Berlin/Kerpen (dpa/SN). Zwada wo brunicowy rewěr Hambachskeho lěsa pači wot zwjazkoweho knježerstwa zasadźenu tak mjenowanu wuhlowu komisiju. „Hambachska brunicowa jama ma wšitke dowolnosće a bu dotal we wšitkich sudniskich instancach wobkrućena“, rjekny čłon komisije Eric Schweitzer, prezident Němskeho industrijneho a wikowanskeho zwjazka, nowinarjam. „Toho- dla je w prawniskim staće konsekwentne, zo smě energijowy zastaraćel RWE brunicowu jamu dale wužiwać.“

Policija je wčera w Hambachskim lěsu započała domy na štomach wotstronić, kotrež běchu sej tam wobswětoškitarjo a přećiwnicy brunicy natwarili. Akciju, jednu z najwjetšich policajskich zasadźenjow minjenych lět, chcychu dźensa zakónčić. Aktiwistam wumjetuja, zo njewotpowěduja domy na štomach twarskim předpisam, dokelž nimaja schód. Energijowy koncern RWE chce nazymu wulke dźěle lěsa pušćeć, zo móhł brunicowu jamu rozšěrić.

Kuwerty z pjenjezami su wjacori woby­dlerjo Mannheima w swojich listowych kašćikach našli. Ludźo su policiji cyłkownje štyri wobalki w wjacorymi tysacami eurow přepodali. Wotpósłarja listow njeznaja. Policija tuka, zo je duchownje zamyleny čłowjek kuwerty rozdźělował. Policija wobydlerjow prosy, jej pjenjezy přepodać, dóstanu-li dalše tajke posyłki. Snano móže wobsedźerja zwěsćić a jemu pjenjezy wróćić. Jeli so to njeporadźi, maja ludźo prawo na namakanske myto.

Strachoćiwej šoferce z Nižozemskeje su policisća w Hamburgu pomhali. Žona bě jim napadnyła, dokelž swoje awto po hoberskim Köhlbrandowym mosće wróćo storkaše. Zastojnikam wona rozłoži, zo so wysokosće njesměrnje boji a sej doprědka přez móst njezwěri. Jedyn ze zastojnikow sydny so za wodźidło a je z awtom po 53 metrow wysokim mosće dale jěł.

Strukturnej změnje we Łužicy pod serbskim aspektom přiwobroća so něhdźe 150 wobdźělnikow dźensa a jutře na fachowej konferency w Złym Komorowje. Domowina a Zhorjelska Dźěłarnja přichoda Łužicy běštej na nju přeprosyłoj. Přišłoj stej tež za Serbow přisłušnej ministerce dr. Eva-Maria Stange za sakske a dr. Martina Münch (wobě SPD) za braniborske knježerstwo.

Zły Komorow (SN/at). „Dyrbimy puć namakać, kak móža Serbja tu žiwi być a tele prašenje we wšěch fasetach rozjimować“, podšmórny předsyda Domowiny Dawid Statnik we witanskich słowach. Decernentka w Zhorjelskim krajnoradnym zarjedźe Heike Zettwitz je přitomnym doraznje do swědomja rěčała, „zo maja so wobydlerjo do procesa zapřijeć“.