Za razniše pokuty
Turizm poněčim zaso móžny
Berlin (dpa/SN). Něšto dnjow do swjatkow Schleswigsko-Holsteinska jako prěni zwjazkowy kraj wot dźensnišeho turizm zaso zmóžnja. Tež w dalšich wobłukach je zjawne žiwjenje w najsewjernišim kraju Němskeje móžne. Hosćency smědźa zaso nutřka posłužować, wulětne łódźe pasažěrow přijimać. Hłowna jednaćelka zwjazka hotelownikow a hosćencarjow Ingrid Hartges namołwja tamne zwjazkowe kraje, sej sewjerny zwjazkowy kraj za přikład wzać a turizm tohorunja znowa zmóžnić.
Hartges rjekny wčera wječor w telewiziji ARD: „Widźimy, zo njebě turizm žórło infekcijow z koronawirusom. Branša je jara dołho wosebje wulki wopor znjesć dyrbjała a trjeba nětko zaso perspektiwu.“
Delnja Sakska a Mecklenburgsko-Předpomorska stej hišće zdźeržliwej. Delnjosakska dowola turizm najprjedy raz jenož domoródnym. W Mecklenburgsko-Předpomorskej smědźa hosćency swjatki nutřka a wonka zaso přistupne być. Wot 14. junija smědźa potom turisća z tamnych zwjazkowych krajow přijěć.
Herbst: Łužica by wukrawiła
Zapósłanc FDP přećiwo dočasnemu skónčenju zmilinjenja brunicy
Drježdźany (SN). Sakski zapósłanc FDP w zwjazkowym sejmje Torsten Herbst před tym warnuje, za kónc lěta 2038 předwidźany kónc zmilinjenja brunicy noweho přiwótřeneho zakonja za škit klimy dla doprědka sćahnyć. To by wuhlowej kónčinje wulke škody načiniło, je sej wón wěsty. Herbst w tym zwisku zdźěla: „Zwjazkowe knježerstwo sadźa sej po wusudźe Zwjazkoweho wustawoweho sudnistwa akcionistiske nowe zaměry nastupajo wustork wuhlikoweho dioksida, bjez toho zo by najmjeńši nadych měło, kak chcyło tute zaměry docpěć. Prawdźepodobnje sej njezwěri, wobydlerjam krótko do wólbow zwjazkoweho sejma sprawnosć rjec. K móžnym naprawam, wo kotrychž tuchwilu rěča, słuša tež dočasne skónčenje zmilinjenja brunicy w lěće 2030 – pak ze zakonjom pak z wukazom. To by był hłubokodyr za Łužicu a jasne ranjenje dotalnych dorěčenjow.“
To a tamne (17.05.21)
Udo Lindenberg přija k dźensnišim 75. narodninam tež zbožopřeća Berlinskeho knježaceho wyšeho měšćanosty Michaela Müllera (SPD). Lindenberg je so na najwšelakoriše wašnje „za přewinjenje murje a za dojednanje mjez wuchodom a zapadom zasadźał“, Müller piše. Po znowazjednoćenju „angažowaše so za přewinjenje murje we hłowach, přećiwo hidźe na cuzych, za tolerancu, respekt a pisanu towaršnosć“.
Kopanje do dakla je muža w porynsko-pfalcowskim Ludwigshafenje do jastwa přinjesło. Jako přiwołani policisća personalije 52lětneho přepruwowachu, so wukopa, zo za nim z wukazom zajeća pytaja. Muž wšak wo tym ani ničo njewědźeše. Zastojnicy dowjezechu jeho do jastwa. Hač je so mały dakl 63lětneje wobsedźerki přez kopanje skućićela zranił, njeje policija zhoniła.
Biden warnuje před paniku
Washington (dpa/SN). Po cyberowym nadpadźe na najwažnišu bencinowu pipelinu USA ludźo na wuchodnym pobrjoze kraja ćěriwo we wulkich mnóstwach kupuja, tak zo je na mnohich tankownjach hižo dospołnje wupředate. Wosebje potrjechena je stolica Washington, hdźež su tři štwórćiny tankownjow bjez bencina. Tež w druhich zwjazkowych krajach maja problemy. Prezident Joe Biden je ludźi namołwjał, jenož telko kupować, kaž je trěbne a warnuje w tym zwisku před „paniku“.
Maas ma dowol za móžny
Berlin (dpa/SN). Hladajo na najnowše wuwiće koronapandemije budźe po słowach wonkowneho ministra Heika Maasa (SPD) w lěću dowol zaso móžny. „Směmy so nadźijeć, zo so žiwjenje bórze zaso normalizuje, hdyž ličby infekcijow dale woteběraja a šćěpjenje so dale derje wuwije“, rjekny Maas nowinarjam. Dowol móhł tež nješćěpjenym móžny być. Zdobom Maas wuzamkny, zo knježerstwo hišće raz dowolnikow domoj přiwjeze, kotřiž su we wukraju tčacy wostali.
Herrmann: Falšowanje chłostać
Namócne protesty přećiwo knježerstwu w Kolumbiskej traja mjeztym ...
Tunlowy system nadběhowali
Lindner nastupi
Incidenca w Němskej zaso pod 100
Berlin (dpa/SN). Cyłoněmska sydomdnjowska incidenca je po informacijach Roberta Kochoweho instituta po 20. měrcu zaso niša hač sto. Kaž institut rozprawja, wučinješe wona dźensa rano 96,5 (20. měrca: 99,9). Wčera ležeše ličba nowych infekcijow z koronawirusom na 100 000 wobydlerjow w běhu tydźenja hišće pola 103,6, dźens tydźenja wučini hišće 125,7. Swój dotal najwyši staw za čas třećeje žołmy koronapandemije měješe incidenca 26. apryla z 169,3. Najwyšu incidencu scyła běchu loni dnja 22. decembra z 197,2 registrowali.
Strowotniske zarjady Němskeje su Roberta Kochowemu institutej w běhu dnja 11 336 nowych koronainfekcijow zdźělili. Minjeny pjatk bě jich 18 485 infekcijow było. Institut je wot spočatka pandemije 3 577 040 dopokazanych infekcijow z koronawirusom zličił, 3 259 000 ludźi je infekciju přetrało. Ličba pacientow, kotraž je w zwisku z wirusom zemrěła, je na 85 848 rozrostła.
Wočakuja solidaritu Němskeje
Centralna rada Židow žada sej škit institucijow – Palestinjenjo demonstruja
Berlin (dpa/SN). Centralna rada Židow wočakuje hladajo na nadpady islamistiskeje organizacije Hamas solidaritu Němskeje z Israelom a ze židowskim zhromadźenstwom w Němskej. „Dyrbimy so wšitcy zhromadnje poboku židowskeho stata zestupać“, rjekny prezident centralneje rady Josef Schuster předwčerawšim, srjedu, w Berlinje. Israel a Židźa su předewšěm w socialnych medijach z hidu a šćuwańcu konfrontowani, wohroženje Židow přiběra. To pokazuja spalene israelske chorhoje před synagogami w Bonnje a Münsteru. Israelske institucije měli lěpje škitane być, sej Schuster hladajo na namócnosće žada.
