Drježdźany/Berlin (dpa/SN). AfD je w Sakskej při napodobnjenych europskich a komunalnych wólbach mjez młodostnymi najlěpje wobstała. Něhdźe 26 procentow wšěch wolerjow pod 18 lětami je stronje swój hłós dało, wčera wozjewichu. Ze 14,8 procentami přińdźe Lěwica na 2. městno. Zeleni dóstachu 11,6 procentow hłosow, CDU a SPD ležachu ze 11,2 a 9,8 procentami za tym.

Tež při komunalnych wólbach w Sakskej wostanje AfD ze 24,7 procentami najsylniša moc. CDU (12,7) a SPD (12,6) wostanjetej daloko za tym. Wuhódnoćili běchu 3 900 wotedatych hłosow.

Porno tomu je AfD w cyłoněmskim zhladowanju w nahladnosći mjez wolerjemi přisadźiła. W dźensa wozjewjenym woprašowanju instituta Insa w nadawku nowiny Bild by 15,5 procentow (minus 0,5) ludźi AfD woliło, bychu-li přichodnu njedźelu wólby zwjazkoweho sejma byli. Tak by strona za SPD – kotraž ma 16 procentow – na třeće městno přišła. Za AfD je tole najšpatniši wuslědk wólbneho woprašowanja po měrcu 2023.

Mannheim (dpa/SN). Po smjertnym nadpadźe z nožom w Mannheimje kopja so žadanja za konsekwentnym wotsunjenjom wukrajnych skućićelow. Wjacore zwjazkowe kraje podpěruja mjeztym Hamburgskeho nutřkowneho senatora Andyha Grotu (SPD), ćežko-kriminelnych wukrajnikow přichodnje tež do Afghanistana a Syriskeje wotsunyć. Sakski nutřkowny minister Armin Schuster (CDU) na to skedźbnja, zo sej Sakska hižo dołho wotsunjenja islamistow žada.

25lětny muž z Afghanistana bě minjeny pjatk na zarjadowanju islam kritizowaceje organizacija na Mannheimskim Hłownym torhošću z nožom šěsć muži zranił, mjez nimi policista. 29lětny zastojnik je pozdźišo na sćěhi swojich zranjenjow wudychał. Mjeztym maja jasne pokazki na islamistiski motiw skućićela. Tón bě 2014 w Němskej wo azyl prosył, štož pak tehdy wotpokazachu. Zwjazkowy kancler Olaf Scholz (SPD) chce so jutře w zwjazkowym sejmje we wobłuku knježerstwoweje deklaracije wěstotnemu połoženju w Němskej wěnować.

Katastrofowy staw w bayerskich wokrjesach – nowy zakoń připowědźeny

Regensburg (dpa/SN). Połoženje wulkeje wody dla je w dźělach Bayerskeje dale kritiske. W Regensburgu, hdźež běchu katastrofowy staw wukazali, dyrbješe wčera wječor 200 wobydlerjow swoje domy wopušćić. W hornjobayerskim wokrjesu Rosenheimje płaći tohorunja katastrofowy staw. Tež w gmejnach Raubling a Rohrdorf dyrbjachu ludźi ewakuować. Kelko ludźi bě potrjechenych, njebě spočatnje hišće jasne.

Wčera wječor běchu ludźi w Rosenheimskim wokrjesu namołwjeli, doma wostać. „Wobsteji strach za žiwjenje a strowotu“, rěka w zdźělence zamołwitych. Minjenu nóc je so połoženje trochu změrowało. Najebać to wostanu šule a pěstowarnje dźensa zawrjene. W sydom bayerskich wokrjesach dźensa wulkeje wody dla prezencna wučba wupadnje.

Ze spadowacej wulkej wodu su sćěhi zapławjenjow nětko hakle prawje widźomne. Tysacy pomocnikow při rumowanju pomhaja. Dotal su štyri smjertne wopory zličili.

Železniski wobchad je dale haćeny. Wjacore zwiski podłu Dunaja wupadnu, dokelž su kolije zapławjene.

Studijna akademija w Budyšinje so na nowe časy hotuje. Dotal bě tam za studowacych jenož móžno, swój studij ze zakónčenjom bachelor zakónčić. Za masterski studij dyrbjachu woni region wopušćić. Tole w přichodźe hižo trěbne njebudźe. Na studijnej akademiji hodźa so wobzamknjenja docpěć, kotrež su runje tak hódne kaž na uniwersitach. Na uniwersitach studowacy zwjetša bjezwuwzaćnje přez praktikumy zwisk do hospodarstwa dóstawaja. Na Budyskej powołanskej akademiji pak je předewšěm praksa ćežišćo. Mnohim młodostnym je tole atraktiwny poskitk. A tež zawody we Łužicy jako partnerojo w praksy móža z toho čerpać. Za čas wukubłanja móža předewzaća młodostnych na zawod wjazać a jim powołanske perspektiwy wotkrywać. Za tón abo tamny zawod we Łužicy je nowowusměrjenje Budyskeje powołanskeje akademije móžnosć fachowcow wukubłać. To njeje potajkim jenož młodostnym šansa, ale tež předewzaćam. Njech to wužiwaja! Bianka Šeferowa