Nowe swójske dopóznaća Ruskeje k MH 17
Moskwa (dpa/SN). Ruska je nowe pozdatne dopokazy předpołožiła, zo njeje wina na wottřělenju malajziskeho pasažěrskeho lětadła z 298 mortwymi nad krizowej kónčinu na wuchodźe Ukrainy před štyrjomi lětami. Zasadźenu raketu lětadła wotwobaraceho systema Buk běchu 1986 jednotce sowjetskeho wójska na zapadźe Ukrainy přepodali. Wottam pak njeje so wona po sypnjenju Sowjetskeho zwjazka do Ruskeje nawróćiła, cituja ruske powěsćernje generala Nikolaja Paršina.
Mašinu typa Boeing 777 běchu 17. julija 2014 na lěće MH 17 z Amsterdama do Kuala Lumpura nad wuchodnej Ukrainu wottřělili. Tam howrjachu runje w tym času wojowanja mjez proruskimi separatistami a ukrainskimi jednotkami. Dokelž najwjetši dźěl woporow z Nižozemskeje pochadźeše, tamniše statne rěčnistwo zhromadnje z Malajziju, Awstralskej, Belgiskej a Ukrainu wottřělenje lětadła přepytuje. Fachowcy winuja dotal Rusku. Zasadźena raketa słuša po jich přepytowanju k ruskej raketowej jednotce pola Kurska.
Komisija so znowa schadźowała
Berlin (dpa/SN). Po najnowšej zwadźe kompromisoweho namjeta k zakónčenju wudobywanja brunicy dla je so tak mjenowana wuhlowa komisija dźensa znowa w Berlinje schadźowała. Na dnjowym porjedźe stejachu wšelake scenarije a jich wuskutki na płaćizny miliny kaž tež strukturna změna w potrjechenych kónčinach, kaž w porynskej a łužiskej brunicowej kónčinje.
Brizantnosć lubješe dnjowy dypk „organizatoriske“. Rozprawa časopisa Spiegel wo časowym planje sobupředsydy komisije Ronalda Pofalle, po kotrymž měła so najpozdźišo lěta 2038 poslednja brunicowa milinarnja Němskeje zawrěć, bě wulki hněw mjez čłonami komisije zbudźiła.
Nimo toho zaběra komisiju rumowanje štomowych domow w Hambachskim lěsu, hdźež protestuja aktiwisća přećiwo pušćenju lěsa na dobro brunicoweje jamy. Hambachski lěs je zdobom symbol spjećowanja přećiwo brunicy a z njej zwjazanemu poćeženju klimy. Wobswětoškitarjo sej žadaja z pušćenjom štomow čakać, doniž njeje komisija dźěłać přestała.
Słowak chce wěsćišu Europu
Maroš Šefčovič kandidaturu za prezidenta komisije EU přizjewił
Brüssel (dpa/SN). Słowakski socialdemokrat Maroš Šefčovič chce so klětu z nowym prezidentom komisije Europskeje unije stać a je tak zdobom direktny konkurent němskeho politikarja CSU Manfreda Webera. Šefčovič, tuchwilny wiceprezident komisije, je so wčera oficialnje za wjerškowu kandidaturu swojeje stronskeje swójby přizjewił, tak kaž bě to Manfred Weber hižo před tydźenjomaj za Europsku ludowu stronu (EVP) činił.
We woběmaj wulkimaj stronskimaj lěhwomaj wubědźuja so wotnětka wo najwyše zastojnstwo EU po wólbach 2019. Přiwšěm njeje hladajo na wólbny wuslědk hišće ničo rozsudźene. Štóž ma jako wodźacy kandidat dweju wulkeju stron najlěpši wólbny wuslědk, ma šansy na zastojnstwo mócneho prezidenta komisije EU.
Žana prawa rentnarska politika
Podstupim (dpa/SN). Čerwjeno-čerwjene braniborske krajne knježerstwo zaspi po měnjenju Lubnjowskeje zapósłanče krajneho sejma Roswithy Schier (CDU) woprawdźitu politiku za seniorow, kotraž so za zajimy staršich ludźi zasadźa. „Mi pobrachuja přeco hišće ideje a inowatiwne koncepty“, praji Schier němskej powěsćerni dpa.
To a tamne (18.09.18)
Mylnje psa sobu pokradnył je paduch awta w delnjosakskim Goslaru. Dakl Dolores čakaše w małym awće wobsedźerja, po tym zo bě tón před hosćencom pozastał. Klučik awta pak bě šofer w jězdźidle ležo wostajił, tak zo měješe sej paduch chětro lochko. Po něšto času wobsedźer pytny, zo stej awto a Dolores preč. Dźeń pozdźišo dósta wón znajmjeńša psycu nastupajo dobru powěsć: Šoferka bě ju při pobóčnym wohrodźenju zwjazkoweje dróhi pola Clausthala-Zellerfelda přiwjazanu našła. Za awtom wšak dale pytaja.
Chětro wopojeny je 45lětny w durinskim Ilmenauwje meble z woknom mjetał a by bjezmała pěška trjechił. Přičina spodźiwneho błuda: Muž je hriby jědł, kotrež bě sam zběrał. Te jemu prawdźepodobnje tyli njejsu. Sćěhi toho běchu mylenja zaznaćakmanosće a agresije. Muža dowjezechu do chorownje.
