Skakanski turněr wuspěšny był
Kedźbyhódny datum zapřijeli
Dešno (SN/at). Wólbny wuběrk za wólby Rady za naležnosće Serbow při Krajnym sejmje Braniborskeje je so minjeny pjatk w Dešnje skonstituował. Gremijej předsydari Margit Neugebauer, wokrjesna radźićelka a předsydka Serbskeho wuběrka wokrjesneho sejmika Sprjewja-Nysa. Za městopředsydu wuzwolichu Freda Kaisera, wjesnjanostu gmejny Dešno-Strjažow, za zapisowarku Renatu Harcke, čłonku Domowinskeje skupiny Grodk.
Wólbny wuběrk chce hižo na hłownej zhromadźiznje župy Delnja Łužica 8. junija w Lěšćoch (Hornow) pola Grodka Domowinskim skupinam próstwy wo zapisowanje do wólbneho zapiska přepodać, zo móhli so ludźo za listowe wólby registrować dać. Nimo toho, tak rjekny to Renate Harcke našemu wječornikej, chcedźa wobdźělenych hłowneje zhromadźizny wo přeběhu wólbow informować. Wažny datum je 15. decembra w 12 hodź. „To je posledni dźeń wólbow a kónc wólbneho časa. Termin je wuběrk wotpohladnje wuzwolił, dokelž tón dźeń před 30 lětami je so prěnja braniborska Rada za naležnosće Serbow skonstituowała“, Harcke podšmórny.
W Sakskej dźěłaja najwjace
To a tamne (22.05.24)
Starosća so wo zranjenych
Drježdźany (dpa/SN). Po zadyrjenju błyska na brjoze Łobja w Drježdźanach so dale wo štyrjoch smjerćstrašnje zranjenych starosća. Nowe dopóznaća wo jich strowotnym stawje dźensa dopołdnja hišće njepředležachu. Wčera wječor bě błysk dźesać ludźi zdźěla ćežko zranił. Štyrjo běchu w smjertnym straše. Dweju muži w starobje 27 a 30 lět dyrbjachu pomocnicy wožiwić. Wjedrarnja bě před njejapkimi njewjedrami warnowała.
Přepytuja smjerć prezidenta
Teheran (dpa/SN). Po smjerći iranskeho prezidenta Ebrahima Raisija je šef wójska kraja dokładne přepytowanje njezboža helikoptera připowědźił. K tomu je general Mohammed Bagheri w zakitowanskim ministerstwje skupinu fachowcow zestajał. Při njezbožu běchu předwčerawšim, njedźelu, Raisi, wonkowny minister Hossein Amir-Abdollahian a sydom dalšich wosobow žiwjenje přisadźili. Prawdźepodobnje bě helikopter we wuskej kurjawje orientaciju zhubił a do hory zrazył.
Předstaji wuwiće njeskutkow
Israel: Přikład noweho antisemitizma
Den Haag (dpa/SN). Hłowny wobskóržbnik Mjezynarodneho chłostanskeho sudnistwa je sej wukazy zajeća přećiwo israelskemu ministerskemu prezidentej Benjaminej Netanjahuwej a nawodźe teroristiskeje organizacije Hamas w Gazaskim pasmje, Jihia al-Sinwarej žadał. Tole je sudnistwo wčera w Den Haagu zdźěliło.
Hłowny wobskóržbnik Karim Khan w zwisku z wójnu w Gazaskim pasmje złóstnistwa přećiwo čłowjeskosći přepytuje. Dalše wukazy zajeća měli sudnicy přećiwo israelskemu zakitowanskemu ministrej Joavej Galantej, naměstnikej nawody Hamas Mohammedej Deifej a šefej Hamas we wukraju Ismailej Hanijej wukazać. Nawodnikam Hamas wumjetuje sudnistwo morjenje, zawlečenja zastajencow, wumocowanje a krjudowanja. Ministerskemu prezidentej Netanjahuwej wumjetuja wuhłódnjenje ciwilistow, swojowólne morjenja přez wojakow a zaměrne nadpady na ciwilistow.
