Zapalerjow wuslědźić je ćežko
Zhorjelc (SN/mwe). Zhorjelske statne rěčnistwo je wčera popołdnju nowinarjow na rozmołwu přeprosyło. Hłowna přičina bě, zo chcyše so dotalny nawoda institucije, wyši statny rěčnik Martin Uebele, ze žurnalistami rozžohnować. Wón přewozmje 1. apryla w Kamjenicy wažnu funkciju jako prezident hamtskeho sudnistwa. Nimo powšitkownych informacijow, zo njeje so ličba jednanjow w Zhorjelcu porno lońšemu wulce powjetšiła, zo dyrbjachu tež w Budyskim wokrjesu 2015 wjele wjace deliktow drogow dla registrować a zo njeskutki našćuwanja ludnosće w interneće mócnje přiběraja, móžachu nowinarjo prašenja k „lokalnym naležnosćam“ stajeć.
Tysacy ludźi su so dźensa na Brüsselskim naměsće Place de la ...
Za třećim atentatnikom pytaja
Steinmeier w Moskwje
Lětsa kónc w Holešowje
Prěnje přebywarnje ćěkancow w běhu lěta zawru, wšako zrěčenja wuběža
Budyšin (SN/at). Rozprawnistwo nowiny Bild, kotraž piše w dźensnišim wudaću „Husarenhof njebudźe wjace dom za požadarjow azyla“, Budyski krajnoradny zarjad dementuje. Dotal njeje doskónčnje rozsudźene, hač a w kotrym wobjimje twarjenje za zaměstnjenje ćěkancow wužiwaja, rěka w nowinskej zdźělence.
Nastupajo Husarenhof je 1. přirjadnik krajneho rady Udo Wićaz (CDU) zawčerawšim na posedźenju wokrjesneho sejmika informował. Dom C chcedźa z maksimalnje 88 městnami wužiwać. Wokrjes pak njeje tuchwilu zajimowany, wupalenej domaj A a B po nowonatwarje kónc 3./spočatk 4. kwartala za zaměstnjenje ćěkancow wužiwać. W rozmołwje z mějićelom ležownosće ma so tale pozicija sposrědkować.
Na ćeže skedźbnili
Drježdźany (SN). Zastupnicy iniciatiwy za demokratisce legitimowane zastupnistwo Serbow – Serbski sejm su zastupjerjow frakcije Lěwicy w Sakskim krajnym sejmje informowali, kajki je staw prócowanjow wo samopostajowanje Serbow. Na rozmołwu minjeny pjatk w Drježdźanach bě frakciski předsyda Lěwicy Rico Gebhardt přeprosył.
Kaž zdźěla rěčnik iniciatiwy dr. Měrćin Wałda, bě wuchadźišćo diskusije Erfurtski program cyłoněmskeje Lěwicy z lěta 2011, w kotrymž sej mjez druhim žadachu wutworić wuměnjenja, zo móhła so „identita, rěč a kultura mjeńšin“ dale wuwić. Lěwica zasadźa so tohorunja za prawo „samopostajowanja mjeńšin“, wo jich lěpšu reprezentancu kaž tež wo sobuskutkowanje na wšěch towaršnostnych runinach, rěka mjez druhim w nowinskej zdźělence iniciatiwy. Drježdźanscy lěwicarjo so Erfurtskemu programej přizamkuja, Gebhardt iniciatiwnikam potwjerdźi. Woni skedźbnichu pak tež na ćeže, w naležnosći zjawnje a swobodnje w Serbach rěčeć. Lěwicarjo su na dalšej diskusiji zajimowani a chcedźa wuwićowy proces přewodźeć.
To a tamne (23.03.16)
25 tonow železniskich kolijow su paduši w mecklenburgsko-předpomorskim Salemje pokradnyli. Kolije słušachu k železniskej čarje, kotruž tuchwilu demontuja, zdźěli za wottwar zamołwita firma. Dźěłaćerjo běchu kolije před dnjemi wutwarili a šěsć metrow dołhe dźěle składowali. Kóždy tajki waži 325 kilogramow. Paduši su prawdźepodobnje ćežku techniku wužiwali. Cyłkownu hódnotu kolijow trochuja na 4 000 eurow.
