Berlin/Düsseldorf (dpa/K/SN). Zwjaz­kowy nutřkowny minister Thomas de Maizière (CDU) dźensa w Berlinje zdźěli, zo je po zawrjenju tak mjenowaneje balkanskeje čary nawal ćěkancow nahladnje wosłabnył. Hdyž bě w februaru hišće 61 428 migrantow ze Syriskeje a druhdźe do Němskeje přišło, tak je jich w měrcu jenož hišće 20 608 było. Zwjazkowy mi­nister za wuwiće Gerd Müller (CSU) liči z tym, zo nawali so bórze wjele ćěkancow z Afriki do Europy. „Po našich in­formacijach jeničce w Libyskej 100 000 do 200 000 Afričanow ze statow južnje Sahary na wućek do Europy čaka.“ Mi­nister wupraji so za cyłoeuropski plan k zmištrowanju migraciskeje krizy.

Berlin (dpa/SN/MkWj). Krajna synoda Ewangelskeje cyrkwje Berlin-Braniborska-šleska Hornja Łužica (EKBO) schadźuje so dźensa a jutře k nalětnim wuradźowanjam. Krajna synoda je najwyši nawjedowacy organ EKBO. Parlament ma 114 čłonow a zastupuje wjace hač milion wěriwych w 1 289 wosadach.

Wuradźować chcedźa synodalojo mjez druhim wo móžnym zmandźelenju jenakosplažnych partnerow. Dotal zmóžnjeja tajkim partnerstwam jeničce cyrkwinske žohnowanje, nic pak wěrowanje. Někotre cyrkwinske wokrjesy, mjez nimi tež łu­žiske, běchu sej do synody žadali, temu z dnjoweho porjada šmórnyć.

Synodalojo chcedźa tež wo krediće 3,25 milionow eurow za nowonatwar Podstupimskeje Garnizonskeje cyrkwje rozsudźić. Za čas NDR rozbuchnjeny Boži dom nochcedźa hižo po originalu natwarić, jeničce wěža ma po historiskej předłoze znowa nastać. Runje wo tym běchu diskusije wudyrili, wšako je cyrkej mnohim symbol pruskeho militarizma.

Drježdźany (dpa/SN). Politologa Werner Patzelt před tym warnuje, Alternatiwu za Němsku (AfD) w krajnych sejmach politisce wumjezować. „Štóž chcył AfD dale spěchować, ma jej jenož dale wšitke móžnosće dać, hdyž so z njej wobsahowje njerozestaja“, rjekny na Drježdźanskej techniskej uniwersiće wuwučowacy profesor politiki powěsćerni dpa. „Z ignorowanjom docpěješ runje to nawopačne toho, štož poprawom chceš.“

Při wólbach krajnych sejmow 13. měrca bě AfD w Saksko-Anhaltskej 24,3 procenty zdobyła, w Badensko-Württembergskej 15,1 a w Porynsko-Pfalcy 12,6 procentow. Tak je prawicarskopopulistiska strona nětko we wosom krajnych sejmach zastupjena. Z AfD so njerozestajeć by dospołne ignorowanje wolerjow było, je sej Patzelt wěsty. „Je trjeba so z tutej stronu rozestajeć.“ Zdobom wón před tym warnuje, tutej stronje wšelake zastojnstwa w parlamenće zapowědźić. To wjedźe jenož k dalšemu solidarizowanju z AfD a móhło so negatiwnje na etablěrowane strony wuskutkować.

Drježdźany (SN). Frakcija Zwjazk 90/Zeleni w Sakskim krajnym sejmje kritizuja přemotorizowanje knježerstwowych wozydłow. „Ministerski prezident Stanisław Tilich zasłuža sej ‚čerwjenu kartu‘ za hoberski wustork wuhlikoweho dioksida swojeho słužbneho awta, štož je 197 gramow na kilometer. 4 500 słužbnych awtow­ sakskich ministerstwow tohorunja wo wjele lěpje njewotrěznje“, rěka w zdźělence. Zakład kritiki je wotmołwa nutřkowneho ministra Markusa Ulbiga (CDU) na małe naprašowanje rěčnicy za wobchadnu politiku Katje Meier. „Europska unija je zhotowjerjam Pkw-jow cil stajiła, emisije awtow hač do lěta 2015 na přerěznje 130 g/km pomjeńšić, hač do lěta 2020 na 95 g/km. Wozydłowy park statneje kenclije z přerěznje 172 g/km předpisy EU raznje překroča. Tež kultusowe a nutřkowne ministerstwo z CO2-bilancu 155 g/km negatiwnje napadnjetej“, kritizuje Katja Meier. Jenož hospodarskeho ministra Martina Duliga (SPD) zapósłanča chwali. Wšako jeho hybridne awto jenož 65 g/km wustorkuje.