Dohna (dpa/SN). Plahowarjo sadu w Sakskej a Saksko-Anhaltskej hospodarskich sankcijow přećiwo Ruskej dla wosebje ćerpja. Dotal běchu hač do wosom procentow swojich jabłukow do Ruskeje wuwožowali, rjekny jednaćel krajneho zwjazka Sakski sad Udo Jentzsch powěsćerni dpa. To je poměrnje wjele: W cyłoněmskim přerězku pak su plahowarjo sadu jenož dwaj procentaj do Ruskeje předawali. Nimo toho su so płaćizny drastisce znižili, po tym zo je Ruska w lěću 2015 zakazała, ratarske wudźěłki z Europskeje unije dowožować. Nětko mjenujcy přińdu mnóstwa płodow z Pólskeje na wiki, kotrež bychu hewak Ruskej předawali. „To je płaćiznowa konkurenca, kaž ju wjace dołho njeznjesemy“, jednaćel rozłoži. W minjenej sezonje su ratarjo jenož hišće 20 do 30 centow na kilo jabłukow wuzbytkowali. To njedosaha, zo bychu so kóšty znajmjeńša wurunali. Ze zakazom­ importa reagowaše Ruska na sankcije EU a USA, wukazane lěta 2014 ruskeje politiki na Ukrainje a aneksije połkupy Krim dla.

W hotelu randalěrowało je cyłe koparske mustwo minjenu nóc w durinskim Bad Blankenburgu. Z pomocu policije so nawodnistwu hotela skónčnje poradźi, muži z domu ćisnyć. Woni běchu pjeni druhich hosći hotela wobćežowali a jim wudma nadawali. Nimo toho mjetachu w hosćencu hotela ze stólcami a wobškodźichu durje. Policija zapisa sej perso­nalije randalěrarjow. Hdźe je mustwo po tym­ přenocowało, njeje znate.

Bjez wuspěcha wosta ćěkańca swinjeća před rěznikom w Hornjej Pfalcy. Skoćo bě na parkowanišću při awtodróze A 3 z nakładneho awta twochnyło, kotrež bě po puću do rězarnje. Šofer to ani nje­pytny a po přestawce wotjědźe. Policisća nańdźechu swinjo tři kilometry dale w přirowje, ćežko zranjene. Prawdźepo­dobnje bě wone někomu do awta skoćiło. Skótny lěkar je wot čwělow wumóži.