Baerbock za lěpši škit Ukrainy
Kijew (dpa/SN). Wonkowna ministerka Annalena Baerbock žada sej hladajo na rusku ofensiwu w Ukrainje wjace mjezynarodneje podpěry za Ukrainu na dobro zakitowanja powětroweho ruma. „Zo bychmy Ukrainu před nawalom ruskich raketow a trutow škitali, trjeba wona lěpši powětrowy škit“, žadaše sej politikarka Zelenych dźensa k zahajenju swojeho mjeztym sedmeho solidaritneho wopyta w Ukrainje po spočatku ruskeho nadpada w februaru 2022. Wonkowna ministerka bě dźensa rano z ćahom dojěła. Wopyt ministerki njeběchu z wěstotnych přičin do toho připowědźili.
„Dyrbimy nětko wšitke mocy zwjazać, zo móhła Ukraina wobstać a zo njebychu wojerske jednotki Putina bórze před našimi mjezami stali“, apelowaše Baerbock hladajo na ruskeho prezidenta Wladimira Putina a na mjezynarodne partnerske kraje. Baerbock a zakitowanski minister Boris Pistorius (SPD) staj iniciatiwu na dobro ukrainskich powětrowych zakitowanskich mocow nastorčiłoj a mjeztym miliardu eurow nazběrałoj.
To a tamne (21.05.24)
Wostudźeni technikarjo koncertoweho zarjadowarja su w Erfurće zasadźenje policije zawinowali. Po krótkodobnym wotprajenju koncerta spěwarja Marka Forstera w durinskej krajnej stolicy běchu sobudźěłaćerjo njewočakowany wólny čas wužili a hrajachu w hoberskej hali kopańcu. Stražnicy firmy za wěstotu mějachu jich za paduchow a zawołachu policiju. Zastojnicy naležnosć wujasnichu a přewodźachu technikarjow z domu.
Před ćeknjenym bykom warnuje policija wobydlerjow w rudnohórskim Oberwiesenthalu. Něhdźe 600 kilogramow ćežke běło-žołte zwěrjo je prawdźepodobnje ćeknyło a chowa so w lěsach na kromje Hammerunterwiesenthala. Štóž byka wuhlada, měł policiju spěšnje informować. Wuraznje zamołwići před tym warnuja, so zwěrjeću bližić abo jeho snano popadnyć chcyć.
Změnje přihłosowała
Berlin (dpa/SN). Zwjazkowa rada je dźensa změnje prawa mjenow přihłosowała. Wot zwjazkoweho sejma w aprylu wobzamknjeny zakoń mjez druhim předwidźi, zo móžetaj wobaj mandźelskaj dwójne mjeno měć. Dotal bě to jenož za jednoho z nich móžno. Dźěći smědźa přichodnje tohorunja dwójne mjeno měć, tež potom, jelizo nimaja starši zhromadne mjeno. Serbja a Frizojo čakachu z wosebitym zajimom na rozsud zwjazkoweho sejma. W zakonju je cyłkownje pjeć nowosćow zakótwjenych, mjez druhim splahej přiměrjene swójbne mjeno.
Wočakuja mjenje dochodow
Drježdźany (dpa/SN). Swobodny stat dyrbi z jasnje mjenje dawkowymi dochodami wuńć hač wočakowane. Sakski statny etat móže hladajo na wuslědk trochowanja dawkow w meji lětsa z dochodami we wobjimje 19,1 miliardy eurow ličić, zdźěli dźensa sakske financne ministerstwo w Drježdźanach. Wuhlady w hospodarstwje su tuchwilu chětro špatne, zwěsći sakski financny minister Hartmut Vorjohann (CDU).
Zakładny zakoń hódnoćiła
