) je zamołwitym w Chinje sobuwinu na smjerći lawreata Měroweho Nobeloweho myta Liu Xiaobo dała. Tak je tomu zadźěwała, zo směł wón kraj wopušćić a so we wukraju lěkować, dać. Tež w jastwje su jemu dosahacu lěkarsku pomoc zapowědźili, GfbV skorži. Liu bě so za zachowanje čłowjeskich prawow w Chinje zasadźał a bu tohodla wospjet k jastwu zasudźeny. Wón je wčera 61lětny na raka zemrěł.
Dźěćom strachi wuwědomić
