Berlin (dpa/SN). Zwjazkowa nutřkowna ministerka Nancy Faeser (SPD) je wot zwjazkoweho zarjada za wustawoškit jako prawicarsko-ekstremistiski zastopnjowany magacin Compact kaž tež filmowe předewzaće Conspect zakazała. Policija je dźensa rano wjacore rumnosće organizacije kaž tež bydlenja wodźacych akterow, jednaćelstwa a sobuwobsedźerjow w Braniborskej, Hessenskej, Sakskej a Saksko-Anhaltskej přepytowała.

Zaměr racije je, sćazać dopokazy a zamóženja, w zdźělence rěka. Faeser je swój rozsud z tym wopodstatniła, zo je Compact „centralny rěčny organ prawicarskeje ekstremistiske sceny“, kaž wona rjekny. „Tutón magacin šćuwa na njeznjesliwe wašnje přećiwo Židam, ludźom z migraciskim pozadkom a přećiwo našej parlamentariskej demokratiji.“ Zakaz pokazuje, zo postupujemy tež přećiwo „duchownym zapalerjam, kotřiž šěrja klimu hidy a namocy přećiwo ćěkancam a migrantam w kraju a kiž chcedźa naš demokratiski stat přewinyć“.

Brüssel (dpa/SN). Prezidentka komisije EU Ursula von der Leyen, je hladajo na swojowólne postupowanje madźarskeho ministerskeho prezidenta Viktora Orbána, Ukrainy dla bojkot připowědźiła. Načolna politikarka z Němskeje je wukazała, zo njewobdźěla so na přichodnych informelnych zetkanjach ministrow pod tuchwilnym madźarskim prezidentstwom Rady EU žani komisarojo EU, ale jenož hišće zastojnicy. Nimo toho je EU tradicionalny nastupny wopyt w Budapesće składnostnje madźarskeho předsydstwa Rady EU wotprajiła. W Budapesće reagowaše madźarski minister za europske naležnosće Janos Boka chětro roznjemdrjeny na připowědź.

Pozadk rozkory je „měrowa misija“ Orbána k zakónčenju wójny w Ukrainje, kotraž njebě z EU dorěčana. Orbán wopyta w tym zwisku ruskeho prezidenta Wladimira Putina, chinskeho statneho a stronskeho šefa Xi Jinpinga a bywšeho prezidenta USA, Donalda Trumpa. Nawodnistwo EU w Brüsselu Orbánej wumjetuje, zo njeje w jeje mjenje rěčał.

Washington přihłosuje namjetej ukrainskeho prezidenta Zelenskeho

Washington/Kijew (dpa/SN). USA podpěruja namjet ukrainskeho prezidenta Wolodymyra Zelenskeho, zastupnikow Ruskeje na přichodnu měrowu konferencu w mjeztym dlěje hač dwě lěće trajacej wójnje přeprosyć. „Je to naležnosć Ukrainy, wo tym rozsudźić, hač wotpowědne diplomatiske iniciatiwy pře­wjedźe“, zdźěli rěčnik wonkowneho ministerstwa USA, Matthew Miller, we Washigtonje­. „Podpěrujemy ukrainske knježerstwo.“ Hač je Moskwa na diplomatiskim rozrisanju konflikta scyła zajimowana, Miller njewě. USA su po jeho słowach hižo do wudyrjenja wójny diplomatiske prócowanja přewjedli. Dźensa je kraj najwjetši dodawar brónjow Ukrainje.

Zelenskyj bě žurnalistam w Kijewje rjekł, zo měli so zastupnicy Ruskeje na přichodnej měrowej konferency wobdźělić. To chcedźa na jednanjach w Kataru, w Turkowskej a Kanadźe přihotować. Žro jednanjow je dospołne cofnjenje ruskich wójskow z Ukrainy. Moskwa tole dotal jako swětacuze wotpokazuje.