Spodźiwny sudniski pad: Hessenske zarjadniske sudnistwo měješe dźensa rozsudźić, hač dyrbi Zwjazkowa banka žonje pjenjezy narunać, kotrež bě wona sama roztřihała. Mjeztym 90lětna žada sej 18 500 eurow. Prěnja instanca je tole wotpokazała, dokelž bě dźě žona wotpohladnje jednała. Dokelž pak móhło być, zo bě zawjerćana, dyrbi nětko zarjadniske sudnistwo rozsudźić.
Łužica (23.03.16)
Na čas žiwjenja zasudźeny
Zhorjelc (dpa/ch/SN). Swójbny nan bu za smjertnu jězbu ze swojimaj małymaj dźěsćomaj wot Zhorjelskeho krajneho sudnistwa mordarstwa dla z jastwom na čas žiwjenja zasudźeny. Komora zwěsći nimo toho wosebitu ćežu winy, praji wčera rěčnik sudnistwa. Tak njehodźi so zbywace chłostanje po 15 lětach awtomatisce na pruwowanje na čas wusadźić. 47lětny bě w septembru na zwjazkowej dróze B 6 ze spěšnosću 150 km/h z awtom wotpohladnje do dweju štomow zrazył. Při tym staj jeho štyrilětna dźowka a pjećlětny syn žiwjenje přisadźiłoj, wón sam pak přežiwi. „Wobskorženy je dźěsći znjewužiwał, zo by swoju mandźelsku pochłostał, kotraž bě jeho wopušćiła“, podšmórny rěčnik.
Mjenje zrěčenjow
Caritu podpěrać
Magdeburg (B/SN). Zo njebychu čestnohamtske projekty Carity z financnych přičin zwrěšćić trjebali, eksistuje wot lěta 2010 fonds Carity w zwisku z awtotwarcom Hyundai. Tón podpěruje něhdźe 40 skupin po tysac eurach wosebje za projekty, kotrež spěchuja socialny angažement młodych ludźi, jich mjezsobne zeznaće abo kubłanske šansy. Próstwy stajić za prěnje poł lěta hodźa so hač do 31. měrca pod www.caritas.de/ehrenamtsfonds/sozialcourage.
Cyrkwi zasudźatej hidu
Drježdźany (B/SN). Wobě wulkej cyrkwi w Sakskej stej zasudźiłoj njepřećelske zjawy cuzym napřećo w Clausnitzu a Budyšinje. „Werbalne a psychiske wohroženje ludźi, kotřiž w našim kraju za škitom pytaja, a ludźi, kiž chcedźa jim škit skićić, njeměła naša towaršnosć na lochke ramjenja brać“, rěka w zhromadnej deklaraciji. Podawkaj stej „pokazałoj hrózbnu hidu dźělow ludnosće ćěkancam napřećo, štož će zastróža a rudźi“. Křesćenjo Sakskeje začuwaja wosebitu winowatosć, so dale angažować za ludźi w nuzy a ćěkancow.
Loni 223 konfliktow na swěće
Teror w Brüsselu
Bombowe nadpady w belgiskej stolicy – znajmjeńša 34 smjertnych woporow
Brüssel (dpa/SN). Při bombowych nadpadach w belgiskej stolicy Brüsselu je dźensa znajmjeńša 34 ludźi zahinyło. Wjace hač 135 wosobow so zrani, kaž belgiska powěsćernja Belga rozprawja. Wokoło 8 hodź. stej na lětanišću Zaventem dwě bombje rozbuchnyłoj. Při tym zemrě znajmjeńša štyrnaće wosobow, 81 so zrani. Zachodna hala lětanišća bu sylnje wobškodźena. Něšto pozdźišo rozbuchny w metrostaciji Maelbeek w bjezposrědnim susodstwje institucijow Europskeje unije dalša bomba. Wona mori znajmjeńša 20 a zrani 55 ludźi. Po dotalnych dopóznaćach jednaše so wo terorowe nadpady.
