Wjeršk wo wěstoće w ćahach
Berlin (dpa/SN). Po smjertnym nadpadźe na sobudźěłaćerja železnicy w Porynsko-Pfalcy je Němska železnica zajutřišim, pjatk, na wjerškowe zetkanje wo wěstoće w ćahach přeprosyła. Tam wočakuja zastupnikow zwjazkoweho knježerstwa, policije, železnicy, krajow a nadawkidawarjow regionalneho wobchada kaž tež dźěłarnistwow. Zwjazkowy minister za wobchad Patrick Schnieder (CDU) so tohorunja wobdźěli. Schadźować chcedźa so w centrali železnicy na Podstupimskim naměsće w Berlinje.
Nawodnica železnicy Evelyn Palla bě wjeršk minjeny tydźeń jako reakciju na njeskutk připowědźiła, při kotrymž bu 36lětny železnicar při kontroli jězdźenkow smjertnje zbity.
Tarifowe jednanja w Podstupimje
Podstupim (dpa/SN). W tarifowym rozestajenju wo zjawnu słužbu zwjazkowych krajow bliži so móžne rozrisanje. Minjene dny běchu dźěłarnistwa a přistajeni ze stawkami a demonstracijemi swoje žadanja po wšej Němskej potwjerdźili. Dźensa su so dźěłarnistwa a dźěłodawarjo w Podstupimje na nowe wuradźowanja zešli. Pozicije wobeju stron pak su hišće chětro rozdźělne. Tuž njewočakuja, zo so spěšnje dojednaja. Wuradźowanja móhli bjeze wšeho hač do soboty trać, wobkedźbowarjo měnja.
Dźěłarnistwo ver.di a Zwjazk zastojnikow žadatej sej za wjac hač 900 000 ludźi, kiž je po tarifje pola krajow přistajenych, měsačnje sydom procentow wjace mzdy, znajmjeńša pak 300 eurow přidatnje. Rjadowanje chcedźa adekwatnje za zastojnikow nałožować. Dźěłodawarjo žadanja jako dospołnje přehnate wotpokazuja.
W Podstupimje mějachu so wobdźělnicy ducy do hotela, hdźež so wuradźowanja wotměwaja, z wobchadnymi ćežemi bědźić: Dźěłarnicy swoje žadanja tak hišće raz potwjerdźichu.
NATO z Čěskej njespokojom
Lukáš Novosad rozprawja wo aktualnje rozjimanych temach w Čěskej
Praha. Čěska ma problem: USA so mjenujcy na nju mjerzaja, dokelž nochce Praha swoje wojerske budgetowe zawjazki nastupajo NATO spjelnić. Wotpowědnych kritiskich přispomnjenjow ze stron USA je dale a wjace.
Wonkownemu ministrej Petrej Macinkej je generalny sekretar NATO Mark Rutte při jeju poslednim zetkanju w Brüsselu prajił, zo njebudu přichodne rozmołwy hižo tak přećelne, jeli Čěska swoje nastajenje nastupajo spjelnjenje wojerskich nadawkow spěšnje njezměni.
Spěwać a diskutować
To a tamne (11.02.26)
Ralf Schumacher, bywši pilot Formule 1, a jeho partner Étienne chcetaj so zmandźelić. Tole wonaj w interneće wozjewitaj a so zdobom za wutrobne zbožopřeća dźakujetaj. Nadrobniše informacije dotal wozjewić nochcetaj. Ralf Schumacher, bratr sydomkróćneho swětoweho mištra Michaela Schumachera, bě so w juliju 2024 k swojej homoseksualnosći wuznał a swojeho partnera zjawnje předstajił.
Bjez woza přećiwo Putinej poćahnu póstnicarjo lětsa róžowu póndźelu po Kölnje. „To njeje žadyn zmylk“, rjekny nawoda ćaha Marc Michelske powěsćerni dpa. W Kölnje su so lětsa rozsudźili, tutu temu twarcej wozow Jacquesej Tillyjej přewostajić. Strach před represalijemi Ruskeje njebě žana přičina, kaž twjerdźa. Přećiwo Tillyjej je ruska justica toho šćipateje satiry dla chłostanske jednanje zahajiła.
