W skeču „Dinner for One“, kotryž telewizijne sćelaki kóždy silwester wusyłaja, přeco rěka: „The same procedure as every year“ – na samsne wašnje kaž kóžde lěto. A tak, kaž ma so butler James lěto wob lěto składnostnje narodnin swojeje knjenje wopić, jeje njeboh přećelow hrajo a sej z hosćićelku spochi připiwajo, praskotaca mjeńšina ludnosće wjetšinje kołowokoło noweho lěta dny dołho na čuwy pada. Přećiwo rjanym wohnjostrojam a praskotanju krótko po połnocy na proze do noweho lěta přiwšěm ničo nimam. Ale sceny ze wšelakich městow – kaž we wobydlerskej wójnje ze strašnymi atakami na policistow a pasantow – pokazuja, zo tu wo kulturne kubło njeńdźe. Tež nic při praskotanju hižo wot spočatka předanje pyrotechniki dny do kónca lěta. Njech je silwesterski wohnjostroj w přichodźe jeničce w horšći wjesnych towarstwow a druhich zjawnych zarjadowarjow. Priwatne ekscesy na kóšty strowoty njetrjebamy. Marcel Brauman

Teheran (dpa/SN). Hižo pjaty dźeń za ­sobu su wčera syły Iranjanow w zwisku z ćežkej hospodarskej krizu w kraju přećiwo awtoritarnemu statnemu wjednistwu demonstrowali. Swědkojo rozprawjeja, zo su w metropolach wěstotne jednotki z masiwnej prezencu protestne ­akcije zaraćili a druhdźe w kraju z njepřiměrjenej namocu přećiwo demonstrantam postupowali. Při tym su znajmjeńša třoch z nich morili.

Zahajili běchu so protesty minjenu njedźelu, po tym zo su dewizowe kursy njejapcy spadnyli. Spontanje su přede­wšěm wikowarjo w stolicy Teheranje na dróhu šli. Bórze so dalše skupiny wo­bydlerstwa přidružichu, mjez nimi studenća a protesty wupřestrěwachu so w slědowacych dnjach na druhe regiony kraja.

Na swojim wopyće štwórtk w prowincomaj Tschahar Mahal a Bachtiari pre­zident Peseschkian njewšědnje wote­wrjenje přizna, zo maja stat a banki winu na tuchwilnej hoberskej inflaciji w kraju. Nimo hospodarskich reformow wón připowědźi, zo subwencije za importerow šmórnje, kotřiž běchu dotal ze statneho spěchowanja dewizoweho kursa profi­towali.

Lukáš Novosad komentuje prěnje tydźenje noweho čěskeho knježerstwa

Praha. Kajke su prěnje tři tydźenje noweho čěskeho knježerstwa byli? Wothladajo wot hodowneho tydźenja, hdyž su wšitcy wotpočowali a politika je wokomik womjelknyła, stej tydźenjej do toho samsnej byłoj, kaž cyły čas wólbnych dobyćerjow do jich knježerskeho spřisahanja – połnej njewěrjomnych anekdotow. Nowy wobswětowy minister Petr Macinka, předsyda strony Motoristé sobě, je po swojim nastupjenju do funkcije zdźělił, zo „z tym je so w Čěskej klimowa kriza zakónčiła“. A hnydom je cyły wotpowědny ministerski team za škit klimy rozpušćił. Jeho ministerski předchadnik Petr Hladík (křesćanska unija KDU-ČSL) naspomni: „Sym wćipny, štó budźe agendu z našimi europskimi partnerami diskutować a organizować.“

Dokelž sće wutoru silwesterski Předźe­znak jako přiłohu SN dóstali, dźensa regularny Předźenak jako přiłohu Serbskich Nowin njenańdźeće. Wot přichodneho tydźenja přiłoha zaso prawidłownje wu­chadźa. redakcija SN