Z cyłym kilogramom kokaina w nadrach su žonu na Frankfurtskim lětanišću lepili. Rěčnik cłownistwa je wotpowědne powěsće nowin dźensa wobkrućił. Žona bě z kolumbiskeje stolicy Bogotá do Frankfurta přilećała. Implantaty z kokainom su jej mjeztym we wjacore hodźiny trajacej operaciji z nadrow wotstronili. Kak běchu so žony dohladali, nochcyše rěčnik cła přeradźić.
Wopačna bankowka je w Annabergu-Buchholzu wikowarja drogow přeradźiła. 26lětny bě we wobchodźe z falšowanej 50eurowskej bankowku zapłaćił. Muž, kotrehož policija krótko na to zaja, měješe hišće dalše tři wopačne bankowki při sebi. Přepytujo jeho bydlenje nańdźechu zastojnicy drogi, 2 000 eurow, brónje a hišće wjac falšowanych bankowkow.
Mjenje studentow bjez matury
Zły Komorow (dpa/ch/SN). Přećiwo zwjazkowemu trendej je w Braniborskej ličba wysokošulskich studentow bjez matury woteběrała. 710 ludźi bjez wysokošulskeje abo fachoweje wysokošulskeje zrałosće bě po najnowšim zwěsćenju lěta 2014 na markowskich wysokich šulach zapisanych. Lěto do toho bě jich hišće 772, kaž z datow Centruma za wysokošulske wuwiće (CHE) wuchadźa. Hišće jasnišo je woteběracy trend w prěnich semestrach widźeć. Ličba spadny wot 187 (2013) na 133 (2014). Tak zaběra Braniborska po cyłym Zwjazku nastupajo studentow bjez matury 9. městno. Po wozjewjenju CHE měješe wona wot lěta 1997 do 2013 hišće přiběracu ličbu studijnych započatkarjow bjez matury.
Podpěruja kliniku za žony a dźěći
Emden/Drježdźany (B/SN). Z cyłoněmskej konferencu w Emdenje je Ewangelska reformowana cyrkej Němskeje zahajiła podralětny „proces do přichoda“. K zetkanju w Jasco bibliotece zetka so 200 delegowanych ze sewjerozapada kaž tež z Bayerskeje a Sakskeje. Cyrkej steji před daloko sahacymi změnami: Ličba sobustawow woteběra a tak tež dochody, rjekny jeje cyrkwinski prezident Martin Heimbucher. 145 wosadow po cyłej Němskej z dohromady 180 000 sobustawami je tuž namołwjene, přichod swojeje cyrkwje aktiwnje wuhotować.
Myto za integraciju
Essen (B/SN). 12. raz je črijace předewzaće Deichmann wupisało Spěchowanske myto Deichmanna za integraciju. Na zahajenju z 100 000 eurami dotěrowaneje cyłoněmskeje akcije rjekny patronka Nazan Eckes, zo je integracija hladajo na trajace připućowanja tak aktualna kaž ženje do toho. „Wona pak jenož funguje, hdyž so kóždy w towaršnosći praša: Što móžu ja přinošować?“, wuzběhny Eckes. Spěchowanske myto spožčeja šulam, iniciatiwam kaž tež małym a srjedźnym předewzaćam, staracym so wo zanjechanych młodostnych.
Wubědźowanje dobył
Brüssel (dpa/K/SN). Dramatiski a dołho trajacy bě wurjadny wjeršk šefow statow a knježerstwow krajow Europskeje unije, doskónčne zrěčenje z Turkowskej wo ćěkancach njejsu tam přiwšěm docpěli. K tomu ma nětko na přichodnym wjerškowym zeńdźenju 17. a 18. měrca dóńć. Trěbne su hišće dźěła za definitiwne dojednanja, rjekny němska kanclerka Angela Merkel (CDU) po dwanaćehodźinskich wuradźowanjach w Brüsselu.
Na wjeršku z turkowskim premierom Ahmetom Davutoğluwom dźěše wo wobšěrny paket, wobmjezować nawal ćěkancow do Europy. Davutoğlu předpołoži njenadźicy daloko sahace plany, na kotrež rjad šefow EU njebě přihotowany. „Nimam žanych dwělow, zo njedocpějemy doskónčny wuspěch“, šef wjerška Donald Tusk dźens rano zeńdźenje bilancowaše. „Dny njerjadowaneje migracije do EU su nimo“, wón praji. Davutoğlu rjekny: „Swoje přilubjenja wšitke spjelnimy.“