Wabi w Pólskej za Europu
Gdańsk (B/SN). Předsyda Němskeje biskopskeje konferency, kardinal Reinhard Marx, je na swojim njedawnym wopyće Pólskeje w Gdańšćanskim Solidarność-centrumje „za nowe wědomje za Europu, za wulki projekt měra“ wabił. „My wšitcy směmy w najlěpšim zmysle słowa patrioća być“, rjekny Marx. Dyrbimy pak tež přez swójsku kromu talerja hladać, zo bychmy wotpowědowali zamołwitosći zhromadneho domu.
Wjele Božich domow spušćiła
Bonn (B/SN). Katolska cyrkej w Němskej je wot lěta 2000 něhdźe 540 cyrkwinskich twarjenjow spušćiła, 160 je spotorhać dała, 142 předała. Wjacore Bože domy słuža dźensa jako dźěćace dnjowe přebywanišća, starownje, hosćency, kulturne zarjadowanišća abo archiwy. Tuchwilu w Němskej hišće 22 200 cyrkwjow a kapałkow wužiwaja.
Horcota cyrkwjam škodźała
Mjezy EU zawěsćić
Berlin (dpa/SN). Němska zwjazkowa kanclerka Angela Merkel (CDU) a jeje awstriski kolega Sebastian Kurz chcetaj wonkowne mjezy Europskeje unije lěpje škitać. Na to staj so wonaj wčera wječor w Berlinje dojednałoj. Tež zhromadne dźěło z afriskimi krajemi ma so polěpšić, zo móhli poněčim přičiny migracije wotstronić. Mjezy škitacu agenturu Frontex chcedźa hač do lěta 2020 na 10 000 zastojnikow rozšěrić.
Njewjedra sej wopory žadali
Peking/Washington (dpa/SN). Ličba smjertnych woporow po taifunje „Mangkhut“ je so powjetšiła. Na Filipinach je po sylnych zliwkach lawina błóta dom pod sobu pohrjebała, w kotrymž hórnicy spachu. Zamołwići liča z 58 mortwymi. Na južnym pobrjohu Chiny su štomy třoch ludźi zarazyli. Dalši čłowjek zemrě, jako so twarjenje sypny. W USA je sej hurrikan „Florence“ na juhowuchodźe kraja dotal 17 smjertnych woporow žadał. Tam bědźa so z wulkimi zapławjenjemi.
Za dołhodobny přinošk
Scheuer z nowym konceptom za dieselowe awta
Berlin (dpa/SN). W boju přećiwo móžnym zakazam jězdźenja dieselowych awtow a zanjerodźenju powětra w městach chce zwjazkowe knježerstwo Němskeje starše dieselowe awta nimo tuchwilu praktikowaneho ponowjenja software tež technisce ponowić. „Dyrbimy rozmyslować, kak móhli wobstatk awtow technisce hišće čisćiši sčinić“, rjekny minister za wobchad Andreas Scheuer (CSU) minjeny pjatk, bjez toho zo by nadrobnosće mjenował. Sudniske wusudy k móžnym zakazam jězdźenja zamołwitych nuzuja wobydlerjam wjace wěstoty spožčić, wón rjekny. Kotrych wobsedźerjow dieselowych awtow by to potrjechiło, je dale njejasne.
Zjawny list zwjazkowej kanclerce
Berlin (SN). Po namócnych podawkach w Kamjenicy a hladajo na wuprajenja prezidenta zwjazkoweho wustawoškita Hansa-Georga Maaßena je so krajna skupina sakskich zapósłancow SPD w zwjazkowym sejmje ze zjawnym listom na zwjazkowu kanclerku Angelu Merkel (CDU) wobroćiła.
Daniela Kolbe, Detlef Müller, Susann Rüthrich und Thomas Jurk kanclerku namołwjeja, swoju kompetencu wužiwać a Maaßena pušćić. Debata wo tym, hač je w Kamjenicy k namócnosćam dóšło abo nic, je „wohańbjaca“. Zo je runje Maaßen jako nawoda Zwjazkoweho zarjada za wustawoškit ze swojimi wuprajenjemi w bulwarnej nowinje tajku debatu nastorčił, je „šamałe“, dokelž wón wuprajenja swědkow, kotřiž su namóc sami dožiwili, do prašenja staja. Zapósłancy SPD pisaja: „Wužiwajće jako zwjazkowa kanclerka swoju směrnicowu kompetencu w zwjazkowym knježerstwje, kotrež jako zapósłancy SPD tuchwilu zastupujemy. Starajće so wo to, zo dowěru do tutoho knježerstwa njespušćimy!“
Rozprawa zbudźa wulku kritiku
Debata wo móžnym terminje kónca zmilinjenja brunicy
Choćebuz/Drježdźany (dpa/SN). W medijach wozjewjeny pozdatny kompromis tak mjenowaneje wuhloweje komisije zwjazkoweho knježerstwa nastupajo móžny termin wotpinjenja brunicowych milinarnjow je předewšěm we wuchodnej Němskej wulku kritiku zbudźił. Samo čłonojo wuhloweje komisije reaguja rozhorjeni. Tydźenik Spiegel rozprawja, zo su sej we wuhlowej komisiji w dalokej měrje wo terminje zakónčenja wudobywanja brunicy přezjedni. Pječa maja so poslednje brunicowe milinarnje w lětach 2035 do 2038 wotpinyć.
Wotpowědny kompromis bě čłon předsydstwa Němskeje železnicy Ronald Pofalla, sobupředsyda wuhloweje komisije, po rozmołwach z druhimi čłonami gremija zdźěłał a jón we wobswětowym ministerstwje a w kanclerskim zarjedźe předstajił, kaž Spiegel rozprawja.
