Chamilos/Skopje/Wien (dpa/K/SN). Dokelž so połoženje ćěkancow w sewjero- grjekskich lěhwach špatneho wjedra dla njepřestajnje pohubjeńša, hlada dale a wjace z nich, dóstać so do Makedonskeje, často w straše wo žiwjenje. Z lěhwa Idomeni nastajichu so wčera sta ludźi na puć, přeprěčejo dźiwje zachadźacu hraničnu rěku. Na makedonskej stronje wšak jich policija nablaku zadźerža. Mjeztym zo bě so něhdźe 2 000 ćěkancam poradźiło hranicu přeńć, su so třo w rěce zatepili. Grjekscy policisća běchu hišće spytali tychle zadwělowanych ludźi zadźeržeć, jich próca pak bě podarmotna, a tak su jim ćahnyć dali.
Tak mjenowany geocache, schowany objekt w přirodźe, je w Hessenskej zasadźenje policije zawinił. Swědcy běchu skupinu ludźi při štomje wobkedźbowali, kotřiž so napadnje spěšnje wotsalichu. Při štomje wuhladachu na to z grotom zwjazanej role z plasty. Přiwołana policija skaza wosebitu jednotku, zo by podhladny objekt rozbuchnyła. Z pomocu röntgenoweho nastroja pak geocache jako tajki identifikowachu. Geocaching je hra, při kotrejž dyrbiš w přirodźe schowany předmjet z pomocu GPS-nastroja namakać.
Nowu „kralownu kćenjow“ pyta krajny zwjazk Sakski sad. Kralownu chcedźa, mjeztym 20. króć, 7. meje w Röhrsdorfje we wokrjesu Sakska Šwica-wuchodne Rudne horiny krónować. Přizjewić móža so zajimče wot 18 lět. Kralowna budźe so potom na wšelakich wikach a wustajeńcach prezentować.
Wulke nalětnje rjedźenje
Rań (dpa/ch/SN). W Braniborskej steji přichodnu sobotu w mnohich městach wulke nalětnje rjedźenje na planje. Čestnohamtske akcije zarjaduja mjez druhim w Ranju (Großräschen) a Choćebuzu. Organizatorojo wočakuja znowa mnohich dobrowólnych pomocnikow a čiłe wobdźělenje towarstwow. Tak rjedźa na přikład dźěćace přebywanišća a šule. W Ranju maja so mjez druhim zelenišća a twarjenja wohnjoweje wobory porjeńšić, w Choćebuzu chcedźa kolije a zastanišća parkoweje železnicy po zymskej přestawce rjedźić. W NDRskim času běchu hišće „subotnik“ zarjadowali – njepłaćene dźěłowe zasadźenje wokoło narodnin nawody dźěłaćerjow Ernsta Thälmanna. Dobrowólne akciske dny porjeńšenja we wuchodnej Němskej so na tejle tradiciji orientuja.
Sobudźěłaćerjej wupowědźili