Philipp Raimund sensacionelnje sej złotu medalju w skakanju zdobył
Třeći wubědźowanski dźeń Olympiskich zymskich hrow w Italskej postaješe z wida Němskeje skok, kotryž móhł do olympiskich stawiznow zańć. Němski sněhakowarski skakar Philipp Raimund docpě na normalnym skakanišću w Prezzo złoto a krónowaše z tym dźeń, na kotrymž němscy sportowcy we wjacorych disciplinach prědku sobu měšachu.
Raimund wobchowa we woběmaj přechodomaj sylne čuwy. Z 274,1 dypkom doby wón před Kacperom Tomasiakom z Pólskeje. Bronza dźěše na Rena Nikaidō z Japanskeje a Gregora Deschwandena ze Šwicarskeje, kotrajž měještaj samsnu ličbu dypkow. Topfaworit Domen Prevc ze Słowjenskeje wosta bjez medalje. Wubědźowanje muži na wulkim skakanišću wotměje so sobotu.
Francoska so wo Kurdow stara
Erbil (SN). Wonkowny minister Francoskeje Jean-Noël Barrot je w kurdiskej kónčinje Iraka ze zastupjerjemi samozarjadnistwa Sewjerowuchodneje Syriskeje wo škiće tamnišich kurdiskich kónčin wuradźował. Zdobom wěnowachu so w rozmołwje, na kotrejž so wjeršny rozkaznik Syriskich demokratiskich mocow (SDF) Mazloum Abdi wobdźěli, wojowanju přećiwo islamistiskim teroristam. Francoska chce prawa syriskich Kurdow najebać islamistiske knježerstwo zaručeć.
Nowe warnowanske stawki
Berlin (dpa/SN). Po wšej Němskej su dźensa rano warnowanske stawki w zjawnej słužbje zahajili. Dźěłarnistwo ver.di a Zwjazk zastojnikow stej přistajenych k tomu namołwjałoj. Potrjechene běchu wosebje uniwersitne chorownje, wysoke šule a dróhotwarske zarjadnistwa. W někotrych zwjazkowych krajach kaž w Sewjerorynsko-Westfalskej su tež w dźěćacych přebywanišćach a šulach stawkowali. Ver.di žada sej sydom procentow wjace mzdy, znajmjeńša pak 300 eurow.
Debatuja wo socialnym staće
Ultraortodoksni židźa w Israelu su wčera znowa přećiwo hrožacemu ...
Klöckner wopyta Israel
Berlin (dpa/SN). Prezidentka zwjazkoweho sejma Julia Klöckner je so dźensa na tři dny trajacy nastupny wopyt do Israela podała. Politikarka CDU slěduje přeprošenje kolegi, prezidenta israelskeho parlamenta Knesset Amira Ohany. W rozmołwach z nim chce Klöckner po informacijach zwjazkoweho sejma wosebje mjezsobne poćahi, połoženje w regionje, swětowu situaciju a wěstotu w interneće za škit parlamentow wobrěčeć.
Předwidźane je tež zetkanje z nawodu opozicije Jairom Lapidom a z němskoisraelskej přećelskej skupinu Knesset. Dale wopyta Klöckner wopomnišćo Yad Vashem za wopory nacionalsocialistiskeho holocausta. Zdobom wopomina wona wopory nadpada Hamas 7. oktobra 2023.
Pólske wójsko natwari rezerwu
Waršawa (dpa/SN). Pólska planuje w zwisku z powjetšenjom wójska wutworić nowu kategoriju wojerskich rezerwistow, kotrychž móža w padźe wójny w najkrótšim času mobilizować. Nowa jednotka za spěšne zasadźenje ma z derje wukubłanych a stajnje zaso zwučowacych wojakow rezerwy wobstać, zdźěli zakitowanski minister Władysław Kosiniak-Kamysz powěsćerni PAP we Waršawje. Kóždy rezerwist měł so wosom dnjow wob lěto na zwučowanjach wobdźěleć.
Naprawa je dźěl prócowanja knježerstwa, ličbu wojakow w Pólskej jako čłonskim kraju EU a NATO hač do lěta 2039 na 500 000 zwyšić. Tuchwilu maja něhdźe 200 000 wojakow. Dokelž čuje so Pólska wot Ruskeje wohrožena, kraj tuchwilu masiwnje bróni.
